28
तेबे इसहाक, जाकूब के हागदेउन बर दिलो आउर हुकुम दिलो, “तुय कोनी कनानी लेकी के बिया नी हो। 2 तुय पदन-अराम ने आपलो आजु बतूएल घरे जाउन तुचो मामा लाबान चो बेटीमन ले गोटोक के बिया हो। 3 सबुले सकत महापरभु तुके बर देओ, तुचो लेउर बड़ाउन बाड़ती करो कि तुमी खुबे जन होआ। 4 हुन तुके आउर तुचो थर-लर के बले अबराहम असन बर देओ, जेचोले तुय हुन देस् चो हकदार होसे, जोन थाने तुय एबे परदेसिया होउन रयसीस। हुनी देस् के महापरभु अबराहम के देउ रये।” 5 तेबे इसहाक, जाकूब के बिदा करलो आउर जाकूब पदन-अराम ने अरामेया बतूएल चो बेटा लाबान लगे गेलो। लाबान, जाकूब आउर एसाव चो आया रिबका चो भाई आय।एसाव, इसमाएल चो बेटी के बिया होतोर
6 जेबे एसाव दखलो कि इसहाक, जाकूब के पदन-अराम ले बायले आनतो काजे बर देउन पठालो, आउर हुनके बर देतो बेरा असन हुकुम दिलो, “तुय कोनी कनानी लेकी के बिया नी हो,” 7 आउर जाकूब आया-बुआ चो हुकुम मानुन पदन-अराम ने गेलो। 8 तेबे एसाव असन बिचारलो, मोचो बुआ इसहाक, कनानी लेकीमन के मुरे मने नी करुआय। 9 एईकाजे एसाव, अबराहम चो बेटा इसमाएल लगे गेलो आउर इसमाएल चो बेटी आउर नबायोत चो बईन महलत के बिया होउन आपलो बायलेमन चो सोउत बनालो।
जाकूब सपनतोर
10 जाकूब, बेरसेबा ले निकरुन हारान बाटे गेलो। 11 आउर बेर बसली गुने गोटोक ठान ने अमरुन हुताय बिसातो उआट करलो; एईकाजे हुता चो पकनामन ले गोटोक पकना के आपलो मुंड-उसा देउन हुताय सोवलो। 12 तेबे हुन सपनलो कि गोटोक चेगना मंजपुर ने उबा आसे, आउर हुनचो उपर चो टीप सरग के टेकलीसे, आउर महापरभु चो दूतमन हुता चेगते-उतरते रओत। 13 जहोवा हुनचो उपरे उबुन बलेसे, “मय जहोवा, तुचो दादी अबराहम आउर इसहाक चो बले महापरभु आंय। जोन भुंय ने तुय सोवलीसीस हुनके मय, तुके आउर तुचो थर के देयंदे। 14 आउर तुचो थर, भुंय चो धुरला कटार खुबे होदे, आउर बेर उदिया, बेर बुड़ती, बेर उदिया उजा आउर बेर उदिया डेबरी गुलाय बाटे बिगरदे। तुचो आउर तुचो थर-लर किरता गुलाय मंजपुर चो सपाय जात चो लोग बर पावदे। 15 सुन, मय तुचो संगे रयंदे, तुय जोन थाने बले जासे मय तुचो रखेया करेंदे आउर तुके एई देस् ने बोहड़ाउन आनेंदे; मोचो बललो गोट के पुरा करतले मय तुके नी छांडे।” 16 तेबे जाकूब चेतलो आउर बललो, “सते, जहोवा ए ठान ने आसे, आउर मय ए गोट के नी जानते रले।” 17 जाकूब डरुन बललो, “ए खुबे डरतो लाईक ठान आय! ए ठान, महापरभु चो घर के छांडुन आउर काई होउक चे नी सके; ए सरग चो देवड़ी ची होयदे।”
18 बियान पावते खन जाकूब उठलो, आउर आपलो मुंड-उसा दिलो पकना के खमा असन उबा करलो, आउर हुनचो टीप ने तेल रिकालो। 19 जाकूब हुन ठान चो नाव बेतेल* संगालो; मानतर आगे हुन सहर चो नाव लूज रली। 20 तेबे जाकूब असन बोदना बोअलो, “महापरभु मोचो संगे रउन मोचो बाट हिंडतो बेरा मोचो रखेया करलो जाले आउर मोचो खातो काजे रोटी आउर पींदतो काजे फटई दिलो जाले, 21 आउर मय आपलो बुआ घरे अस्तिर ने बोहड़ले जाले; जहोवा मोचो महापरभु होयदे। 22 ए पकना, जेके मय खमा असन उबा करले, ए महापरभु चो घर होयदे; आउर जोन बले तुय मोके देसे हुनचो दसवां बाटा मय तुके देयंदे ची।”