सारा मोरतोर आउर हुनके मोटेयातोर
23
सारा एक सव सतायीस बरक चो होली; आउर हुन इतलेही बरक जीव रली। 2 हुन कनान देस् चो किरियत-अरबा ने मोरली; जेके हेबरोन बले बलुआत। सारा मोरली गुने अबराहम, गागा-बोगा होतो काजे हुता गेलो। 3 तेबे अबराहम, मोड़ी लगले उठुन हित्तीमन के बललो, 4 “मय तुमचो मंजी सगा आउर परदेसिया आंय; मोके मोड़ा-भाटा बनातो काजे गोटोक भुंय दियास कि हुन मोचो निज भुंय होओ। तेबे मय, मोचो बायले चो मोड़ी के हुता माटी देयंदे।” 5 हित्तीमन, अबराहम के बलला, 6 “ए आमचो परभु, आमचो गोट सुन; आमचो मंजी तुय मुखिया आस। आमचो मोड़ा-भाटामन ले जोन तुके मने एयसे, हुता आपलो बायले चो मोड़ी के माटी देस; आमीमन ले कोनी बले तुके, तुचो बायले चो मोड़ी के माटी देतो काजे नाई नी बलुं।” 7 तेबे अबराहम उठलो आउर हुन देस् ने रतो हित्तीमन के डंडासरन करुन बललो, 8 “मय आपलो बायले चो मोड़ी के एता माटी देतो काजे तुमी नाई नी बलसाहास जाले मोचो गुहार सुना, सोहर चो बेटा एपरोन के मोचो बाटले गुहारा, 9 कि हुन आपलो भुंय संद लगे चो मकपेला चो करपन मोके देओ। तुमचो पुरे मय हुनके मोल देउन मोड़ाभाटा काजे मोचो निज भुंय बनायंदे।” 10 एपरोन हुताय हित्तीमन चो मंजिगता बसु रये; एईकाजे हुन, जितरो हित्तीमन हुनचो सहर चो देवड़ी भीतरे एउ रओत, हुन सपाय चो पुरे अबराहम के बललो, 11 “ए मोचो मालिक, असन नोआय, मोचो गोट सुन; मय हुन भुंय आउर हुन करपन के तुके देयंसे; आउर आपलो जात भाईमन चो पुरे तुके देयंसे; तुय आपलो बायले चो मोड़ी के हुता माटी देस।” 12 तेबे अबराहम, हुन देस् चो लोगमन के पांय पड़ुन जुहार करलो। 13 आउर हुनमन सपाय सुनतो असन एपरोन के बललो, “तुय असन मन करसीस जाले मोचो गोट सुन, हुन भुंय चो मोल मय तुके देयंदे तुय हुनके धर, तेबे मय आपलो बायले चो मोड़ी के हुता माटी देयंदे।” 14 एपरोन, अबराहम के बललो, 15 “ए मोचो मालिक, मोचो गोट सुन; हुन भुंय चो मोल चार सव रूपा चो सिक्का आय; मानतर तुचो आउर मोचो मंजी काय मोल-भाव? आपलो बायले चो मोड़ी के हुताय माटी देस।” 16 अबराहम, एपरोन चो गोट के मानलो आउर बेपारीमन थाने चलतो रूपा चो चार सव सिक्कामन तवलुन हित्तीमन चो पुरे हुनके दिलो।17-18 असन बरन ले सहर चो देवड़ी भीतरे रलो सपाय हित्तीमन चो पुरे, एपरोन चो भुंय जोन ममरे चो बेर उदिया बाटे मकपेला ने रये, हुता चो करपन आउर हुनचो संद भीतरे रलो सपाय रूकमन बले अबराहम चो हक ने होली। 19 एचो पाछे अबराहम, आपलो बायले सारा चो मोड़ी के मकपेला भुंय चो करपन ने माटी दिलो, जोन कनान देस् चो ममरे ने आसे, एके हेबरोन बले बलुआत। 20 असन बरन ले हित्तीमन, हुन करपन संगे रलो भुंय के मोड़ा-भाटा बनातो काजे अबराहम चो हक ने सोपुन दिला।