जूसुफ आउर पोतीपर चो बायले
39
जिदलदांय इसमाएलिमन, जूसुफ के मिसर देस् ने अमराला, तेबे फिरोन चो राजपाल आउर राखा करुमन चो मुखिया, मिसरी पोतीपर हुनके हुनमन चो हाथ ले घेनलो। 2 जूसुफ आपलो मिसरी मालिक चो घरे रते रये, आउर जहोवा हुनचो संगे-संगे रये, एईकाजे हुन भाइगमानी होलो। 3 जूसुफ चो मालिक जानलो कि जहोवा हुनचो संगे रयसे, आउर हुनचो सपाय बुता ने जहोवा हुनचो साहरा करेसे। 4 तेबे पोतीपर हुनचो ले हरिक होलो, आउर हुनके आपलो सेवा-सुस्तारा करतो काजे बाछलो। हुन, हुनके आपलो घर चो सपाय तीज चो मुखिया बनाउन आपलो सपाय के हुनचो हाथे सोपलो। 5 हुन मिसरी मालिक, जूसुफ के आपलो घर आउर आपलो सपाय धन-माल चो मुखिया बनालो। जूसुफ चो किरता जहोवा हुन मिसरी चो घर के बर दिलो। घर होवो नोहले बेड़ा, जोन बले हुनचो आय, सपाय के जहोवा बर दिलो। 6 पोतीपर आपलो सपाय के जूसुफ चो हाथे छांडुन दिलो; हुन आपलो खातो रोटी के छांडुन आपलो धन-माल चो बारे ने काई नी जानते रये। जूसुफ, खुबे सुंदर आउर उंचा-पुरा रये।7 खिंडिक दिन पाछे, पोतीपर चो बायले जूसुफ के अडरा उआट ले मोहातो काजे बलली, “मोचो संगे सो।” 8 मानतर जूसुफ, आपलो मालिक चो बायले के, नाई बलुन बललो, “सुन, ए घर चो सपाय मोचो हाथे आसे, हुनचो बारे ने मोचो मालिक काई ची नी जाने, आउर हुन आपलो सपाय तीज के मोचो हाथे सोपलोसे। 9 ए घरे मोचो ले बड़े कोनी नीआत, तुय हुनचो बायले आस, एईकाजे तुके छांडुन सपाय के मोचो हक ने दिलोसे; तेबे फेर काय काजे असन बड़े अडरा बुता करुन मय महापरभु चो नंजर ने पापी बनुआंय?” 10 हुन रोजे जूसुफ के आपलो संगे रतो आउर सोवतो काजे बलते रये, मानतर जूसुफ हुनके नाई बलते रये। 11 गोटोक दिने असन होली, जूसुफ आपलो बुता करतो काजे घरे ओललो, हुदलदांय कोनी कमेयामन घरे नी रओत। 12 तेबे हुन बायले हुनचो फटई के धरुन बलली, “मोचो संगे सो” मानतर हुन आपलो फटई के हुनचो हाथे छांडुन बाहरे परालो। 13 आपलो हाथे हुनचो फटई के छांडुन बाहरे परातो के दखुन 14 हुन बायले आपलो घर चो कमेयामन के हागदेउन बलली, “दखा, हुन इबरानी मनुक के आमचो मालिक, आमचो इजित धरतो काजे एता आनलोसे। हुन मोचो संगे सोवतो काजे भीतरे एउ रलो, मानतर मय जोर ले चिचियाले गुने 15 हुन आपलो फटई मोचो लगे छांडुन बाहरे परालो।” 16 हुन बायले हुनचो फटई के आपलो मनुक घरे बोहड़ुन एओतले आपलो लगे संगाउन रली। 17 तेबे हुन आपलो मनुक के असन बलुन लड़ाली, “जोन इबरानी कमेया के तुय एता आनलिसीस, हुन मोचो इजित धरतो काजे मोचो लगे एउ रये; 18 मानतर मय जोर ले चिचियालोके आपलो फटई के मोचो लगे छांडुन बाहरे परालो।”
19 तुचो कमेया मोचो संगे असन-असन करलो बलुन आपलो बायले ले सुनतो के जूसुफ चो मालिक खुबे रीस होलो। 20 हुन, जूसुफ के धरुन राजा चो कयदीमन रलो जयल घरे ढकालो; आउर जूसुफ, हुनी जयल-घरे रलो। 21 मानतर जहोवा, जूसुफ संगे-संगे रउन, हुनके सत-मया करलो गुने जयल-घर चो मुखिया हुनचोले हरिक होलो। 22 एईकाजे जयल-घर चो मुखिया, जूसुफ के सपाय कयदीमन चो मुखिया बनालो; हुता जोन बले बुता होते रये जूसुफ चो हुकुम ले होते रये। 23 जूसुफ चो हक ने जोन बले रये, हुनचो बारे ने जयल घर चो मुखिया के काई फिकिर करुक नी पड़ते रये; कसनबलले जहोवा, जूसुफ संगे रये, आउर हुन काई बले करले जहोवा हुनके पुरा करतो बर देते रये।