पारथना करतो काजे गुहार
3
सरासरी ने ए भाईमन, आमचो काजे पारथना करा कि परभु चो बचन झपके बिगरो आउर मयमा पाओ, जसन तुमचो थाने होली,
2 आउर अडरा आउर एड़जा लोगमन ले आमके बाचुन रउक होओ कसनबलले हुनमन सपाय परभु के नी पतेयाओत।
3 मानतर परभु सतपतेयातो लाईक आय, हुन तुमके चमकट करुन अडरा बीता बललोने, सयतान ले रखेया करेदे।
4 आमके परभु बाटले तुमचो उपरे भोरसा आसे कि जोन बले हुकुम आमी तुमके देउंसे, हुनके तुमी मानसास आउर मानते बले राहासे।
5 महापरभु चो मया आउर किरिस्त चो धीरजा बाटे परभु तुमचो मन के नेओ।
बुता करतो जुमे
6 ए भाईमन, आमी तुमके आमचो परभु जीसु किरिस्त चो नाव ने हुकुम देउंसे कि जोन आमचो ले नंगत सिखिया पाउन बले अडरा चलनी-बुलनी ने आसोत, हुनमन ले अलगे राहा,
7 तुमी खुदे जानेसाहास कसन नीती ले आमचो असन चलतोर-बुलतोर आय; कसनबलले आमी तुमचो मंजी अडरा चलनी-बुलनी ने नी रलु।
8 आउर कोचई घरे फोकाहा ने नी खादलु मानतर रात-मंजन बुता-भयना करते रलु कि तुमीमन ले कोकई काई बोजा नी होओ।
9 आमके तुमचो ले धरतोर हक आसे मानतर आमी हुन हक के नी बाहारलु। आमके तुमचो पुरे मान चो लाईक होतोर आय, एईकाजे कि तुमी बले आमचो असन चला-बुला होआ।
10 कसनबलले आमी तुमचो थाने रलो बेरा ए हुकुम बले देते रलु कि कोनी बुता करुक मन नी करे जाले, हुन भूके रओ,
11 आमी सुनुंसे कि तुमचो थाने कोनी-कोनी लोगमन ठगरा होउन, काई बुता नी करसोत आउर दुसर चो बुता ने अड़ंगा लगायसोत,
12 असन लोगमन के आमी परभु जीसु किरिस्त ने हुकुम देउंसे आउर समजाउंसे कि हुनमन बुता-भयना करुन आपलेई ची कमानी खाओत।
13 ए भाईमन, तुमी भलई करतोने धीरजा नी छांडा।
14 कोनी आमचो ए चिटी चो गोट के नी मानेसे जाले हुनचो संगे बसा-उठा नी होआ, जेचोले हुन लाज पड़ो,
15 फेर बले हुनके बयरी नी समजा, मानतर भाई असन चेतानी दियास।
सरासरी जुहार
16 एदांय अस्तिर करु परभु, खुदे तुमके अमदेया काजे सबु बरन ले अस्तिर करो। परभु तुमी सपाय संगे रओ।