जाकूब, एसाव के भेटतो उआट करतोर
32
जाकूब बले आपलो बाट धरलो आउर महापरभु चो दूतमन हुनके बाटे भेटला। 2 हुनमन के दखते खन जाकूब बललो, “ए तो महापरभु चो सेना आय।” एईकाजे जाकूब हुन ठान चो नाव महनेम* संगालो। 3 तेबे जाकूब, एदोम देस् चो सेईर राज ने आपलो भाई एसाव लगे जातो ले आगे आपलो लोगमन चो हाथे खबर पठालो। 4 आउर हुनमन के असन हुकुम दिलो, “मोचो मालिक एसाव के असन बला, ‘तुचो कमेया जाकूब तुके असन बलेसे, मय इतलो दिन ले लाबान थाने परदेसिया होउन रले; 5 आउर मोचो लगे गाय-बयलामन, गदाहामन, छेरी-मेंडीमन आउर कमेया-कमेयीनमन आसोत; मय मोचो मालिक लगे एईकाजे खबर पठालेसे कि तुय मोचोले हरिक हो’।”6 हुन लोगमन जाकूब लगे बोहड़ुन एउन बलला, “आमी तुचो भाई एसाव लगे जाउन रलु, हुन बले तुके भेटतो काजे चार सव मनुकमन धरुन एयसे।” 7 तेबे जाकूब खुबे डरुन डाहाल-बिकाल होलो आउर आपलो संग चो लोग के, छेरी-मेंडीमन के, गाय-बयलामन के आउर ऊंटमन के दुय गोहड़ी बनालो। 8 हुन बिचारलो, “एसाव एउन गोटोक गोहड़ी के मारुक मुरियालोने दुसर गोहड़ी पराउन बाचुक सकोत।”
9 फेर जाकूब पारथना करलो, “ए जहोवा, ए मोचो दादी अबराहम आउर मोचो बुआ इसहाक चो महापरभु, तुय तो मोके बलु रयीस, ‘आपलो देस् आउर आपलो बुआ घरे बोहड़ुन जा, मय तुचो भलई करेंदे,’ 10 तुय आपलो कमेया मोके सत-मया करलीस आउर पतेयातो लाईक रलीस, मानतर मय हुनचो लाईक नोआंय, कसनबलले मय सोजे बड़गी धरुन जरदन चो हुन पाट जाउ रयें, आउर एदांय मोचो लगे लोगमन आउर जनावरमन चो दुय ठन गोहड़ी आसे। 11 मोचो गुहार सुन आउर मोचो भाई एसाव चो हाथ ले मोके बचाव; कसनबलले मोके डर आसे, हुन एउन आमी माई-पिला के मोरते काय नी मारो। 12 तुय तो बलु रलीस, ‘मय पक्का तुचो भलई करेंदे, आउर तुचो थर-लर के समदूर चो बारु असन खुबे बड़ायंदे, आउर हुनमन गनुक नी सकतो इतलो होदे’।”
13 जाकूब हुन राती हुताय ठेबलो; आउर आपलो गोहड़ीमन ले बाचुन-बाचुन आपलो भाई एसाव के भेंट देतो काजे 14 दुय सव बोकड़ीमन, बीस ठन बोकड़ामन, दुय सव मेंडीमन, बीस ठन मेंडामन, 15 तीस ठन गोरस देतो ऊंटमन आउर पिलामन, चालीस ठन गायमन, दस ठन बयलामन, बीस ठन गदहीमन आउर दस ठन गदाहा पिलामन के अलगालो। 16 एमन के गोहड़ी-गोहड़ी बनाउन आपलो कमेयामन के गोटोक-गोटोक गोहड़ी सोपुन दिलो आउर बललो, “मोचो पुरे-पुरे जाहा; आउर गोहड़ीमन गोटोक-दुसर ले खिंडिक लापी-लापी रओत।” 17 फेर हुन पईल गोहड़ी चो राखा करु बीता के हुकुम दिलो, “मोचो भाई एसाव तुके भेटुन पूछेदे, ‘तुय कोचो कमेया आस? कहां जायसीस? जोन पसुमन तुचो पुरे-पुरे आसोत हुनमन कोचो आत?’ 18 तेबे तुय असन बल, ‘ए सपाय तुचो कमेया जाकूब चो आत। हुन आपलो मालिक एसाव काजे भेंट पठालोसे आउर हुन खुदे आमचो पाट-पाट एयसे’।” 19 हुन, दुसर आउर तीसर राखा करुमन के आउर गोहड़ीमन चो पाट-पाट एतो सपाय के बले असने चे हुकुम दिलो, “एसाव तुमके भेटलो जाले असने ची बला। 20 तुमी ए गोट सांगुक नी भूलका, ‘तुचो कमेया जाकूब आमचो पाट-पाट एयसे’।” कसनबलले हुन बिचारलो कि पुरे-पुरे पठालो भेंट के दखुन हुनचो रीस सीतरेदे आउर पाछे मय हुनके भेट होयंदे; होउक सके हुन मोचो ले हरिक होओ। 21 एईकाजे जाकूब, भेंट के आगे पठाउन दिलो आउर एकलाय तमु-भाटा ने ठेबलो।
जाकूब लोंडा-पाड़ा होतोर
22 हुनी राती हुन उठलो आउर आपलो दुनो बायलेमन, दुनो कमेयीनमन आउर आपलो इगारा झन बेटामन के जबोक नंदी चो हुन पाट नहकालो। 23 जाकूब आपलो सपाय धन-माल के बले नंदी चो हुन पाट नहकालो। 24 जेबे जाकूब एकलाय बाचलो तेबे गोटोक मनुक एउन बियान पावतले हुनचो संगे लोंडा-पाड़ा होते रला। 25 जेबे हुन मनुक जानलो कि जाकूब के जीतुक नी सकेंसे, तेबे हुनचो जांघ चो जोड़ान के मारलो; आउर लोंडा-पाड़ा होतोदांय जाकूब चो जांघ कुलंडी ले सरकली। 26 तेबे हुन मनुक बललो, “बियान पायसे, मोके जाउक देस;” जाकूब बललो, “मोके बर दिलोर नोहलोर मय तुके जाउक नी देयें।” 27 हुन मनुक हुनके पूछलो, “तुचो काय नाव आय?” हुन बललो, “मोचो नाव जाकूब आय।” 28 हुन मनुक बललो, “एदांय ले तुचो नाव जाकूब नाई; मानतर इसराएल* रयदे, कसनबलले तुय, महापरभु आउर मनुकमन संगे लोंडा-पाड़ा होउन जीतलीसीस।” 29 जाकूब बललो, “मय तुके गुहारेंसे, मोके आपलो नाव सांग।” तेबे हुन मनुक बललो, “तुय काय काजे मोचो नाव पूछसीस?” आउर हुताय हुन मनुक हुनके बर दिलो। 30 “महापरभु के छमा-छम दखलो पाछे बले मोचो जीव बाचलीसे” बलुन जाकूब हुन ठान चो नाव पनीएल* संगालो। 31 जाकूब के पनीएल ले जाउ-जाउ बेर उदली, कसनबलले हुनचो जांघ कुलंडी ले सरकलो किरता हुन खोड़ेयाते रये। 32 हुन मनुक, जाकूब चो जांघ चो छीर के मारु रये एईकाजे इसराएलिमन एबे बले जनावरमन चो जांघ के नी खाओत।