इसहाक आउर अबीमेलेक
26
हुन देस् ने भूक पड़ली। ए भूक पड़ा, अबराहम चो समया ने पड़लो भूक पड़ा ले भिने आय। एईकाजे इसहाक गरार सहर ने गेलो, जोन थाने राजा अबीमेलेक, पलिस्तीमन उपरे राज करते रये। 2 जहोवा, इसहाक के दरसन देउन बललो, “मिसर ने नी जा; जोन देस् मय तुके सांगेदे, हुताय रा। 3 तुय एई देस् ने रा, मय तुचो संगे रयंदे आउर तुके बर देयंदे; ए सपाय देस् के तुके आउर तुचो थर-लर के देउन तुचो बुआ अबराहम चो पुरे खादलो किरिया के पुरा करेंदे। 4 मय तुचो थर के बादरी चो तारामन असन खुबे जन करेंदे। तुचो थर के ए सपाय देस् देयंदे, मंजपुर चो सपाय जातमन, तुचो थर बाटले धन-धन होदे, 5 कसनबलले अबराहम, मोचो गोट मानुन मोचो हुकुममन, नीतीमन आउर मोचो नियम-कानुनमन के पुरा करलो।”6 एईकाजे इसहाक गरार ने बसापत करलो। 7 जिदलदांय हुता चो लोगमन इसहाक के हुनचो बायले चो बारे ने पूछला, तेबे हुन रिबका के आपलो बायले आय बलतो काजे डरलो, हुन बिचारलो कि एमन रिबका चो सुंदर रूप के दखुन मोके मोरते मारदे, एईकाजे हुन बललो, “हुन तो मोचो बईन आय।” 8 इसहाक चो हुता रतोर खुबे दिन होलो पाछे, गोटोक दिने पलिस्तीमन चो राजा अबीमेलेक, इसहाक के आपलो बायले रिबका के छिंया-लाता करतो बेरा खिड़की बाटले दखलो। 9 तेबे अबीमेलेक, इसहाक के हागदेउन बललो, “हुन तो तुचो बायले आय, फेर तुय काय काजे हुनके आपलो बईन बललीस?” इसहाक बललो, “मय बिचारले, हुनचो किरता मोके मोरुक काय नी होओ।” 10 अबीमेलेक बललो, “तुय काय काजे आमचो संगे असन करलीस? असन ने तो रयतमन ले कोनी बले तुचो बायले संगे सोउक सकतो, आउर तुय आमके पाप ने फसातीस।” 11 एईकाजे अबीमेलेक आपलो सपाय रयत के हुकुम दिलो, “जोन बले इसहाक नोहले हुनचो बायले के छिंवदे, हुनके पक्का मोरते मारोत।”
12 इसहाक हुन देस् ने बेड़ा-खाड़ा कमालो आउर हुन बरक, पुरा-पुरा फसल पावलो। जहोवा हुनके बर दिलो, 13 आउर हुनचो बाड़ती होते गेली आउर हुन खुबे बड़े सवकार होलो। 14 हुनचो लगे छेरी-मेंडी, गाय-बयला आउर कमेया-कमेयीनमन खुबे होतो के पलिस्तीमन ईरका होला। 15 एईकाजे हुनचो बुआ अबराहम आपलो समया ने, कमेयामन ले खोड़ालो सपाय चुंआमन के पलिस्तीमन माटी पाटुन दिला। 16 तेबे अबीमेलेक, इसहाक के बललो, “तुय आमचो थान ले जा; कसनबलले तुय आमचो ले खुबे सकत बीता होलीसीस।” 17 एईकाजे इसहाक हुता ले जाते गेलो, आउर गरार चो घाटी ने तमु गाड़ुन बसापत करलो 18 आउर हुन चुंआमन के फेर ले खोड़ालो, जेके आपलो बुआ अबराहम खोड़ाउन रये, आउर हुन मोरलो पाछे पलिस्तीमन पाटु रओत; इसहाक हुन चुंआमन चो हुनी नाव संगालो, जोन हुनचो बुआ संगाउ रये। 19 मानतर इसहाक चो कमेयामन घाटी ने चुंआ खोड़तो बेरा बोहतो पानी चो गोटोक पजरा मिरली। 20 तेबे गरार चो धोरईमन, इसहाक चो धोरईमन ले झगड़ा करला आउर बलला, “ए पानी आमचो आय।” एईकाजे इसहाक हुन चुंआ चो नाव एसेक* संगालो, कसनबलले हुनमन हुनचो ले झगड़ा करला। 21 फेर हुनचो कमेयामन दुसर चुंआ खोड़ला; हुनमन हुनचो काजे बले झगड़ा करला, एईकाजे हुन चुंआ चो नाव, सितना* संगालो। 22 हुनमन हुता ले लापी गेला, आउर हुता गोटोक चुंआ खोड़ला; हुनचो काजे हुनमन झगड़ा नी करला; एईकाजे इसहाक असन बिचारुन हुन चुंआ चो नाव, रहोबोत* संगालो, “एदांय जहोवा आमचो काजे खुबे ठान दिलोसे, आउर आमी एई देस् ने बाड़ती करुंदे।”
23 आउर हुन हुता ले बेरसेबा बाटे गेलो। 24 आउर हुनी राती बेरा जहोवा हुनके दरसन देउन बललो, “मय तुचो बुआ अबराहम चो महापरभु आंय; नी डर, कसनबलले मय तुचो संगे आंसे, आउर मोचो कमेया अबराहम किरता तुके बर देयंदे, आउर तुचो थर बड़ायंदे।” 25 तेबे इसहाक हुता गोटोक बेदी बनाउन जहोवा ले पारथना करलो, आउर आपलो तमु हुताय गाड़लो; आउर हुनचो कमेयामन हुता गोटोक चुंआ खोड़ला।
इसहाक आउर अबीमेलेक गोटोक सोर होतोर
26 तेबे अबीमेलेक आपलो राजपाल अहुजत आउर आपलो पाईकमन चो मुखिया पीकोल के धरुन गरार ने इसहाक लगे गेलो। 27 इसहाक हुनमन के बललो, “तुमी मोचो ले बईर करुन मोके आपलो थान ले निकराउन दिलास, एदांय काय काजे मोचो लगे ईलासाहास?” 28 हुनमन बलला, “आमी खुदे दखलुसे, जहोवा तुचो संगे रयसे; एईकाजे आमी बिचारलु, तुय आउर आमी गोटोक-दुसर संगे किरिया खाउं आउर आमी तुचो ले गोटोक बायदा करुं, 29 जसन आमी तुके नोकसान नी करलु, आउर तुचो संगे भलई चे करलु, आउर तुके अस्तिर ने बिदा करलु, उसने चे तुय बले आमचो काई नोकसान नी करसे। तुय जहोवा ले बर पावलिसीस।” 30 तेबे इसहाक हुनमन के भोज दिलो, आउर हुनमन खाहा-पीया होला। 31 बड़े बियाने उठुन हुनमन गोटोक-दुसर ले किरिया खादला; तेबे इसहाक हुनमन के बिदा करलो, आउर हुनमन हुता ले अस्तिर ने गेला। 32 हुनी दिने इसहाक चो कमेयामन एउन आपलो खोड़लो चुंआ चो बारे ने सांगला, “आमके गोटोक पानी चो पजरा मिरलीसे।” 33 तेबे इसहाक हुनचो नाव सिबा* संगालो; एईकाजे हुन सहर चो नाव एबतले बेरसेबा* आय।
एसाव चो हित्ती बायलेमन