उबजास 27

इसहाक, जाकूब के बर देतोर

जिदलदांय इसहाक डोकरा होलो, आउर हुनचो आंईकमन काई दखा नी देतो इतलो अंधार पड़ली, हुन आपलो बड़े बेटा एसाव के हागदेउन बललो, “ए मोचो बेटा,” तेबे एसाव बललो, “काय हुकुम आय?” 2 इसहाक बललो, “मय डोकरा होलेसे आउर मय नी जाने केबे मोरुन जायंदे: 3 एईकाजे तुय आपलो धनु-कांड के धरुन राने पारदी जा, आउर मोचो काजे रान-जियाद के मारुन आन। 4 आउर मोचो मन भावतो असन सुवाद बिती भाजा बनाउन मोचो लगे आन। मय हुनके खाउन मोरतो ले आगे तुके बर देयंदे।”

5 तेबे एसाव रान बाटे पारदी गेलो। इसहाक, एसाव के ए सपाय गोट सांगतो बेरा रिबका सुनते रये। 6 एईकाजे रिबका आपलो बेटा जाकूब के बलली, “मय तुचो बुआ के तुचो भाई एसाव ले असन बलतो के सुनलेसे, 7 ‘तुय पारदी जाउन मोचो काजे सुवाद बिती भाजा बनाव, तेबे मय हुनके खाउन मोचो मोरतो ले आगे तुके जहोवा पुरे बर देयंदे।’ 8 एईकाजे ए मोचो बेटा, मोचो गोट सुन आउर मोचो ए हुकुम के मान, 9 छेरी गोहड़ी ने जाउन बोकड़ी चो दुय ठन नंगत-नंगत पिलामन के आन; आउर मय, तुचो बुआ चो मन के भावतो असन मास चो सुवाद बिती भाजा बनायंदे। 10 आउर तुय हुनके तुचो बुआ लगे ने, तेबे हुन, हुनके खायदे आउर मोरतो ले आगे तुके बर देयदे।” 11 जाकूब आपलो आया रिबका के बललो, “मोचो भाई एसाव चो देहें ने तो खुबे रोंआ आसे, मानतर मोचो देहें ने रोंआ नीआय। 12 मोचो बुआ मोके टामंडलोने, मोचो बुआ के धोका दिलो दोस मोचो उपरे पड़ेदे; आउर बर चो पलटा सराप मिरेदे।” 13 हुनचो आया हुनके बलली, “ए मोचो बेटा, सराप तुके नाई मोके लागो, तुय मोचो गोट सुन आउर जाउन हुन बोकड़ा-पिलामन के मोचो लगे आन।” 14 तेबे जाकूब जाउन हुन बोकड़ा-पिलामन के आपलो आया लगे आनलो, आउर हुनचो आया हुनचो बुआ चो मन भावतो असन सुवाद बिती भाजा बनाली। 15 तेबे रिबका आपलो पईलात बेटा एसाव चो सुंदर फटई आपलो नानी बेटा जाकूब के पींदाली, जोन फटईमन घरे रये। 16 आउर बोकड़ी चो पिलामन चो चामड़ामन के जाकूब चो हाथमन ने आउर हुनचो गुलगुला टोडरा ने गुंडेयाली; 17 आउर हुन सुवाद बिती भाजा आउर आपलो बनालो रोटी के आपलो बेटा जाकूब चो हाथे देउन दिली।

18 तेबे हुन आपलो बुआ लगे गेलो आउर बललो, “ए मोचो बुआ,” इसहाक पूछलो, “काय गोट आय? ए मोचो बेटा, तुय कोन आस?” 19 जाकूब आपलो बुआ के बललो, “मय तुचो पईलात बेटा एसाव आंय। मय तुचो हुकुम हिसाब ले रांदुन आनलेसे; एईकाजे उठ, मोचो पारदी मास खा आउर मोके बर देस।” 20 इसहाक आपलो बेटा के पूछलो, “ए मोचो बेटा, तुके कसन ने इतलो झटके जनावर मिरली?” जाकूब बललो, “तुचो महापरभु जहोवा, झटके मोके जनावर के भेटालो।” 21 फेर इसहाक, जाकूब के बललो, “ए मोचो बेटा, लगे आव, मय तुके छिंउन जानेंदे कि तुय मोचो बेटा एसाव आस कि नाई।” 22 तेबे जाकूब आपलो बुआ लगे गेलो, आउर इसहाक हुनके छिंउन बललो, “गोटेयातोर तो जाकूब असन लागेसे, मानतर हाथ एसाव चो असन लागेसे।” 23 जाकूब चो हाथ हुनचो भाई एसाव चो हाथ असन भुरसा रलो किरता इसहाक हुनके नी चितालो। एईकाजे हुनके बर दिलो। 24 आउर हुनके पूछलो, “काय तुय सते मोचो बेटा एसाव आस?” हुन बललो, “हव, मय आंय।” 25 तेबे इसहाक हुनके बललो, “भाजा के मोचो लगे आन, मय तुचो पारदी-मास खायंदे आउर तुके बर देयंदे।” भाजा के हुनचो लगे आनलोके हुन खादलो, आउर हुनचो लगे अंगुर रस बले आनुन दिलो, इसहाक हुनके बले खादलो। 26 तेबे हुनचो बुआ इसहाक हुनके बललो, “ए मोचो बेटा, मोचो लगे एउन मोके चूम।” 27 तेबे जाकूब हुनचो लगे जाउन हुनके चूमलो; आउर इसहाक हुनचो फटईमन चो बास के सुंगुन हुनके असन बर दिलो,

“दखा, मोचो बेटा चो बास हुन बेड़ा चो बास असन आय,

जेके जहोवा बर दिलोसे,

28 महापरभु तुके बादरी ले ओस, आउर भुंय चो नंगत-नंगत उबज,

खुबे अरन आउर नवा अंगुर रस देओ।

29 राज-राज चो लोग तुचो कमेया होओत, आउर जात-जात चो लोग तुके डंडासरन करोत,

तुय आपलो भाईमन चो मालिक हो,

आउर तुचो आया चो बेटामन तुके डंडासरन करोत,

जोन तुके सरापदे हुनीमन के सराप लागो,

आउर जोन तुके बर देदे हुनमन बर पावोत।”

एसाव बर पावतो काजे गुहारतोर

30 इसहाक, जाकूब के बर दिलो आउर जाकूब आपलो बुआ चो पुरे ले जाते खन एसाव पारदी बाटले अमरलो। 31 तेबे हुन बले सुवाद बिती भाजा बनाउन आपलो बुआ लगे आनलो आउर बललो, “ए मोचो बुआ, उठ आउर आपलो बेटा चो पारदी मास खा, आउर मोके बर देस।” 32 हुनचो बुआ इसहाक पूछलो, “तुय कोन आस?” हुन बललो, “मय तुचो पईलात बेटा एसाव आंय।” 33 तेबे इसहाक खुबे थरथरुन बललो, “फेर हुन पारदी करुन मोचो लगे आनु बीता कोन रलो? तुचो एतो ले आगे मय खाउन हुनके बर दिले। एदांय हुनके बर चो फर पक्‍का मिरेदे ची।” 34 एसाव आपलो बुआ चो ए गोट सुनुन खुबे जोर ले चिचियाउन गागलो आउर मुरमुरा होउन बललो, “ए मोचो बुआ, मोके बले बर देस।” 35 हुन बललो, “तुचो भाई चलाक होउन तुके मिरतो बर के धरुन जाते गेलो।” 36 एसाव बललो, “काय, हुनचो नाव जाकूब संगातोर सत नी होली? हुन मोचो संगे दुय हार कपट करलो, मोचो पईलात बेटा होतो हक के धरलो, आउर एदांय दख, मोचो बर के बले धरलो;” आउर फेर बललो, “तुय मोचो काजे बले काई बर बचालीसीस कसन?” 37 इसहाक, एसाव के बललो, “मय हुनके तुचो मालिक बनाले, हुनचो भाई-बंद के हुनचो हक ने करुन दिले। अरन आउर नवा अंगुर रस देउन हुनके चमकट करले। एईकाजे ए मोचो बेटा, मय तुचो काजे काय करुआंय?” 38 एसाव आपलो बुआ के बललो, “ए मोचो बुआ, काय तुचो मन ने गोटकी चे बर आसे? ए मोचो बुआ, मोके बले बर देस!” असन बलुन एसाव किरकिरुन-किरकिरुन गागलो। 39 तेबे हुनचो बुआ इसहाक हुनके बललो,

“दख, तुचो घर खतउ भुंय ले लापी रयदे,

आउर हुता बादरी ले धुंआरी नी पड़ेदे।

40 तुय आपलो खांडा चो सकत ले जीव रसे,

तुय आपलो भाई चो सेवा करसे,

मानतर तुय छुटलीस जाले

हुनचो जुआंड़ी के आपलो खांद ले टुटासे।”

41 एसाव के मिरतो बर, जाकूब के आपलो बुआ दिलो किरता एसाव, जाकूब के बईर करते रये; एईकाजे हुन बिचारलो, “मोचो बुआ चो मोरतो समया अमरेसे; पाछे मय, मोचो भाई जाकूब के मोरते मारेंदे।” 42 आपलो पईलात बेटा एसाव चो ए गोटमन जानलोके रिबका आपलो नानी बेटा जाकूब के हागदेउन बलली, “सुन, तुचो भाई एसाव तुके मोरते मारतो उआट करुन आपलो मन के थमालोसे। 43 एईकाजे ए मोचो बेटा, मोचो गोट धर आउर मोचो भाई लाबान लगे हारान ने पराव; 44 आउर खिंडिक दिन बललोने, तुचो भाई चो रीस उतरतले हुनचेई संगे रा। 45 तुचो भाई चो रीस तुचो उपर ले उतरली जाले, तुय हुनचो संगे करलो बुता के भूलकलो जाले, मय तुके हागदेउक पठायंदे; मय, तुमी दुनो बेटामन के गोटकी दिने मोरतो के नी दखुक सकें।”

जाकूब, लाबान लगे जातोर

46 फेर रिबका, इसहाक के बलली, “हित्‍ती लेकीमन किरता मय आपलो जीवना के बले घिनियायंसे; आउर असन हित्‍ती लेकीमन ले जाकूब बिया होलो जाले मोचो जीवना ले काय नफा आसे?”