कयदीमन चो सपनामन चो अरथ सांगतोर
40
ए गोटमन चो पाछे, मिसरी राजा फिरोन के रस खुआतो मुखिया आउर रंदारी मुखिया आपलो मालिक फिरोन के रीस चेगाला। 2 तेबे फिरोन आपलो रस खुआतो मुखिया आउर रंदारी मुखिया के 3 राखा करुमन चो मुखिया चो हुनी जयल घरे ढकालो, जोन थाने राजा चो कयदीमन आउर जूसुफ के ढाकु रओत। 4 तेबे राखा करुमन चो मुखिया हुनमन के जूसुफ चो हाथे सोपलो आउर हुन, हुनमन चो दखा-राखा करलो; हुनमन खिंडिक दिन जयल-घरे रला। 5 मिसरी राजा के रस खुआतो मुखिया आउर रंदारी मुखिया जयल-घरे रलो बेरा, गोटोक राती दुनो दुसर-दुसर अरथ चो गोटोक-गोटोक सपना दखला। 6 बियान पावतो के जूसुफ हुनमन लगे गेलो आउर दखलो कि हुनमन मुरमुरा होलासोत। 7 एईकाजे हुन, आपलो संगे जयल-घरे रलो फिरोन थानो मुखियामन के पूछलो, “आजी काय काजे तुमचो थमना उतरलीसे?” 8 हुनमन हुनके बलला, “आमी दुनो सपना दखलु, आउर हुनचो अरथ सांगतो लोग कोनी नीआत।” जूसुफ हुनमन के बललो, “काय, सपनामन चो अरथ सांगतोर महापरभु चो बुता नोआय? मोके आपलाहान सपनामन सांगा।”9 तेबे रस खुआतो मुखिया, जूसुफ के आपलो सपना सांगुक मुरियालो; “मय सपनले, मोचो पुरे गोटोक अंगुर-डीरा आसे; 10 हुन अंगुर-डीरा ने तीन ठन ढेटीमन रये; हुता फूल फुटली आउर फर धरुन पाकली। 11 फिरोन चो बटका मोचो हाथे रये; मय हुन अंगुरमन के फिरोन चो बटका ने पेरले, आउर बटका के फिरोन चो हाथे दिले।” 12 तेबे जूसुफ हुनके बललो, “एचो अरथ ए आय: तीन ठन ढेटीमन चो अरथ तीन दिन आय; 13 एईकाजे एदांय ले तीन दिन भीतरे फिरोन तुचो मान बड़ायदे, आउर फेर ले तुके तुचो पन देयदे, तुय आगे चो असन हुनके रस खुआतो मुखिया होसे, आउर हुनचो हाथे हुनचो बटका फेर देसे। 14 एईकाजे तुचो भलई होलो बेरा तुय मोके सूरता कर, आउर मोचो उपरे दया करुन मोचो बारे ने फिरोन संगे गोटेयाव आउर मोके ए जयल-घर ले छंडाव। 15 कसनबलले सते, मोके इबरानीमन चो देस् ले चोरुन आनलासे, आउर एता बले मोके जयल-घरे ढाकतो असन काई बुता नी करलेसे।”
16 रंदारी मुखिया दखलो कि रस खुआतो मुखिया काजे हुनचो सपना चो नंगत अरथ निकरली, तेबे हुन बले जूसुफ के बललो, “मय बले सपनले, मोचो मुंडे रोटी चो तीन ठन टुकनामन आसे; 17 उपर चो टुकना ने फिरोन काजे सपाय बरन चो रांदलो तीजमन आसे; आउर चड़ईमन मोचो मुंड चो टुकना ले हुन तीजमन के खायसोत।” 18 जूसुफ बललो, “एचो अरथ असन आय: तीन ठन टुकनामन चो अरथ तीन दिन आय। 19 एदांय ले तीन दिन भीतरे फिरोन तुचो मुंड के काटुन तुके गोटोक रूके ओराउन देयदे, आउर चड़ईमन तुचो मास के तितड़ुन-तितड़ुन खादे।”
20 तीसर दिने फिरोन चो जनम दिन रली, हुन दिने हुन आपलो सपाय कमेयामन के भोज दिलो, आउर रस खुआतो मुखिया आउर रंदारी मुखिया के जयल-घर ले निकराउक बललो। 21 रस खुआतो मुखिया के तो हुनचो पन फेर ले दिलो, आउर हुन फिरोन चो हाथे अंगुर रस चो बटका दिलो। 22 मानतर जसन जूसुफ, रंदारी मुखिया के सपना चो अरथ सांगु रये, उसने हुनके रूके ओराला। 23 तेबले बले रस खुआतो मुखिया, जूसुफ के सूरता नी करलो; मानतर हुनके भूलकलो।