जाकूब, लाबान के भेट होतोर
29
फेर जाकूब बाट हिंडते बेर उदिया देस् बाटे अमरलो, 2 आउर दखलो कि भाटा ने गोटोक चुंआ आसे, आउर हुन लगे छेरी-मेंडीमन चो तीन गोहड़ी बसलासे; कसनबलले गोहड़ी के आगे ले हुनी चुंआ ले पानी खुआते रओत आउर हुन चुंआ के ढाकलो पकना खुबे बजन रये। 3 जेबे सपाय गोहड़ी हुता रूंडा होते रओत, तेबे धोरईमन हुन पकना के चुंआ चो बाट ले सरकाउन छेरी-मेंडीमन के पानी खुआते रओत आउर पाछे जसन चो उसने चुंआ के पकना ले ढाकुन देते रओत। 4 तेबे जाकूब, धोरईमन के पूछलो, “ए मोचो भाईमन, तुमी कहां चो आहास?” हुनमन बलला, “आमी हारान चो आंव।” 5 तेबे जाकूब हुनमन के पूछलो, “काय तुमी नाहोर चो नाती लाबान के जानास?” हुनमन बलला, “हव, आमी हुनके जानुं।” 6 फेर जाकूब हुनमन के पूछलो, “काय हुन नंगत आसे?” हुनमन बलला, “हव, नंगत आसे। होंदे! हुनचो बेटी राहेल, छेरी-मेंडीमन के धरुन एई बाटे एयसे।” 7 जाकूब बललो, “दखा, बेर नी बसलीसे आउर जनावरमन रूंडतो समया नी होलीसे; एईकाजे छेरी-मेंडीमन के पानी खोआउन फेर चराउक निया।” 8 हुनमन बलला, “आमी असन नी करुक सकुं, कसनबलले सपाय गोहड़ी रूंडलोने आमी चुंआ बाट चो पकना के सरकाउन छेरी-मेंडीमन के पानी खुआउआंव।”9 हुनमन चो गोटेयातेई बेरा, राहेल आपलो बुआ चो छेरी-मेंडीमन के धरुन हुता अमरली, कसनबलले हुन, हुनमन के रोजे चराते रये। 10 जाकूब आपलो मामा लाबान चो बेटी राहेल आउर हुनचो छेरी-बोकड़ीमन के दखलो आउर लगे जाउन चुंआ चो पकना के सरकाउन आपलो मामा लाबान चो छेरी-बोकड़ीमन के पानी खोआलो। 11 तेबे जाकूब, राहेल के चूमलो, आउर चिचियाउन गागलो 12 आउर हुन, राहेल के सांगलो कि मय तुचो मयना भाई आंय बललोने रिबका चो बेटा; तेबे राहेल पराते जाउन आपलो बुआ के सांगली। 13 लाबान आपलो भाचा जाकूब चो एतो खबर सुनुन हुनके भेटतो काजे पराते ईलो आउर हुनके पोटारुन चूमलो आउर आपलो घरे नीलो, फेर जाकूब आपलो संगे घटलो सपाय गोट लाबान के सांगलो। 14 तेबे लाबान, जाकूब के बललो, “सते, तुय मोचेई देहें आउर लोउ चो आस।” एईकाजे जाकूब गोटोक मयना हुनचेई संगे रलो।
राहेल आउर लिआ काजे सेवा-बुता करतोर
15 तेबे लाबान, जाकूब के बललो, “कुटुम चो लोग होलो किरता तुचो ले फोकाहा ने बुता करातोर मोचो काजे नंगत नोआय, एईकाजे सांग तुचो बुता चो पलटा तुके काय देउआंय?” 16 लाबान चो दुय झन बेटीमन रओत, बड़े चो नाव लिआ आउर नानी चो नाव राहेल रली। 17 लिआ टेडी आंईक चो रये, मानतर राहेल लंग-लंगा आउर खुबे सुंदर रये। 18 जाकूब, राहेल के मया करते रये, एईकाजे हुन बललो, “मय तुचो नानी बेटी राहेल काजे सात बरक तुचो सेवा-बुता करेंदे।” 19 लाबान बललो, “हुनके पर-मनुक के देतो पलटा तुके देतोर नंगत आसे; एईकाजे मोचो संगे रा।” 20 तेबे जाकूब, राहेल काजे सात बरक सेवा-बुता करलो; आउर राहेल के मया करतो किरता इतलो बरक बले हुनके खिंडिक दिन असन लागली।
21 जाकूब, लाबान के बललो, “मोचो बायले के मोके देस, मय हुनचो लगे जायंदे, कसनबलले मोचो सेवा-बुता करतो समया पुरली।” 22 एईकाजे लाबान हुता चो सपाय लोग के हागदेउन भोज दिलो। 23 मानतर सांज बेरा हुन आपलो बेटी लिआ के जाकूब लगे नीलो, आउर जाकूब हुनचो संगे सोवलो। 24 लाबान आपलो कमेयीन जिलपा के आपलो बेटी लिआ चो कमेयीन होतो काजे दिलो। 25 बियान पावतोके जाकूब जानलो कि हुनचो संगे लिआ रये, एईकाजे हुन, लाबान के बललो, “तुय मोचो संगे असन काय काजे करलीस? काय, मय तुचो संगे रउन राहेल काजे तुचो सेवा-बुता नी करले? फेर तुय मोचो संगे काय काजे असन कपट करलीस?” 26 लाबान बललो, “आमचो थाने बड़े बेटी रउ-रउ नानी बेटी चो बिया करतो नीती नीआय। 27 लिआ संगे तुचो बिया होलो हरिक-उदीम चो एक हपता तो सरो ता; फेर सात बरक मोचो संगे रउन सेवा-बुता करसे जाले दुसर बेटी के बले देयंदे।” 28 एईकाजे जाकूब असने चे करलो, आउर लिआ संगे हपता पुरोतले रलो; तेबे लाबान आपलो नानी बेटी राहेल के बले हुनके बिया करुन दिलो। 29 लाबान आपलो कमेयीन बिलहा के आपलो बेटी राहेल चो कमेयीन होतो काजे दिलो। 30 तेबे जाकूब, राहेल संगे बले सोवलो, आउर हुन लिआ ले आगर राहेल के मया करते रये। हुन, लाबान संगे रउन आउर सात बरक हुनचो सेवा-बुता करलो।
जाकूब चो पिलामन
31 जहोवा दखलो कि जाकूब, लिआ ले आगर राहेल के मया करेसे, तेबे हुन लिआ के पेटे ठेबतो सकत दिलो, मानतर राहेल बांझीन रली। 32 तेबे लिआ पेटे ठेबली, आउर गोटोक बेटा के छर-फर होली। हुन असन बिचारुन हुनचो नाव रूबेन* संगाली, “जहोवा मोचो तकलीस के दखलो; एईकाजे मोचो मनुक एदांय मोके मया करेदे।” 33 पाछे, हुन फेर पेटे ठेबली आउर गोटोक बेटा के छर-फर होली; आउर असन बलली, “मोके मया नी मिरे बलुन जहोवा सुनलो आउर फेर ले मोके बेटा दिलो;” एईकाजे हुनचो नाव सिमोन* संगाली। 34 हुन फेर पेटे ठेबली, आउर गोटोक बेटा के छर-फर होली, आउर बलली, “एदांय चो हार मोचो मनुक मोके मया करेदे, कसनबलले हुनचो बाटले मोके तीन झन बेटामन होला;” एईकाजे हुनचो नाव लेवी* संगाली। 35 हुन फेर पेटे ठेबली आउर गोटोक बेटा के छर-फर होली, आउर बलली, “एदांय हार मय जहोवा के धन-धन करेंदे,” एईकाजे हुनचो नाव जहूदा* संगाली; हुनचो पाछे हुनके पिला-झीला नी होला।