जाकूब आउर एसाव चो भेट-घाट
33
जाकूब नंजर उठाउन दखलो कि एसाव चार सव मनुकमन के धरुन हुनचेई बाटे एयसे। एईकाजे पिलामन के लिआ, राहेल आउर दुनो कमेयीनमन चो मंजी बाटुन दिलो। 2 आउर सबुले पुरे कमेयीनमन के आपलो लेकामन संगे, हुनचो पाटकुती लिआ के आपलो लेकामन संगे, आउर सबुले पाटकुती राहेल के जूसुफ संगे संगालो, 3 आउर खुदे सबुले पुरे गेलो, आउर सात हार डंडासरन करुन आपलो भाई लगे अमरलो। 4 तेबे एसाव हुनके भेटतो काजे पराते ईलो, आउर हुनके पोटारुन चूमलो, फेर दुनो गागला। 5 जेबे एसाव नंजर उठाउन बायलेमन आउर पिलामन के दखलो, तेबे पूछलो, “ए तुचो संगे रलो लोग कोन आत?” जाकूब बललो, “एमन तुचो कमेया चो बेटा-बेटीमन आत, एमन के महापरभु दया करुन मोके दिलोसे।” 6 तेबे कमेयीनमन, आपलो पिलामन संगे एउन हुनके डंडासरन करला। 7 फेर लिआ आपलो पिलामन संगे लगे एउन डंडासरन करली, हुनचो पाछे राहेल आउर जूसुफ हुनचो लगे एउन डंडासरन करला। 8 तेबे एसाव बललो, “बाटे भेटलो इतलो बड़े गोहड़ीमन के, तुय मोके काय काजे दिलीस?” जाकूब बललो, “एईकाजे कि मोचो मालिक मोचोले हरिक होओ।” 9 एसाव बललो, “ए मोचो भाई, मोचो लगे सपाय बानी आसे; तुचो बीती तुचेई लगे रओ।” 10 जाकूब बललो, “नाई-नाई, तुय मोचोले हरिक आसीस जाले मोचो भेंट के धर; कसनबलले तुके दखलोके मोके महापरभु के दखलो असन लागली, आउर तुय मोचो ले हरिक होलीस। 11 एईकाजे मोचो पठालो भेंट के दया करुन धर; कसनबलले महापरभु मोके खुबे बर दिलोसे आउर मोचो लगे बले सपाय तीज आसे।” हुनचो ले खुबे गुहारतो के एसाव हुनचो भेंट के धरलो।12 तेबे एसाव बललो, “आव एदांय जो, मय बले तुचो संग-संग हिंडेंदे।” 13 मानतर जाकूब बललो, “ए मोचो मालिक, तुय जानीस मोचो संगे नानी पिलामन, गोरस देतो छेरी-मेंडीमन आउर गायमन आसोत; असन पसुमन के गोटोक मंजन ने बले आगर बेरपेला खेदलोने हुनमन मोरुन जादे। 14 एईकाजे मोचो मालिक आपलो कमेया चो पुरे-पुरे जा। मय, मोचो पुरे हिंडतो पसुमन आउर पिलामन चो हिंडतो हिसाब ने धीरे-धीरे सेईर ने मोचो मालिक लगे अमरेंदे।” 15 एईकाजे एसाव बललो, “उसन आय जाले मोचो संग चो लोगमन ले आदो के तुचो थाने छांडेंदे।” मानतर जाकूब बललो, “ए मोचो मालिक, काय काजे? मोचोले तुय हरिक रा, हुनी मोचो काजे खुबे आय।” 16 तेबे एसाव हुनी दिने सेईर जातो काजे बाट धरलो। 17 मानतर जाकूब हुता ले निकरुन सुकोत ने गेलो, आउर हुता आपलो काजे गोटोक घर आउर पसुमन काजे कोटामन बनालो; एईकाजे हुन ठान चो नाव सुकोत* पड़ली।
जाकूब, सकेम ने अमरतोर