जहूदा आउर तामार
38
हुनी दिनमन ने जहूदा आपलो भाईमन के छांडुन अदुलामेया हीरा नाव चो माने संगे डेरा धरलो। 2 जहूदा हुता सूआ नाव चो कनानी मनुक चो बेटी के दखलो आउर हुनके बिया होउन हुनचो संगे सोवलो। 3 तेबे हुन पेटेहारिन होली आउर गोटोक बेटा के छर-फर होली; जहूदा हुनचो नाव एर संगालो। 4 हुन फेर पेटेहारिन होली आउर गोटोक बेटा के छर-फर होली, हुनचो नाव ओनान संगाला। 5 फेर हुनचो आउर गोटोक बेटा जनमलो, हुनचो नाव सेला संगाला; एचो जनम होलो बेरा जहूदा कजीब ने रते रये। 6 जहूदा आपलो बड़े बेटा एर चो बिया तामार नाव चो गोटोक लेकी संगे करलो। 7 मानतर जहूदा चो बड़े बेटा एर, जहोवा चो नंजर ने खुबे दुसट रये, एईकाजे जहोवा हुनचो जीव धरलो। 8 तेबे जहूदा, ओनान के बललो, “आपलो बोउ के राकुन तुचो भाई काजे बेटा-बेटीमन जनमाव।” 9 ओनान जानते रये बेटा-बेटीमन हुनचो नी होदे, एईकाजे जेबे बले हुन आपलो बोउ संगे सोवलो, तेबे आपलो जीर के भुंये घसरालो कि आपलो भाई चो थर नी होओ। 10 हुन असन करलो के जहोवा खुबे रीस होलो आउर हुनचो बले जीव धरलो। 11 तेबे जहूदा, सेला बले आपलो भाईमन असन मोरेदे बलुन डरलो आउर आपलो बुआरी तामार के बललो, “मोचो बेटा सेला जुवान होओतले तुय आपलो बुआ घरे रांडी होउन रा।” एईकाजे तामार आपलो बुआ घरे जाउन रउक मुरियाली।12 खुबे दिन पाछे जहूदा चो बायले, सूआ चो बेटी मोरी होली; फेर हुनचो नाहनी सरलोके जहूदा, आपलो मीत अदुलामेया हीरा संगे आपलो मेंडा-मेंडीमन चो रोंआ खुरातो बीतामन लगे तिमनाथ सहर गेलो। 13 जेबे तामार के ए खबर मिरली, “तुचो सतरा आपलो मेंडा-मेंडीमन चो रुआं खुरातो काजे तिमनाथ बाटे जायसे।” 14 तेबे हुन असन बिचारली, सेला जुवान होलो। मानतर मय हुनचो बायले होउक नी सकले; एईकाजे हुन आपलो रांडी फटई के हिटाली, आउर मुंड-ढेकी देउन आपने के ढाकी होली आउर एनेम सहर लगे तिमनाथ जातो बाटे बसली। 15 जहूदा हुनके दखलो आउर हुनके बेसवा समजलो, कसनबलले हुन आपलो थमना ढाकी होउ रये। 16 जहूदा आपलो जातो बाट ले हुनचो लगे गेलो, आउर हुनके बललो, “मोके तुचो संगे सोउक देस,” कसनबलले जहूदा नी जानते रये हुन, हुनचो बुआरी आय। हुन बलली, “मय तुके मोचो संगे सोउक दिलोने तुय मोके काय देउआस?” 17 हुन बललो, “मय आपलो छेरी-मेंडीमन ले गोटोक बोकड़ी चो पिला तुचो थाने पठाउन देयंदे।” तेबे हुन बलली, “हुनके पठाओतले काय तुय काई बले मोके पलटा देउन रउक सकीस?” 18 हुन पूछलो, “मय तुचो लगे काय के पलटा देउ रउआंय बे?” हुन बलली, “तुचो मूंदी, तुचो बांहटा आउर तुचो हाथ चो बड़गी मोके देउन रा।” तेबे जहूदा हुनके, हुन तीजमन देउन दिलो, आउर हुनचो संगे सोवलो आउर हुन पेटे ठेबली। 19 तेबे हुन उठुन घरे गेली, आउर मुंड-ढेकी के गुचाउन फेर आपलो रांडी फटई पींदली।
20 तेबे जहूदा, हुन बायले थान ले पलटा दिलो तीजमन के छंडाउन आनतो काजे, बोकड़ी चो पिला के अदुलामेया मीत चो हाथे पठालो, मानतर हुन हुनके नी भेटलो। 21 तेबे हुन हुता चो लोगमन के पूछलो, “एनेम चो बाट ने गोटोक बेसवा बसुन रते रये, हुन कहां आसे?” हुनमन बलला, “एता कोनी बेसवा नीआत।” 22 एईकाजे हुन बोहड़ुन एउन जहूदा के बललो, “मय हुनके नी भेटले, आउर हुता चो लोगमन बलला, ‘एता कोनी बेसवा नीआत’।” 23 जहूदा बललो, “उसन आय जाले, हुन तीजमन के हुनचेई लगे रउक देस, नोहले आमके हिनस्ता समजदे; दख, मय तो बोकड़ी चो पिला पठाउन देउ रले, मानतर हुन बायले तुके नी मिरली।”
24 तीनक मयना पाछे जहूदा के खबर मिरली, “तुचो बुआरी तामार बेबिचार करली आउर बेबिचार बाटले पेटे ठेबलीसे।” तेबे जहूदा बललो, “हुनके डसातो काजे बाहरे आना।” 25 हुनके बाहरे निकरातो बेरा आपलो सतरा लगे असन खबर पठाली, “ए तीजमन जेचो आय, मय हुनचेई बाटले पेटे ठेबलेसे,” फेर हुन असन बलुक बलली, “चिताउन दख, ए मूंदी, बांहटा आउर बड़गी कोचो आय?” 26 जहूदा हुन तीजमन के चिताउन बललो, “ हुन मोचोले आगर धारनिक आय; कसनबलले मय, मोचो बेटा सेला के हुनचो संगे बिया नी करुन दिले।” आउर जहूदा हुनचो संगे फेर केबई नी सोवलो। 27 तामार चो छर-फर होतो बेरा जान पड़ली कि हुनचो पेटे जांवर-जिया पिलामन आसोत। 28 हुनचो छर-फर होतोदांय गोटोक लेका-पिला चो हाथ बाहरे निकरली। तेबे सूईन, ए आगे जनमलो बलून हुनचो हाथे लाल सूत बांदली, 29 मानतर हुन आपलो हाथ के भीतरे झिकलो, आउर हुनचो भाई जनमलो, तेबे सूईन हुनके बलली, “तुय कसन ने आगे जनमलीस?” एईकाजे हुनचो नाव पेरेस* संगाला। 30 हुनचो पाट-पाट लाल सूत बांदलोर हुनचो भाई जनमलो, हुनचो नाव जेरह* संगाला।