जहोवा काजे जय-जय गीत
135
जहोवा चो जय-जय करा!जहोवा चो नाव चो जय-जय करा;
ए जहोवा चो कमेयामन, तुमी हुनचो जय-जय करा,
2 तुमी जहोवा घरे
बललोने, आमचो महापरभु चो घर-दुआरे उबा आसास।
3 जहोवा चो जय-जय करा, कसनबलले हुन नंगत आय;
हुनचो नाव चो भजन गाहा, कसनबलले हुन, मन-भावतो लाईक आय।
4 जहोवा, जाकूब के आपलो काजे बाछलोसे,
बललोने, इसराएल के आपलो निज भाग होतो काजे चुनलोसे।
5 मय जानेसे, आमचो परभु जहोवा,
सपाय देव-धामी ले बड़े आय।
6 जहोवा आपलो मन-इछा असन,
बादरी आउर मंजपुर ने,
समदूर आउर सपाय गड़िया ठानमन ने करलो।
7 हुन, मंजपुर चो कोना-कोना ले बादरी उठायसे;
बरसा काजे पानी जगायसे
आउर लेहरा के आपलो भंडार ले निकरायसे।
8 हुन, मिसर देस् चो मनुक होओ नोहले पसु,
सपाय चो पईलातमन के मोरते मारलो;†
9 ए मिसर देस्, जहोवा तुचो मंजारे
बललोने, फिरोन राजा आउर हुनचो सपाय कमेयामन चो बिरुद,
चीनामन आउर अचरित बुतामन दखालो।
10 हुन जात-जात चो लोगमन के नास करलो
आउर बलेयार राजामन के मोरते मारलो—
11 बललोने, एमोरेयामन चो राजा सीहोन,
बासान चो राजा ओग
आउर कनान चो सपाय राजामन के—
12 आउर हुनमन चो राज के
आपलो निज लोग, इसराएलिमन के बाटुन दिलो।
13 ए जहोवा, तुचो नाव अमदेया चमकट आसे,
ए जहोवा, पीड़ी-पीड़ी तुके सूरता करदे।
14 जहोवा आपलो रयत चो सत नियाव करेदे,
आउर आपलो कमेयामन के जीव-दुखेदे।
15 जात-जात चो लोगमन चो मूरतमन सोन-रूप चेई आय,
हुनमन के मनुकमन ची बनालासे।
16 हुनमन के टोंड तो आसे, मानतर गोटेयाउक नी सकोत;
हुनमन चो आंईक तो आसे, मानतर दखुक नी सकोत;
17 हुनमन के कान तो आसे, मानतर सुनुक नी सकोत,
आउर हुनमन फुंडुक बले नी सकोत।
18 जसन हुन मूरतमन आत,
उसने चे हुनमन के बनातो लोग बले आत
आउर हुनमन उपरे भोरसा करतो लोग बले उसने चे होदे।
19 ए इसराएल कुटुम चो लोग, जहोवा के धन-धन बला!
ए हारून कुटुम चो लोग, जहोवा के धन-धन बला!
20 ए लेवी कुटुम चो लोग, जहोवा के धन-धन बला!
ए जहोवा चो भगतमन, हुनके धन-धन बला!
21 सियोन ले जहोवा चो धन-धन होओ,
जोन जरूसलेम ने रयसे।
जहोवा चो जय-जय करा!