जूसुफ आउर हुनचो भाईमन
37
जाकूब, कनान देस् ने रते रलो, जोन थाने हुनचो बुआ इसहाक परदेसिया होउन रलो। 2 जाकूब चो बेटामन चो कहनी ए आय:जूसुफ सतरा बरक चो रये आउर आपलो भाईमन संगे छेरी-मेंडी चराते रये; हुन, आपलो बुआ चो राकलो बायलेमन बिलहा आउर जिलपा चो बेटामन संगे रते रये आउर हुनमन चो अडरा-बुतामन के जूसुफ आपलो बुआ के सांगते रये। 3 इसराएल, आपलो सबु बेटामन ले आगर जूसुफ के मया करते रये, कसनबलले हुन, हुनचो डोकरा बेरा चो बेटा रये; आउर हुन, जूसुफ काजे गोटोक मल-मल कुड़ता बनाउन देउ रये। 4 मानतर जेबे हुनचो भाईमन जानला, आमी सपाय भाईमन ले आगर आमचो बुआ जूसुफ के मया करेसे, तेबे हुनमन, जूसुफ के कुचर होला आउर हुनके नंगत ले गोटेयाते बले नी रला।
5 गोटोक दिने जूसुफ सपनलो आउर आपलो भाईमन के सांगलो। तेबे हुनमन हुनके आउर आगर बईर करला। 6 जूसुफ हुनमन के बललो, “मोचो सपनलो गोट के सुना: 7 आमीमन बेड़ा ने भारा-बांदते रउं आउर उधापड़े मोचो भारा उठुन उबा होली: तेबे तुमचो भारामन मोचो भारा के भोंवरक होउन डंडासरन करला।” 8 हुनचो भाईमन हुनके बलला, “काय, तुय सते आमचो उपरे राज करसे? काय, तुय सते आमचो उपरे हक संगासे?” हुन आपलो सपना चो गोटमन सांगलो किरता हुनमन हुनके आउर जुगे बईर करला। 9 हुन फेर गोटोक सपना दखलो आउर आपलो भाईमन के सांगलो, “दखा, मय फेर गोटोक सपना दखले: बेर-जोन आउर गियारा ठन तारामन मोके डंडासरन करसोत।” 10 ए सपना के हुन, आपलो बुआ आउर आपलो भाईमन के सांगलो, तेबे हुनचो बुआ हुनके दागा देउन बललो, “तुय असन सपना कसन दखलीस? मय आउर तुचो आया आउर तुचो सपाय भाईमन काय सते, तुके डंडासरन करुंदे?” 11 हुनचो भाईमन हुनके कुचर होते रओत, मानतर हुनचो बुआ हुनचो गोट के सूरता करते रलो।
जूसुफ के बिकतोर
12 जूसुफ चो भाईमन आपलो बुआ चो छेरी-मेंडीमन के सकेम भाटा ने चराउक नीला। 13 तेबे इसराएल*, जूसुफ के बललो, “तुचो भाईमन सकेम ने ची छेरी-मेंडीमन चरायसोत। एबे तुय आव, मय तुके हुनमन लगे पटायंसे।” हुन बललो, “हव, मय जायंदे।” 14 इसराएल बललो, “जा आपलो भाईमन के आउर छेरी-मेंडीमन के दख, हुनमन नंगत आसोत कि नाई आउर एउन मोके सांग।” हुन, जूसुफ के हेबरोन घाटी लगे बिदा करुन दिलो, तेबे जूसुफ सकेम ने गेलो। 15 हुनके ए बाटे-हुन बाटे बुलतो के दखुन गोटोक माने हुनके पूछलो, “तुय काय डगरायसीस?” 16 हुन बललो, “मोचो भाईमन ए बाटे छेरी-मेंडी चराउक ईलासोत, मय हुनमन के डगरायंसे, काय, तुय हुनमन के दखलीस ता?” 17 हुन माने बललो, “हुनमन एता नीआत, मानतर हुनमन असन बलतोके मय सुनलेसे, ‘जो, आमी दोतान ने जावां’।” तेबे जूसुफ आपलो भाईमन के डगराते दोतान बाटे गेलो आउर हुनमन के दोतान ने दखलो। 18 हुनमन आपलो भाई के लापी ले एतोके दखला, आउर आपलो लगे अमरतोले आगे हुनके मोरते मारतो उआट करला 19 आउर गोटोक-दुसर के बलला, “दखा, सपना दखु बीता एयसे, 20 इआ, आमी एके मोरते मारुन गड़िया चुंआ ने पकाउं आउर असन बलवां, हुनके कोनी बाग-भालु खादला होती। तेबे एचो सपना कसन ने पुरा होयदे जाले, दखवां।” 21 रूबेन एके सुनुन जूसुफ के हुनमन चो हाथ ले बचातो काजे बललो, “नाई, आमी हुनचो जीव नी धरुं।” 22 रूबेन फेर बललो, “मोरते नी मारा, हुनके ए छीड़ा ठाने चुंआ ने पकाउन दियास, हुनके नी मारा”__ रूबेन हुनके हुनमन चो हाथ ले बचाउन बुआ लगे अमरातो बिचार ने रये। 23 एईकाजे जूसुफ हुनमन लगे अमरलोके, हुनमन हुनचो पींदलो बाना-बाना बिती मल-मल फटई के हिटाला 24 आउर जूसुफ के धरुन चुंआ ने पकाला। हुन चुंआ ने काई नी रये आउर पानी बले आटु रये।
25 जिदलदांय हुनमन खाउक बसला, हुन बाटले इसमाएलिमन चो गोटोक गोहड़ा के गिलाद ले एतोके दखला। हुनमन ऊंटमन ने बासतेल, बलसान आउर धूप के लतुन मिसर देस् जाते रओत। 26 तेबे जहूदा आपलो भाईमन के बललो, “आपलो भाई के मोरते मारुन हुनके लुकालोने आमके काय नफा होयदे? 27 एईकाजे, इआ! आमी हुनके इसमाएलिमन चो हाथे बिकुं आउर हुनचो जीव नी धरुं। कसनबलले हुन आमचो भाई आउर आमचेई हाड़ा-मास चो आय।” ए गोट के हुनचो भाईमन मानला। 28 जेबे हुन लगे मिदयानी बेपारीमन बललोने, इसमाएलिमन अमरला, तेबे हुनमन चुंआ ले जूसुफ के निकराउन रूपा चो बीस सिक्कामन काजे इसमाएलिमन चो हाथे बीकला। हुनमन जूसुफ के मिसर देस् ने नीला।
29 जेबे रूबेन बोहड़ुन एउन हुन चुंआ ने दखलो कि जूसुफ हुता नीआय। तेबे मुरमुरा होउन आपलो फटई के चीरलो। 30 हुन आपलो भाईमन लगे बोहड़ुन एउन बललो, “लेका हुता नीआय, एबे मय हुनके कहां मिराउआंय बे?” 31 तेबे हुनमन गोटोक बोकड़ी के मारुन हुनचो लोउ ने जूसुफ चो मल-मल फटई के चोबड़ला; 32 हुनमन जूसुफ चो बाना-बाना बिती मल-मल फटई के बुआ लगे असन बलुन पठाला, “आमके ए मिरलीसे; तुय एके चिताउन दख, काय, ए तुचो बेटा चो तो नोआय?” 33 तेबे जाकूब हुनके चितालो आउर बललो, “हव, ए तो मोचेई बेटा चो फटई आय; कोनी रान-जियाद हुनके धरुन खादली होती; पक्का, जूसुफ के घिरलाउन-घिरलाउन खादली होती।” 34 तेबे जाकूब आपलो फटई के चीरलो आउर टाट* ओड़ुन आपलो बेटा जूसुफ काजे खुबे दिन ले खिसियाते रये। 35 जाकूब चो सपाय बेटा-बेटीमन हुनके भोरेयाउन दखला; मानतर हुन मुरे ओगाय नी होलो आउर बललो, “नाई! मय असनेची गागते-गागते आपलो बेटा लगे पतालपुरे जायंदे।” असन बरन ले जूसुफ चो बुआ हुनचो काजे खुबे करलाउन-करलाउन गागते रये। 36 हुनी समया ने, मिदयानीमन जूसुफ के मिसर देस् ने नेउन पोतीपर चो हाथे बिकला, जोन फिरोन राजा चो राजपाल आउर राखा करुमन चो मुखिया रये।