राहेल आउर लिआ चो झगड़ा
30
राहेल दखली कि जाकूब बाटले हुनके पिला-झीला नी होओत, तेबे हुन आपलो बईन के ईरका होउक मुरियाली, आउर जाकूब के बलली, “मोके बले पिला-झीला देस नोहले मय मोरुआंय।” 2 तेबे जाकूब, राहेल के रीस होउन बललो, “काय, मय महापरभु आंय? हुनी तो तुके बांझीन बनालोसे।” 3 राहेल बलली, “आले तेबे, मोचो कमेयीन बिलहा एताय आसे; तुय हुनचो संगे सो, हुन मोचो काजे पिला पायदे, आउर हुनमन मोचो पिला-झीला होदे।” 4 एईकाजे राहेल आपलो कमेयीन बिलहा के जाकूब चो बायले बनाउन दिली; आउर जाकूब हुनचो संगे सोवलो। 5 तेबे बिलहा पेटे ठेबली आउर जाकूब बाटले गोटोक बेटा के छर-फर होली। 6 तेबे राहेल बलली, “महापरभु मोचो सत-नियाव करलो आउर मोचो गुहार सुनुन मोके गोटोक बेटा दिलो”; एईकाजे हुनचो नाव दान* संगाली। 7 राहेल चो कमेयीन बिलहा फेर पेटे ठेबली, आउर जाकूब बाटले फेर गोटोक बेटा के छर-फर होली। 8 तेबे राहेल बलली, “मय आपलो बईन संगे लड़ई लड़ले आउर जीतले;” एईकाजे हुनचो नाव नपताली* संगाली।9 जिदलदांय लिआ जानली कि हुन एदांय पिला पाउक नी सके, तेबे आपलो कमेयीन जिलपा के जाकूब चो बायले बनाउन दिली। 10 लिआ चो कमेयीन जिलपा, जाकूब बाटले गोटोक बेटा के छर-फर होली। 11 तेबे लिआ बलली, “मय खुबे भाइगमानी आंय!” एईकाजे हुनचो नाव गाद* संगाली। 12 फेर लिआ चो कमेयीन जिलपा, जाकूब बाटले आउर गोटोक बेटा के छर-फर होली। 13 तेबे लिआ बलली, “मय खुबे हरिक आंसे; बायलेमन पक्का मोके ‘धन-धन आय’ बलदे।” एईकाजे हुनचो नाव आसेर* संगाली।
14 गउं काटतो दिनमन ने रूबेन के बेड़ा ने दूदाफरमन मिरली, हुनके रुबेन आपलो आया लिआ लगे नीलो, तेबे राहेल, लिआ के बलली, “तुचो बेटा चो आनलो दूदाफरमन ले मोके बले खिंडिक देस।” 15 लिआ, राहेल के बलली, “तुय मोचो मनुक के झिकलीस। काय, ए नानी गोट आय? एदांय काय, तुय मोचो बेटा चो दूदाफरमन के बले धरुक मन करसीस?” राहेल बलली, “आले तेबे, तुचो बेटा चो दूदाफरमन चो पलटा आजी राती जाकूब तुचो संगे सोयदे।” 16 सांज बेरा जाकूब बेड़ा बाटले एतो बेरा लिआ हुनके भेटुक गेली आउर बलली, “तुके आजी मोचो संगे रउक पड़ेदे, कसनबलले मय तुके आपलो बेटा चो दूदाफरमन चो पलटा देउन घेनलेसे।” हुन राती जाकूब हुनचेई संगे सोवलो। 17 महापरभु, लिआ चो गुहार सुनलो, आउर हुन पेटे ठेबली आउर जाकूब बाटले पांचवां बेटा के छर-फर होली। 18 तेबे लिआ बलली, “मय आपलो मनुक के आपलो कमेयीन के दिले। एईकाजे महापरभु मोके पलटा दिलो;” एईकाजे हुनचो नाव इसाकार* संगाली। 19 लिआ फेर पेटे ठेबली, आउर जाकूब बाटले छटवां बेटा के छर-फर होली। 20 तेबे लिआ बलली, “महापरभु मोके नंगत बर दिलोसे; एदांय ले मोचो मनुक मोके मान देयदे, कसनबलले हुनचो बाटले मोके छय झन बेटामन होलासे;” एईकाजे हुनचो नाव जबूलून* संगाली। 21 हुनचो पाछे हुनके गोटोक बेटी बले होली, हुनचो नाव दीना संगाली। 22 महापरभु, राहेल के बले सूरता करलो, आउर हुनचो गुहार के सुनुन हुनके पिला पावतो सकत दिलो। 23 एईकाजे हुन पेटे ठेबली आउर गोटोक बेटा के छर-फर होली आउर बलली, “महापरभु मोचो इजित बचालो।” 24 हुन असन बिचारुन हुनचो नाव जूसुफ* संगाली, “जहोवा मोके आउर गोटोक बेटा देओ।”
जाकूब आउर लाबान चो झगड़ा
25 राहेल ले जूसुफ चो जनम होली, तेबे जाकूब, लाबान के बललो, “मय आपलो घरे आउर आपलो देस् जायंदे, मोके बिदा करुन देस। 26 मोचो बायलेमन आउर मोचो पिलामन के मोके देस, जोनमन काजे मय तुचो बुता करले; तुय तो जानीस मय तुचो कितलो सेवा-बुता करले।” 27 मानतर लाबान हुनके बललो, “तुय मोचोले हरिक आसीस जाले तुय एताय मोचो संगे रा, मय ए भेद के जानले कि तुचेई किरता जहोवा मोके बर दिलोसे।” 28 फेर हुन बललो, “तुय नंगत ले सांग तुके आउर काय देउआंय, मय तुके देयंदे।” 29 तेबे जाकूब हुनके बललो, “तुय जानीस मय तुचो कितलो सेवा-बुता करले, आउर मोचो रलो बेरा तुचो पसुमन खुबे जन होते रओत। 30 मोचो एतो ले आगे हुनमन कितरो रला आउर एबे कितरो आगर होलासे, आउर मय जोन-जोन बुता करले हुन सपाय ले जहोवा तुके बर दिलो; मानतर मय आपलो कुटुम चो बुता केबे करेंदे?” 31 लाबान बललो, “मय तुके काय देउआंय?” जाकूब बललो, “तुय मोके काई नी देस; तुय मोचो काजे असन करलीस जाले, मय तुचो छेरी-बोकड़ीमन के चरायंदे आउर हुनमन चो रखेया करेंदे। 32 आजी मोके आपलो छेरी-मेंडीमन चो मंजी ले जाउक देस, मय सपाय चितरा आउर काबरा मेंडा आउर करेया रंग चो मेंडा पिलामन आउर चितरा आउर काबरा बोकड़ामन के अलगे करेंदे, आउर एईमन मोचो भूती होदे। 33 एतो समया ने केबई मोचो भूती चो गोट निकरली जाले एई सत मोचो गवई होयदे; बललोने, बोकड़ीमन ले कोनी बले चितरी-काबरी आउर करेया मेंडा के छांडुन गोटोक बले दुसर रंग चो मोचो थाने रली जाले हुन चोरलो बीती होयदे।” 34 तेबे लाबान बललो, “तुचो बललो हिसाब ने होओ।” 35 मानतर हुनी दिने लाबान सपाय चितरा आउर काबरा बोकड़ामन के आउर सपाय चितरी आउर काबरी बोकड़ीमन के, जोनमन थाने पंडरी चीना रये आउर करेया मेंडामन के अलगाउन दखा-राखा करतो काजे आपलो बेटामन चो हाथे सोपुन दिलो; 36 आउर लाबान, जाकूब ले तीन दिन चो बाट इतलो लापी गेलो; हुदलीदांय जाकूब, लाबान चो छेरी-मेंडीमन के चराउक मुरियालो।
37 तेबे जाकूब, चनार, बादाम आउर अरमोन रूकमन चो काचा खंदीमन के गोंदुन हुनमन चो छोलका के असन धारी-धारी छोललो कि हुनचो पंडरी भाग दखा देओ। 38 तेबे छोललो खंदीमन के छेरी-मेंडीमन पानी खातो डोंगामन ने उबा करलो; आउर हुनमन पानी खाउक ईलो बेरा गाबिन होला। 39 आउर गोहड़ीमन खंदीमन चो पुरे गाबिन होउन धारी-धारी, चितरी आउर काबरी बीती पिलामन पकाला। 40 तेबे जाकूब मेंडी-पिलामन के अलगालो आउर लाबान चो छेरी-मेंडीमन के चितरी आउर सपाय करेया पिलामन बाटे बाट दखाउन दिलो; आउर आपलो गोहड़ी के हुनमन चो ले भिने संगालो, आउर लाबान चो छेरी-मेंडीमन संगे मिसुक नी दिलो। 41 जिदलदांय बले बरसक बीती छेरी-मेंडीमन गाबिन होते रओत, हुदलदांय जाकूब खंदीमन के हुनमन चो पुरे मंडाउन देते रये; जेचोले हुनमन खंदीमन के दखुन गाबिन होते रओत। 42 मानतर निमल बीती छेरी-मेंडीमन ईलोने नी संगाते रये, जेचोले निमल-निमल जनमलो पिलामन लाबान चो रओत, आउर बरसक-बरसक छेरी-मेंडीमन जाकूब चो रओत। 43 असन बरन ले जाकूब खुबे सवकार होलो, आउर हुनचो लगे खुबे छेरी-मेंडीमन, कमेया-कमेयीनमन, ऊंटमन आउर गदाहामन होला।