दीना संगे बेबिचार
34
दीना, जाकूब आउर लिआ चो बेटी रली। गोटोक दिने दीना, हुन देस् चो लेकीमन के भेट होतो काजे गेली। 2 हिवी हमोर हुन देस् चो मुखिया रये, हुनचो बेटा सकेम, दीना के दखलो आउर हुनके धरुन हुनचो संगे बेरपेला बेबिचार करलो। 3 हुन, जाकूब चो बेटी दीना के मन करलो आउर हुन लेकी ले मया चो गोट गोटेयालो। 4 सकेम आपलो बुआ हमोर के बललो, “मोके ए लेकी संगे बिया करुन देस।” 5 जाकूब सुनलो कि सकेम हुनचो बेटी दीना संगे बेबिचार करुन असुद करलो; मानतर हुनचो बेटामन, पसुमन संगे भाटा ने रओत, एईकाजे हुनमन एओतले जाकूब ओगाय रलो। 6 सकेम चो बुआ हमोर, जाकूब संगे गोटेयातो काजे हुनचो लगे गेलो। 7 ए गोट सुनते खन जाकूब चो बेटामन चरातो भाटा ले खुबे मुरमुरा आउर रीस होउन ईला; कसनबलले सकेम, जाकूब चो बेटी संगे बेबिचार करुन इसराएल कुटुम चो इजित धरलो, जेके नी करतोर रली। 8 हमोर हुनमन के बललो, “मोचो बेटा सकेम, तुमचो बेटी दीना के खुबे मन करलोसे, एईकाजे हुनके हुनचो संगे बिया कराउन दियास। 9 आउर आमी गोटोक-दुसर थान ले बेटी दिया-देई होउं; तुमी आपलो बेटीमन आमके दियास, आउर आमचो बेटीमन के तुमी निया। 10 तुमी आमचो संगे एई राज ने बसापत करा; ए देस् तुमचो पुरे आसे, एता राहा, बेपार करा आउर आपलाहान काजे भुंय-बाड़ी धरा।” 11 सकेम बले दीना चो बुआ आउर भाईमन के बललो, “तुमी मोचोले हरिक आसास जाले जोन बले तुमी मोके मांगासे, मय तुमके देयंदे। 12 तुमी मोके कितलेही मोल बीती पलटा मांगले बले मय तुमचो मांगलो हिसाब ने देयंदे; मानतर हुन लेकी के मोचो संगे बिया कराउन दियास।” 13 तेबे जाकूब चो बेटामन असन बिचारला कि सकेम आमचो बईन दीना के असुद करलोसे, एईकाजे हुनमन, सकेम आउर हुनचो बुआ हमोर के कपट ले असन उत्तर दिला, 14 “खतना नी करलो मनुक के आमी आपलो बईन देउक नी सकुं; कसनबलले एचो ले आमचो इजित जायदे। 15 मानतर तुमीमन ले सपाय मनुकमन आमचो असन खतना करालास जाले तुमचो गोट मानुंदे। 16 तेबे आमी आपलो बेटीमन तुमके बिया करुन देउंदे आउर तुमचो बेटीमन के बिया होउंदे, आउर तुमचो संगे बसापत करुन गोटकी लोग होउंदे। 17 मानतर तुमी आमचो गोट के नी मानुन खतना नी करालास जाले आमी लेकी के धरुन जाते जाउंदे।”18 हुनमन चो ए गोट के सुनुन हमोर आउर हुनचो बेटा सकेम हरिक होला। 19 जाकूब चो बेटी के खुबे मन करलो किरता ए बुता के करतो काजे हुन बेर नी करलो, हुन आपलो बुआ चो कुटुम ने सबुले आगर मान पावलो मनुक रये। 20 एईकाजे हमोर आउर हुनचो बेटा सकेम, सहर चो देवड़ी लगे जाउन सहरेयामन के असन समजाउक मुरियाला, 21 “हुनमन आमचो संगे मिला-मिसा होउन रउक मन करसोत; एईकाजे हुनमन के एई देस् ने बेपार करुन कमाउक दियास; दखा ए देस् हुनमन काजे बले पुरतो असन आसे; फेर आमी हुनमन चो बेटीमन के बिया होवां, आउर आपलो बेटीमन के हुनमन के देवां। 22 आमी हुनमन चो गोटकी गोट मानलोने ची हुनमन आमचो संगे मिलुन-मिसुन रदे, एईकाजे आमी सपाय मनुकमन बले हुनमन असन खतना कराउं। 23 आमी असन करलु जाले हुनमन चो छेरी-मेंडीमन, गाय-बयलामन, सपाय पसुमन आउर हुनमन चो सपाय धन-माल, काय आमचो नी होयदे? एईकाजे आमी हुनमन चो गोट मानुं, आउर हुनमन आमचो संगे रदे।” 24 तेबे हुन सहर चो देवड़ी बाटले निकरलो सपाय लोग हमोर आउर हुनचो बेटा सकेम चो गोट मानला, आउर सपाय मनुकमन खतना कराला।
25 खतना करालो किरता तीसर दिने हुता चो लोगमन दुखा ने रओत; तेबे जाकूब चो दुय झन बेटामन सिमोन आउर लेवी बललोने, दीना चो भाईमन कोनी हुनमन के बिरुद करतो डर नोहलोर, हुन सहर ने ओलुन हुता चो सपाय मनुकमन के आपलाहान खांडामन ले मोरते मारला। 26 आउर हुनमन हमोर आउर हुनचो बेटा सकेम के खांडा ले मोरते मारला, आउर दीना के सकेम चो घर ले नीला। 27 जाकूब चो दुसर बेटामन हुन सहर ने एउन मोरलोमन के दखला आउर हुन सहर के झीका-उड़मा करला, कसनबलले हुताय हुनमन चो बईन के असुद करु रओत। 28 हुनमन छेरी-मेंडी, गाय-बयला, गदाहामन आउर सहर आउर बेड़ा-खाड़ा ने रलो सपाय धन-माल के झीकला। 29 हुता चो सपाय धन-माल, हुनमन चो पिला-झीलामन आउर बायलेमन के बले हुनमन नीला। हुनमन घरे जोन बले रली सपाय के झीकुन नीला। 30 तेबे जाकूब, सिमोन आउर लेवी के बललो, “तुमी ए देस् ने रतो कनानीमन आउर परिजीमन चो मन ने मोचो बिरुद बईर उबजालास। असन करुन तुमी मोके बिपती ने पाड़लास। मोचो संगे खिंडिक असन लोग आसोत, एदांय हुनमन रूंडा होउन मोचोले जुद करुक ईला जाले मोके मोरते मारदे आउर मय मोचो कुटुम संगे नास होउन जायंदे।” 31 मानतर हुनमन बलला, “काय, हुन आमचो बईन संगे बेसवा असन बेबार करुआय?”