इसहाक चो बिया
24
एदांय अबराहम खुबे डोकरा होउ रये; आउर जहोवा हुनके सपाय बरन चो बर देउ रये। 2 अबराहम, आपलो घर चो सबुले सियान कमेया जोन सपाय धन-माल चो भंडारी रये हुनके बललो, “तुचो हाथ मोचो जांग खाले संगाव*; 3 आउर मोचो पुरे सरग आउर मंजपुर चो महापरभु जहोवा चो किरिया खा कि जोन कनानीमन चो मंजी मय रयंसे हुनमन चो बेटीमन ले कोनी लेकी के मोचो बेटा काजे नी आनसे, 4 मानतर तुय, मोचो देस् ने मोचेई कुटुम-लोगमन लगे जासे आउर मोचो बेटा इसहाक काजे गोटोक लेकी आनसे।” 5 कमेया हुनके बललो, “हुन लेकी मोचो संगे ए देस् ने एउक मन नी करली जाले काय, मय तुचो बेटा के हुन देस् ने नेउआंय, जोन थान ले तुय एउ रलीस?” 6 अबराहम हुनके बललो, “दख, चेत ने रा, तुय मोचो बेटा के हुन देस् ने केबई नी ने। 7 सरग चो महापरभु जहोवा, जोन मोके, मोचो बुआ घर आउर मोचो जनम-बाड़ ठान ले एता आनलो आउर मोचो ले बायदा करुन बललो, ‘मय ए देस् के तुचो थर-लर के देयंदे।’ हुनी आपलो दूत के तुचो पुरे-पुरे पठायदे कि तुय मोचो बेटा काजे लेकी आनसे। 8 मानतर हुन लेकी तुचो संगे एउक मन नी करली जाले तुय मोचो ए किरिया ले छुट होसे, मानतर मोचो बेटा के हुता नी ने।” 9 तेबे हुन कमेया आपलो मालिक अबराहम चो जांग खाले आपलो हाथ संगाउन एचो बारे ने किरिया खादलो।10 तेबे हुन कमेया आपलो मालिक चो ऊंटमन ले दस ठन ऊंटमन के बाछलो आउर आपलो मालिक थान ले सुंदर-सुंदर महांग भेंटमन धरुन निकरलो; आउर मेसोपोटामिया* ने अबराहम चो भाई नाहोर चो सहर लगे अमरलो। 11 बेर बसतो बेरा बायले-लेकीमन पानी दुआरुक निकरतोदांय; हुन आपलो ऊंटमन के सहर चो बाहरे चुंआ लगे बसालो। 12 आउर हुन, महापरभु के गुहारलो, “ए मोचो मालिक अबराहम चो महापरभु जहोवा, मोचो मालिक अबराहम उपरे दया कर आउर आजी मोचो बुता के पक्का करुन देस। 13 दख, मय चुंआ लगे उबा आंसे, आउर सहरेयामन चो बेटीमन पानी दुआरतो काजे निकरुन एयसोत। 14 एईकाजे जोन लेकी के मय असन बलेंदे, ‘मोके पानी खुआव’ आउर हुन असन बलो, ‘एदे खा, आउर मय तुचो ऊंटमन के बले खुआयंदे,’ ए हुनी लेकी होओ जेके तुय आपलो कमेया इसहाक काजे बाछलीसीस, असन बरन ले मय जानेंदे, तुय मोचो मालिक उपरे दया करलिसीस।”
15 हुन असन गुहारतेई बेरा, रिबका मुंडे हांडी बोउन ईली। हुन, अबराहम चो भाई नाहोर आउर मिलका चो बेटा बतूएल चो बेटी रये। 16 हुन खुबे सुंदर आउर कुंआरी रये, आउर बिया नी होउ रये। हुन, चुंआ चो पजरा लगे उतरली आउर हांडी ने पानी भोरुन उपरे चेगली। 17 तेबे अबराहम चो कमेया हुनके भेटतो काजे हुनचो लगे पराते ईलो आउर बललो, “आपलो हांडी ले मोके खिंडिक पानी खुआव।” 18 हुन बलली, “ए मोचो मालिक, एदे पानी खा,” आउर हुन झटके हांडी के उतराउन हुनके पानी खुआली। 19 हुनके पानी खोआलो पाछे बलली, “मय तुचो ऊंटमन के बले पेट भरतले पानी खुआयंदे।” 20 तेबे हुन तूरते आपलो हांडी चो पानी के डोंगा ने रिकाउन फेर चुंआ ले पानी भोरुक पराते गेली, आउर सपाय ऊंटमन काजे पुरोतले पानी भोरुन दिली। 21 हुन मनुक धियान ले दखलो आउर ओगाय होउन असन बिचारते रये कि जोन बिचार ले मय एउ रले, जहोवा हुनके पक्का करलो कि नाई।
22 ऊंटमन पानी खादलोके, हुन मनुक आधा तोला* सोन चो नथनी आउर हुनचो हाथमन काजे दस तोला* सोन चो दुय ठन खाड़ुमन निकराउन हुनके दिलो 23 आउर पूछलो, “मोके सांग, तुय कोचो बेटी आस? काय, तुचो बुआ घरे आमके राती ठेबतो लाईक ठान आसे?” 24 हुन बलली, “मय नाहोर आउर मिलका चो बेटा बतूएल चो बेटी आंय।” 25 फेर रिबका हुनके बलली, “आमचो थाने खुबे चारा आउर रतो ठान बले आसे।” 26 तेबे हुन मनुक जहोवा के डंडासरन करुन धन-धन बललो, 27 “मोचो मालिक अबराहम चो महापरभु जहोवा धन-धन आय, हुन मोचो मालिक उपरे आपलो दया आउर सत-मया दखालो; जहोवा मोके नंगत बाट ने हिंडाउन मोचो मालिक चो कुटुम घरे अमराउन दिलो।”
28 तेबे हुन लेकी आपलो घरे पराते गेली आउर आपलो आया के ए सपाय गोट सांगली। 29 रिबका चो गोटोक भाई रये, जेचो नाव लाबान रये; लाबान बाहरे चुंआ बाटे हुन कमेया लगे परालो। 30 कसनबलले लाबान आपलो बईन चो नथनी आउर हुनचो हाथमन ने खाड़ुमन दखलो, आउर आपलो बईन रिबका ले ए गोटमन सुनलो, “हुन मनुक मोके ए गोटमन बललो,” एईकाजे हुन तूरते गेलो आउर हुन कमेया के चुंआ लगे ऊंटमन संगे उबा रलोर दखलो। 31 लाबान हुनके बललो, “ए जहोवा ले बर पावलो मनुक, तुय काय काजे बाहरे उबलीसीस? भीतरे आव, मय तुचो काजे गोटोक बाकरा आउर ऊंटमन काजे ठान तियार करलेसे।” 32 तेबे हुन भीतरे गेलो; आउर लाबान ऊंटमन चो बोजामन के उतराउन हुनमन के चारा दिलो, आउर हुनके आउर हुनचो संग चो लोगमन के पांय धोअतो काजे पानी दिलो। 33 आउर हुन कमेया के भात-साग दिला; मानतर हुन बललो, “मय काय काजे एता ईलेसे, ए गोट के नी सांगलोर मय काई नी खायें।” लाबान बललो, “आले सांग।”
34 तेबे हुन बललो, “मय अबराहम चो कमेया आंय। 35 जहोवा मोचो मालिक के खुबे बर दिलोसे, एईकाजे हुन खुबे सवकार होलो; जहोवा हुनके छेरी-मेंडी, गाय-बयला, सोन-रूप, कमेया-कमेयीनमन, ऊंटमन आउर गदाहामन दिलोसे। 36 मोचो मालिक चो बायले सारा डोकरी होलो बेरा गोटोक बेटा पावलीसे; आउर हुन बेटा के अबराहम आपलो सपाय धन-माल दिलोसे। 37 मोचो मालिक मोके असन किरिया खुआलोसे, ‘जोन देस् ने मय रयंसे, हुताले तुय मोचो बेटा काजे कनानी लेकी नी आनसे; 38 मानतर तुय मोचो बुआ चो घरे जाउन मोचो कुटुम ले मोचो बेटा काजे लेकी आनसे।’ 39 तेबे मय आपलो मालिक के बलले, ‘हुन लेकी मोचो संगे नी एयें बलली जाले मय काय करेंदे?’ 40 तेबे हुन मोके बललो, ‘मय जोन जहोवा चो बाट ने चलेंसे, हुनी तुचो बुता के पुरा करतो काजे तुचो संगे आपलो दूत पठायदे; आउर तुय मोचो बुआ चो घर ले आउर मोचो कुटुम ले मोचो बेटा काजे गोटोक लेकी आनुक सकसे। 41 जिदलदांय तुय मोचो कुटुम ने अमरसे; आउर हुनमन तुके, लेकी नी दिला जाले, तुय ए किरिया ले छुट होसे’।”
42 एईकाजे आजी मय हुन चुंआ लगे अमरुन गुहारते रयें, “ए मोचो मालिक अबराहम चो महापरभु जहोवा, जोन बिचार ले मय एउ रयें हुनके पुरा करुआस जाले, 43 दख, मय ए पानी चो चुंआ लगे उबा आंसे; आउर असन होओ, जोन कुंआरी पानी दुआरुक एयदे, मय हुनके असन बलेंदे, ‘आपलो हांडी ले मोके खिंडिक पानी खुआव,’ 44 आउर हुन मोके बलेदे, ‘एदे, पानी खा, आउर मय तुचो ऊंटमन काजे बले पानी भोरुन देयंदे,’ हुन, हुनी कुंआरी-लेकी होओ, जेके जहोवा मोचो मालिक चो बेटा काजे बाछलोसे।”
45 “मय आपलो मने-मने असन गुहारते ची रले। तेबे दखा, रिबका मुंडे हांडी बोउन ईली; फेर हुन पजरा लगे उतरुन पानी भोरुक मुरियाली: तेबे मय हुनके बलले, ‘मोके पानी खुआव।’ 46 आउर हुन झटके आपलो हांडी के उतराउन बलली, ‘एदे खा, आउर मय तुचो ऊंटमन के बले खुआयंदे,’ असन बरन ले मय पानी खादले, आउर हुन, मोचो ऊंटमन के बले पानी खुआली। 47 तेबे मय हुनके पूछले, ‘तुय कोचो बेटी आस?’ हुन बलली, ‘मय नाहोर आउर मिलका चो बेटा बतूएल चो बेटी आंय,’ तेबे मय हुनचो नाक ने नथनी आउर हुनचो हाथमन ने खाड़ुमन पींदाउन दिले। 48 फेर मय जहोवा के डंडासरन करले, आउर मोचो मालिक अबराहम चो महापरभु जहोवा के धन-धन बलले, कसनबलले हुनी मोके मोचो मालिक चो बेटा काजे हुनचो कुटुम चो बेटी आनतो काजे नंगत बाट दखालो। 49 एईकाजे एदांय तुय मोचो मालिक उपरे दया आउर सत बेबार करुक मन करसीस जाले मोके सांग; आउर मन नी करसीस जाले बले मोके सांग; तेबे मय जानेंदे कि मोके उजा बाटे नोहले डेबरी बाटे जातोर आय।”
50 तेबे लाबान आउर बतूएल बलला, “ए गोट जहोवा बाटले होलीसे; एईकाजे आमी तुके नाई बलुक नी सकुं। 51 दख, रिबका तुचो पुरे आसे, हुनके तुचो संगे ने, आउर जहोवा चो बचन हिसाब ले हुन, तुचो मालिक चो बेटा चो बायले होओ।”
52 हुनमन चो ए गोट सुनुन अबराहम चो कमेया, जहोवा के डंडासरन करलो। 53 फेर हुन कमेया सोन-रुप चो माला-मूंदी आउर फटई, रिबका के दिलो; हुनचो भाई आउर हुनचो आया के बले खुबे मोल बीती भेंटमन दिलो। 54 तेबे हुन मनुक आपलो संगवारीमन संगे भात-साग खादलो आउर राती बेरा हुताय ठेबलो। बड़े बियाने हुन उठुन बललो, “मोके मोचो मालिक लगे जातो काजे बिदा दियास।” 55 रिबका चो भाई आउर आया बलला, “लेकी के आमचो संगे दसेक दिन रउक देस ता, हुनचो पाछे हुन एयदे।” 56 मानतर कमेया हुनमन के बललो, “मय जोन गोट काजे एता एउ रले, जहोवा हुनके पुरा करलोसे; एईकाजे तुमी मोके नी ठेबाहा, एदांय मोके मोचो मालिक लगे जातो काजे बिदा करुन दियास।” 57 हुनमन बलला, “आले, आमी लेकी के हागदेउन पूछुन दखुंदे हुन काय बलेदे जाले।” 58 हुनमन रिबका के हागदेउन पूछला, “काय तुय ए मनुक संगे जाउआस?” हुन बलली, “हव, मय जायंदे।” 59 तेबे हुनमन रिबका आउर हुनचो कमेयीन के अबराहम चो कमेया आउर हुनचो संग चो लोगमन संगे बिदा करुन दिला। 60 हुनमन रिबका के बर देउन बलला,
“ए आमचो बईन,
तुय हजार-लाख लोग चो मूर आया हो;
आउर तुचो थर,
बयरीमन चो सहरमन ने हक संगाओत।”
61 तेबे रिबका आपलो संगवारीमन संगे ऊंटमन ने चेगुन हुन मनुक चो पाट-पाट गेली, असन बरन ले हुन कमेया, रिबका के आपलो संगे नीलो।
62 हुदलदांय इसहाक, बेर-लहेरोई नाव चो चुंआ बाटले एउन नेगेव राज ने रते रये। 63 सांज बेरा इसहाक बेड़ा बाटे बुलुक निकरु रये; आउर हुन दखलो कि ऊंटमन एयसोत। 64 रिबका बले नंजर उठाउन इसहाक के दखली आउर दखते खन ऊंट ले खाले उतरली, 65 आउर कमेया के पूछली, “जोन मनुक बेड़ा बाटले आमके भेटुक एयसे हुन कोन आय?” कमेया बललो, “हुन मोचो मालिक चो बेटा आय।” तेबे रिबका मुंड-ढेकी देउन आपलो थमना के ढाकली। 66 कमेया आपलो संगे होलो सपाय गोट इसहाक के सांगलो। 67 तेबे इसहाक, रिबका के आपलो आया सारा चो तमु ने आनलो, हुनके बिया करलो आउर रिबका हुनचो बायले होली; इसहाक, रिबका के खुबे मया करलो। रिबका ईलो पाछे आपलो आया मोरलो दुख ले इसहाक के अस्तिर मिरली।