उबजास 41

जूसुफ, फिरोन चो सपनामन चो अरथ सांगतोर

दुय बरक पाछे फिरोन, नील नंदी खंडे उबा आंसे बलुन सपनलो, 2 आउर हुन नील नंदी ले सात ठन सुंदर आउर मोट-मोट गायमन निकरुन रोंडा चरुक मुरियाला। 3 हुनमन चो पाट-पाट आउर सात ठन घिन-घिना आउर सपुर-सपुर गायमन निकरुन नील नंदी खंडे दुसर गायमन लगे उबा होला। 4 ए घिन-घिना आउर सपुर गायमन, सातो सुंदर आउर ठोसर गायमन के खादला। तेबे फिरोन चेतलो। 5 हुन फेर सोवलो आउर दुसर हार सपनलो, गोटोक धान-बुटा ने सात ठन झोपा-झोपा खेड़मन निकरली। 6 तेबे हुनमन चो पाट-पाट सात ठन सपुर आउर तोपलो लेहरा ले कुमचलो खेड़मन निकरली। 7 ए सपुर खेड़मन हुन सातो मोट-मोट आउर अरन भोरलो खेड़मन के गिरला। तेबे फिरोन चेतलो आउर सपनले बलुन जानलो। 8 बियान पावतो के फिरोन मने-मने डाहाल-बिकाल होलो, एईकाजे मिसर देस् चो सपाय तारा-गनतियारमन आउर पंडितमन के हागदेउक पठालो; आउर हुनमन के आपलो सपना के सांगलो; मानतर हुनमन ले कोनी बले फिरोन चो सपना चो अरथ सांगुक नी सकला।

9 तेबे रस खोआतो मुखिया फिरोन के बललो, “आजी मोके मोचो कसूर सूरता ईली: 10 जेबे फिरोन आपलो कमेयामन बललोने, मोके आउर रंदारी मुखिया के रीस होउन राखा करुमन चो मुखिया चो जयल-घरे ढाकलो। 11 तेबे गोटकी राती, आमी दुनो दुसर-दुसर अरथ चो गोटोक-गोटोक सपना दखलु; 12 हुता आमचो संगे गोटोक इबरानी जुवान रये, हुन राखा करुमन चो मुखिया चो कमेया रये; आमी हुनके आमचो सपनामन के सांगलु, आउर हुन आमके आमचो सपना चो अरथ सांगलो। 13 हुन जसन-जसन आमके सांगु रये उसने ची होली, मोके फेर मोचो पन मिरली आउर हुन रंदारी मुखिया के उचकला।”

14 तेबे फिरोन, जूसुफ के आनतो काजे लोग पठालो; आउर हुनके झटके जयल-घर ले बाहरे निकराला। हुन तियार होउन, नंगत फटई पींदुन फिरोन चो पुरे ईलो। 15 फिरोन, जूसुफ के बललो, “मय गोटोक सपना दखलेसे आउर हुनचो अरथ कोनी सांगुक नी सकसोत; मय तुचो बारे ने सुनलेसे, तुय सपना सुनुन हुनचो अरथ सांगुआस।” 16 तेबे जूसुफ, फिरोन के बललो, “मय नाई, मानतर महापरभु ची फिरोन काजे नंगत गोट सांगुक सके।” 17 फेर फिरोन, जूसुफ के सांगलो, “मय असन सपनले, मय नील नंदी खंडे उबा रयें। 18 आउर नील नंदी ले सात ठन मोट-मोट आउर सुंदर गायमन निकरुन रोंडा चरते रओत। 19 हुनमन चो पाट-पाट सात ठन सपुर आउर घिन-घिना गायमन निकरला; गुलाय मिसर देस् ने असन घिन-घिना गायमन मय कहांय नी दखलेसे। 20 ए सपुर आउर घिन-घिना गायमन, आगे चो सात ठन मोट-मोट गायमन के खादला; 21 आउर हुन गायमन, हुन मोट-मोट गायमन के खादलासे बलुन जानुक नी होते रये, कसनबलले हुनमन आगेचेई असन सपुर रओत। तेबे मय चेतले। 22 फेर मय दुसर सपना दखले, गोटोक धान-बुटा ने सात ठन मोट-मोट अरन झोपामन निकरु रये। 23 हुनचो पाट-पाट सात ठन सपुर आउर बेर उदिया बाट चो तोपलो लेहरा ले कुमचुन सुकलो अरन झोपामन निकरली, 24 ए सपुर अरन झोपामन, हुन मोट-मोट अरन झोपामन के गिरला। मय एके तारा-गनतियारमन के सांगले, मानतर एचो अरथ कोनी सांगुक नी सकला।”

25 तेबे जूसुफ, फिरोन के बललो, “फिरोन चो ए दुनो सपनामन चो गोटकी ची अरथ आय, महापरभु जोन बुता करुक मन करेसे, हुनके फिरोन के सांगेसे। 26 हुन सात ठन मोट-मोट गायमन सात बरक आत; आउर हुन सात ठन मोट-मोट अरन झोपामन बले सात बरक आत; सपनामन गोटकी ची आय। 27 फेर हुनमन चो पाट-पाट जोन सात ठन सपुर आउर घिन-घिना गायमन निकरला, आउर जोन सात ठन सपुर आउर बेर उदिया बाट चो तोपलो लेहरा ले कुमचुन सुकलो अरन झोपामन निकरला, हुनमन भूक-पड़ा चो सात बरक आत। 28 मय जसन फिरोन के सांगले उसनेचे महापरभु जोन बुता करुक मन करेसे, हुनके फिरोन के दखालोसे। 29 दख, गुलाय मिसर देस् ने सात बरक होओतले खुबे उबज होयदे। 30 हुनचो पाछे चो सात बरक भूक पड़ेदे, ए भूक-पड़ा ले मिसर चो सपाय लोग खुबे होलो उबज के भूलकदे, आउर भूक-पड़ा ले देस् सत्यानास होउन जायदे। 31 ए देस् चो लोगमन आगे चो खुबे उबज के भूलकदे, कसनबलले बड़े भारी भूक-पड़ा होयदे। 32 फिरोन, जोन सपना दुय हार दखलो, हुनचो भेद एई आय, महापरभु ए गोट के पक्‍का करलोसे, आउर हुनके झटके पुरा करेदे ची। 33 एईकाजे एदांय फिरोन, कोनी समजदार आउर बुद बीता के डगराउन हुनके मिसर देस् चो राजपाल बनाओ। 34 फिरोन, आपलो देस् काजे मुखियामन बाचो, आउर नंगत सात बरक सरतले मिसर देस् चो उबज चो पांचवां बाटा धरो। 35 आउर ए नंगत बरकमन ने सपाय बरन चो खातो जिनीसमन रूंडाओ, आउर फिरोन चो हक ने रलो सहरमन ने खातो काजे अरन चो गदेयामन बनाउन हुनचो राखा करो। 36 आउर ए खातो जिनीसमन के मिसर देस् ने सात बरक चो भूक-पड़ा समया काजे संगाउन रओ, जेचोले भूक-पड़ा ले देस् चो सत्यानास नी होओ।”

जूसुफ के मिसर देस् चो राजपाल बनातोर

37 ए गोट फिरोन आउर हुनचो सपाय कमेयामन के नंगत लागली। 38 एईकाजे फिरोन आपलो कमेयामन के बललो, “काय आमके असन मनुक मिरुक सके, जेचो भीतरे महापरभु चो आत्‍मा रयसे?” 39 फेर फिरोन, जूसुफ के बललो, “महापरभु तुके इतलो गियान दिलोसे कि तुचो कटार समजदार आउर बुद बीता कोनी नीआत; 40 एईकाजे तुय मोचो घर चो मुखिया होसे आउर मोचो सपाय रयत तुचो हुकुम हिसाब ने चलदे, मय राजा आय गुने एकलाय तुचो ले बड़े रयंदे।” 41 फेर फिरोन, जूसुफ के बललो, “सुन, मय तुके गुलाय मिसर देस् चो राजपाल बनायंसे।” 42 तेबे फिरोन आपलो हाथ चो मूंदी^* निकराउन जूसुफ चो हाथे पींदालो; आउर हुनके सुंदर मकमल फटई आउर सोन चो माला पींदालो। 43 हुनके आपलो दुसर रथ ने चेगालो; आउर लोग हुनचो पुरे-पुरे असन सांगते गेला, “हुनचो पुरे मांडिखुटा टेकुन डंडासरन करा,” असन बरन ले हुन, हुनके गुलाय मिसर देस् चो राजपाल बनालो। 44 फेर फिरोन, जूसुफ के बललो, “फिरोन तो मय आंय, मानतर गुलाय मिसर देस् ने तुचो हुकुम नोहलोर कोनी खस-मसुक नी सकोत।” 45 फिरोन, जूसुफ चो नाव सापनत-पानेह संगालो; आउर ओन सहर चो पुजारी पोतीपेरा चो बेटी आसनत संगे हुनचो बिया करुन दिलो। तेबे जूसुफ राजपाल बनुन गुलाय मिसर देस् ने बुलुक मुरियालो।

46 जूसुफ तीस बरक चो रलो बेरा मिसरी राजा फिरोन चो सेवा करुक मुरियालो। आउर फिरोन चो पुरे ले निकरुन जूसुफ गुलाय मिसर देस् ने बुलुक मुरियालो। 47 नंगत सात बरक पुरोतले खुबे अरन उबजली। 48 जूसुफ हुन सात बरकमन ने जोन बले खातो तीजमन मिसर देस् ने होते रये, हुनमन के सहरमन ने रूंडाते रये, आउर सपाय सहर चो बेड़ामन चो खातो तीजमन के हुनी सहरमन ने रूंडाते गेलो। 49 जूसुफ समूंद चो बारु इतलो खुबे अरन रूंडालो, अरन इतलो होली कि हुनके नापुक छांडलो; कसनबलले हुन नापुक नी सकतो इतलो रये।

50 भूक-पड़ा चो पईल बरक मुर होतो ले आगे, जूसुफ आउर ओन चो पुजारी पोतीपेरा चो बेटी आसनत ले दुयझन बेटामन जनमला। 51 जूसुफ आपलो बड़े बेटा चो नाव असन बिचारुन मनसे^* संगालो कि महापरभु मोचो सपाय दुख-तकलीस आउर कुटुम के मोचो ले भूलकालो। 52 आउर दुसर चो नाव असन बिचारुन एपरेम^* संगालो, कि दुख पावतो देस् ने महापरभु मोचो बाड़ती करालो।

53 मिसर देस् ने नंगत उबज चो सात बरक सरली। 54 जूसुफ चो सांगलो हिसाब ले सपाय देस् ने सात बरक चो भूक-पड़ा मुरियाली; मानतर गुलाय मिसर देस् ने अरन रली। 55 जेबे मिसर देस् चो सपाय लोग भूके मोरुक मुरियाला; आउर फिरोन चो रयत हुनचो लगे जाउन किरकिरुन-किरकिरुन अरन मांगुक मुरियाला: तेबे फिरोन, सपाय मिसरीमन के बलते रये, “जूसुफ लगे जाहा आउर हुन जोन बले तुमके सांगेदे उसने करा।” 56 जेबे गुलाय मिसर देस् ने भूक-पड़ुक मुरियाली, तेबे जूसुफ सपाय गदेयामन के उगाड़ुन-उगाड़ुन मिसरीमन चो हाथे अरन बिकुक मुरियालो। 57 एईकाजे गुलाय मंजपुर चो लोग अरन घेनतो काजे जूसुफ लगे मिसर देस् ने एउक मुरियाला, कसनबलले गुलाय मंजपुर ने बड़े भारी भूक पड़ु रली।