अबराहम चो कतूरा बाटले थर-लर
25
अबराहम, कतूरा नाव चो आउर गोटोक बायले के बिया होलो। 2 हुनचो ले जिमरान, जोकसान, मदना, मिदयान, इसबाक आउर सूह चो जनम होली। 3 जोकसान ले सेबा आउर ददान चो जनम होली; आउर ददान ले असूरी, लतूसी आउर लुमी जनमला। 4 मिदयान चो बेटामन: एपा, एपेर, हनोक, अबीदा, आउर एलदा। ए सपाय अबराहम चो कतूरा बाटले थर होला। 5 अबराहम, इसहाक के आपलो सपाय धन-माल दिलो। 6 मानतर आपलो दुसर बायलेमन चो बेटामन के आपलो जीव रलो बेरा काई-काई देउन बेर उदिया देस् बाटे इसहाक ले लापी पठालो।अबराहम चो मोरना
7 अबराहम एक सव पचत्तर* बरक जीवलो। 8 अबराहम खुबे बरक जीवलो आउर खुबे डोकरा होउन मोरलो। हुन अस्तिर चो जीवना जीउन आपलो पुरखा-पाटी संगे मिसलो। 9 हुनचो बेटामन इसहाक आउर इसमाएल, हुनके ममरे चो बेर उदिया बाटे मकपेला करपन ने मोटेयाला, जोन हित्ती सोहर चो बेटा एपरोन चो रये। 10 ए भुंय के अबराहम, हित्तीमन ले घेनुन रये। हुताय अबराहम के माटी दिला, जोन थाने आगे सारा के माटी देउ रला। 11 अबराहम चो मोरलो पाछे महापरभु हुनचो बेटा इसहाक के बर दिलो, जोन बेर-लहेरोई नाव चो चुंआ लगे रते रये।
इसमाएल चो थर
12 अबराहम चो बेटा इसमाएल चो जनम सारा चो मिसरी कमेयीन हाजिरा ले होली। 13 इसमाएल चो बेटामन चो नाव आउर थर ए आय: इसमाएल चो बड़े बेटा नबायोत, केदार, अदबेल, मिबसाम, 14 मिसमा, दूमा, मसा, 15 हदद, तेमा, जतूर, नापीस, आउर केदमा। 16 इसमाएल चो बेटामन चो नाव हिसाब ले, एईमन चो गांवमन आउर पारामन* चो नाव पड़ली। एई बारा झन आपलाहान कुटुम चो मुखियामन होला। 17 इसमाएल एक सव सयंतीस बरक चो रलो बेरा मोरलो आउर आपलो पुरखा-पाटी संगे मिसलो। 18 हुनचो थर-लर हवीला ले धरुन सूर अमरतले बसापत करला, जोन मिसर देस् चो बेर उदिया बाटे अस्सूर जातो बाट ने आसे। हुनमन आपलो सपाय भाई-बंदमन ले बईर करते रये।
इसहाक चो बेटामन चो जनम
19 अबराहम चो बेटा इसहाक चो थर ए आय: अबराहम, इसहाक चो बुआ रये; 20 इसहाक चालीस बरक चो रलो बेरा रिबका के बिया होलो, जोन पदन-अराम ने रतो अरामेया बतूएल चो बेटी आउर अरामेया लाबान चो बईन रये। 21 इसहाक चो बायले बांझीन रये, एईकाजे इसहाक हुनचो काजे जहोवा के गुहारलो; आउर जहोवा हुनचो गुहार सुनलो; तेबे हुनचो बायले रिबका पेटे ठेबली। 22 पिलामन हुनचो पेटे गोटोक-दुसर संगे टेगला-मसका होते रला; तेबे रिबका बलली, “असन हाल ने मय कसन ने जीव रउक सकेंदे?” आउर हुन जहोवा चो इछा जानुक मन करली। 23 तेबे जहोवा हुनके बललो,
“तुचो पेटे, दुय झन पिलामन आसोत,
तुचो पेट ले निकरते खन दुय भिने-भिने जात चो लोग होदे,
आउर गोटोक, दुसर ले आगर सकत बीता होयदे,
आउर बड़े बेटा नानी बेटा चो सेवा करेदे।”
24 रिबका चो छर-फर होतो बेरा जानला कि हुनचो पेटे जांवर-जिया लेका पिलामन आसोत। 25 पईल पिला लाल रंग चो रये, हुनचो पुरा देहें कामरा असन भुरसा रये; एईकाजे हुनचो नाव एसाव* संगाला। 26 हुनचो पाट-पाट हुनचो भाई, एसाव चो लेड़ी धरुन जनमलो; आउर हुनचो नाव जाकूब* संगाला। रिबका हुनमन के छर-फर होतो बेरा इसहाक साठ बरक चो रये।
एसाव आपलो पईलात पन बिकतोर
27 जेबे हुन लेकामन बाड़ुक मुरियाला, एसाव गोटोक पक्का पारदेया होलो, आउर हुन, रानमन ने रते रये। मानतर जाकूब सोज मनुक रये आउर तमुमन ने रते रये। 28 हुनमन चो बुआ इसहाक, एसाव चो पारदी ले आनलो मास के खाउक मन करते रये। एईकाजे हुन एसाव के मया करते रये; मानतर रिबका जाकूब के मया करते रये।
29 गोटोक दिने जाकूब दार-भाजी रांदते रये, आउर एसाव रान बाटले थाकुन ईलो। 30 तेबे एसाव, जाकूब के बललो, “मय खुबे थाकलेसे, हुन लाल बिती दार-भाजी ले मोके बले खिंडिक देस।” एईकाजे हुनचो नाव एदोम* बले पड़ली। 31 जाकूब बललो, “आपलो पईलात बेटा होतो हक मोके देस।” 32 एसाव बललो, “दख, मय मोरतो असन होलेसे; एईकाजे पईलात बेटा होतो हक ले मोके काय नफा होयदे?” 33 जाकूब बललो, “मोचो ले किरिया खा,” तेबे एसाव हुनचो पुरे किरिया खादलो आउर आपलो पईलात बेटा होतो हक के जाकूब के दिलो। 34 तेबे जाकूब, एसाव के रोटी आउर दार-भाजी खुआलो, आउर हुन खाउन-पीउन उठलो आउर जाते गेलो। असन करुन एसाव आपलो पईलात बेटा होतो हक के हेला समजलो।