जाकूब के बेतेल ने बर मिरतोर
35
तेबे महापरभु, जाकूब के बललो, “तुय एताले निकरुन बेतेल ने जा आउर हुताय डेरा पड़। तुचो भाई एसाव चो डर काजे परातो बेरा तुके दरसन दिलो महापरभु काजे हुता गोटोक बेदी बनाव।” 2 तेबे जाकूब आपलो कुटुम-लोग आउर आपलो संगे रलो सपाय लोग के बललो, “तुमचो थानो देव-धामी मूरतमन के पकाहा आउर आपने के सुद करुन छुकनाय फटईमन पींदा; 3 इआ, आमी एताले निकरुन बेतेल ने जो; हुता मय, महापरभु काजे गोटोक बेदी बनायंदे। हुन मोके बिपती बेरा साका होलो आउर जोन बाटे बले मय गेले, हुन मोचो संगे रलो।” 4 एईकाजे हुनमन आपलो लगे रलो सपाय देव-धामी मूरतमन आउर कानमन ने पींदलो बारी-तडकीमन के जाकूब के दिला आउर जाकूब हुनमन के सकेम सहर लगे चो बांज रूक खाले गाड़ुन दिलो।5 जेबे हुनमन सकेम सहर ले निकरला, तेबे हुनमन चो भोंवरक रलो सहरमन चो लोगमन चो मने, महापरभु चो डर चेपाली। एईकाजे हुनमन ले कोनी बले जाकूब चो बेटामन चो पाट-पाट नी गेला। 6 जाकूब आपलो संगे रलो सपाय लोग संगे, कनान राज चो लूज सहर ने ईलो, जेके बेतेल बले बलुआत। 7 हुता हुन, महापरभु काजे गोटोक बेदी बनालो आउर हुन ठान चो नाव एल-बेतेल संगालो, कसनबलले जाकूब आपलो भाई चो डर काजे परातो बेरा महापरभु हुनके हुताय दरसन देउन रलो। 8 रिबका चो कमेयीन दबोरा हुता मोरुन गेली आउर हुनके बेतेल चो बांज रूक खाले माटी दिला। एईकाजे हुन बांज-रूक चो नाव अलोन-बकूत* संगाला।
9 जाकूब, पदन-अराम ले ईलो पाछे, महापरभु हुनके दुसर हार दरसन देउन बर दिलो 10 आउर बललो “एबतले तुचो नाव जाकूब रली। एदांय ले तुचो नाव जाकूब नाई, मानतर इसराएल रयदे।” असन बरन ले महापरभु, हुनचो नाव इसराएल संगालो। 11 फेर महापरभु हुनके बललो, “मय सबुले सकत महापरभु आंय। तुय पोहलार होउन लेउर बाड़; तुचो ले गोटोक जात आउर जात-जात चो लोगमन उबजदे आउर तुचो थर ने राजामन जनमदे। 12 मय, अबराहम आउर इसहाक के दिलो देस् तुके देयंसे। तुचो पाछे तुचो थर-लर के बले देयंदे।” 13 तेबे महापरभु, जाकूब के गोटेयालो ठान ले ची उपरे चेगलो। 14 महापरभु, हुनके गोटेयालो ठाने जाकूब सूरता काजे गोटोक पकना के खमा गाड़लो आउर हुता अंगुर रस आउर जयतून तेल रिकाउन भेंट चेगालो। 15 महापरभु, जाकूब के गोटेयालो ठान के जाकूब, बेतेल नाव संगालो।
राहेल मोरतोर
16 फेर हुनमन बेतेल ले निकरुन एफराता अमरा-अमरी होतो बेरा राहेल के छर-फर होतो दुखा उठली। 17 खुबे दुखा उठतो के सूईन बलली, “नी डर, एदांय बले तुके बेटा चे होयदे।” 18 असने होउन-होउन हुन मोरुन गेली। हुन मोरतो ले आगे आपलो बेटा चो नाव बेनोनी* संगाली: मानतर पिला चो बुआ जाकूब, हुनचो नाव बिनयामीन* संगालो। 19 राहेल मोरलो पाछे हुनके एफराता* जातो बाट ने माटी दिला (एके बेतलहम बले बलुआत)। 20 जाकूब हुनचो मोठ उपरे गोटोक खमा गाड़लो; राहेल चो मोठ ने गाड़लो हुन खमा आजी बले आसे। 21 फेर इसराएल* हुता ले निकरलो आउर एदेर नाव चो गुमट चो हुन पाट आपलो तमु गाड़लो।
जाकूब चो बेटामन
22 इसराएल* हुन देस् ने बसापत करलो बेरा, रूबेन आपलो बुआ चो राकलो बायले बिलहा संगे सोवलो आउर ए गोट के इसराएल जानलो।
जाकूब के बारा-झन बेटामन होला। 23 हुनमन ले लिआ चो बेटामन बललोने, जाकूब चो पईलात बेटा रूबेन, हुनचो पाट चो सिमोन, लेवी, जहूदा, इसाकार आउर जबूलून होला। 24 आउर राहेल ले जूसुफ आउर बिनयामीन होला। 25 आउर राहेल चो कमेयीन बिलहा चो बेटामन दान आउर नपताली आत। 26 लिआ चो कमेयीन जिलपा चो बेटामन गाद आउर आसेर आत। पदन-अराम ने जनमलो जाकूब चो बेटामन एईमन आत।
इसहाक मोरतोर