जरूसलेम चो पाप
3
जरूसलेम सहर उपरे हाय,जोन थाने ओनियाव, असुद आउर ओधरम होयसे।
2 हुता चो लोगमन जहोवा चो गोट नी सुनला,
समजातो काजे दिलो डंड के बले नी मानला
आउर जहोवा उपरे भोरसा नी करला
आउर आपलो महापरभु जहोवा चो डंडासरन नी करला।
3 हुता चो मुखियामन
नांदतो बीजापुलिया-बाग असन आत
आउर नियाव करुमन सांज बेरा पारदी डगरातो डुरकी असन आत
जोन बियान काजे काई नी बचाओत।
4 हुता चो अगमजानीमन, टाबरी
आउर धोका देउमन आत
हुता चो पुजारीमन, पवितर मंदिर के अपवितर करुआत
आउर हुनमन नियम-कानुन हिसाब ले नी चलुआत।
5 फेर बले जहोवा हुनमन चो मंजी धरमी आसे,
हुन केबई गलती नी करे,
हुन रोजे बियाने सत नियाव ची करुआय,
असन करतोने, हुन केबई नी चुके,
मानतर ओनियाव करुमन के काई लाज नी लागे।
6 जहोवा बलेसे, “मय जात-जात चो लोगमन के सत्यानास करले,
हुनमन चो गुमटमन के भोसड़ाले,
हुनमन चो सड़कमन छीड़ा पड़ली,
एदांय हुता कोनी नी हिंडोत,
मय, हुनमन चो सहरमन के सत्यानास करले,
हुता माने आउर जनावरमन काई नी बाचला।”
7 मय बिचारले, “एदांय जरूसलेम चो लोगमन मोके डरुन चलदे
आउर समजातो काजे दिलो डंड के मानदे।
तेबे मय हुनमन चो घरमन के सत्यानास नी करेंदे
आउर हुनमन चो उपरे आनतो सपाय डंडमन के भुलकेंदे।”
मानतर हुनमन मोचो गोट नी मानुन
सपाय बरन चो अडरा बुतामन करते रला।
जात-जात चो लोगमन आपलो मन बोहड़ातोर
8 एईकाजे जहोवा असन बलेसे,
“तुय हुन दिन चो बाट दखते रा, मय खुदे तुचो बिरुद गवई देउक उबा होयंदे।
मय पक्का बिचारलेसे, मंजपुर चो जात-जात चो
आउर राज-राज चो लोगमन के रूंडा करेंदे।
मय हुनमन उपरे
मोचो जंजाल रीस चो आईग के उलदुन देयंदे
आउर मोचो कुचर चो आईग ले
मंजपुर के लाकड़ी उलटायंदे।
9 हुन समया ने, मय सपाय लोगमन चो
टोंड के सुद करेंदे
हुनमन सपाय, जहोवा के गुहारदे
आउर गोटोक सोर होउन मोचो सेवा बुता करदे।
10 फेर कूस देस् चो नंदीमन चो हुन-पाटे जत-खत होलो मोचो रयत बललोने,
मोचो भगतमन, मोचो लगे एदे
आउर मोचो काजे भेंट आनदे।
11 हुन दिने, तुय मोचो बिरुद करलो
ओधरम बुतामन किरता लाज नी होसे।
कसनबलले मय सपाय गुमानीमन के
तुचो मंजी ले निकरायंदे
आउर तुय मोचो पवितर डोंगरी ने
फेर केबई गुमान करुन नी बुलसे।
12 मय तुचो मंजी,
सोज आउर गरीब-दुखी लोगमन के बचाउन रयंदे
हुनमन जहोवा चो नाव ने सरन पावदे।
13 फेर इसराएल चो बाचलो लोगमन
काई अडरा बुता नी करदे
आउर फंद गोट नी गोटेयादे,
हुनमन चो टोंड ले
काई कपट गोट नी निकरे।
हुनमन पेट-भर खादे आउर अस्तिर ने रदे।
हुनमन के डरातो लोग कोनी नी होदे।”
हरिक चो गीत
14 ए, सियोन चो बेटी*, तुमी हरिक ले गाहा;
ए इसराएल, बड़े राग ले जय-जय गीत गाहा!
ए जरूसलेम चो बेटी,
आपलो समपुरन मन ले हरिक-उदीम मनाहा!
15 जहोवा तुचो डंड के गुचालोसे
आउर तुचो बयरीमन के लापी करलोसे!
इसराएल चो राजा जहोवा,
तुचो मंजी आसे,
एईकाजे फेर केबई
तुय बिपती के नी डरसे।
16 हुन दिने, जात-जात चो लोगमन, जरूसलेम के बलदे,
“ए सियोन, तुय नी डर आउर तुचो हाथ निमल नी होओ।
17 तुचो महापरभु जहोवा, तुचो मंजी आसे,
हुन बड़े बीर आय, हुन तुके जीतायदे,
हुन तुचो किरता खुबे हरिक होउआय,
तुके खुबे मया करुन नंगत जीवना देउआय,
हुन बड़े राग ले गीत गाउन तुचो काजे हरिक मनाउआय।”
18 जहोवा बलेसे, “जोनमन कबूल धरालो समया ने पवितर तिहार ने जाउक नी सकलो किरता दुखी रउआत,
मय हुनमन के रूंडा करेंदे,
हुनमन लाज नी होदे।
19 हुन दिने, मय तुके डाटा-टेवा करतो सपाय लोग के डंड देयंदे
आउर नानागती होलो लोगमन के
रूंडा करेंदे
आउर कयद ने गेलो लोगमन के छंडायंदे।
तुचो इजित धरलो गोट गुलाय मंजपुर ने बिगरलीसे,
हुन सपाय थाने तुचो मान आउर बड़ाई चो गोट सुनायंदे।
20 हुनी समया ने, मय तुके रूंडा करुन तुचो देस् ने अमरायंदे
आउर फेर ले तुके बाड़ती कराउन
तुचो धन-दुगानी के बोहड़ाउन देयंदे,
तेबे मंजपुर चो सपाय जात-जात चो लोगमन चो मंजी
तुचो बड़ाई होयदे।”
जहोवा चो एई बचन आय।