थिसलुनीके चो मंडली
काजे पठालो-बीता पउलुस चो दुसर चिटी
मूर चो गोट
1
पउलुस, सिलवानुस आउर तीमुथियुस बाटले थिसलुनीके चो मंडली के चिटी, जोन आमचो बुआ महापरभु आउर परभु जीसु किरिस्त ने आसोत।
2 आमचो बुआ महापरभु आउर परभु जीसु किरिस्त बाटले तुमके दया आउर अस्तिर मिरते रओ।
नियाव चो दिन
3 ए भाईमन, आमके तुमचो काजे अमदेया महापरभु के धन-धन करतोर ची आय आउर असन करतोर नंगत बले आय। कसनबलले तुमी सपाय, बिसवास ने आउर गोटोक-दुसर चो मया ने खुबे बाड़साहास।
4 एईकाजे जितरो डाटा-टेवा आउर डंड-तकलीस तुमी कटलायसाहास, हुन सबु ने तुमचो धीरजा आउर बिसवास दखा देयसे, एईकाजे आमी महापरभु चो मंडलीमन ने तुमचो बारे ने गुमान करुंसे।
5 जोन डंड-तकलीस तुमी महापरभु चो राज काजे पायसास हुनचो ले तुमी महापरभु चो राज चो लाईक होयसाहास आउर ए महापरभु चो धारनिक नियाव चो पक्का चीना आय।
6 कसनबलले महापरभु कोचई पाटेया नी होए: जोन तुमके तकलीस देयदे, महापरभु हुनके बले पलटा ने तकलीस देयदे।
7 जिदलदांय परभु जीसु आपलो सकत दूतमन संगे ढग-ढकतो आईग ने सरग ले दखा देयदे, तेबे तुमी, तकलीस पावतो लोग आमचो संगे अस्तिर पाहासे,
8 आउर जोन बले महापरभु के नी चिताए आउर आमचो परभु जीसु चो नंगत खबर के नी माने, हुनमन ले पलटा धरेदे,
9 हुनमन परभु ले आउर हुनचो सकत चो मयमा ले लापी होउन जुग-जुग काजे नास होतो चो डंड पावदे,
10 जोन दिने परभु जीसु एयदे, आपलो पवितर लोगमन ले मयमा पायदे, हुन आपने के पतेयातो लोग के दखुन भक्यायदे, कसनबलले तुमी आमचो गवई के पतेयालास।
11 एईकाजे आमी तुमचो काजे अमदेया पारथना बले करुंसे कि आमचो महापरभु तुमके आपलो हागदिलो लाईक बनाओ, आउर तुमचो सपाय भलई चो मन-इछा आउर बिसवास चो बुता के आपलो सकत ले पुरा करो।
12 असन बरन ले आमचो महापरभु आउर परभु जीसु किरिस्त चो दया ले, आमचो परभु जीसु चो नाव तुमचो ने मयमा पाओ आउर तुमी हुनचो नाव ने मयमा पाहा।