अबराहम के परखतोर
22
ए गोटमन चो पाछे महापरभु, अबराहम के असन बलुन परखलो, “ए अबराहम!” अबराहम बललो, “ओय, मय एता आंसे।” 2 महापरभु बललो, “तुचो बेटा, हव, तुय मया करतो आपलो एकलाय बेटा इसहाक के धरुन मोरिया देस् ने जा; हुता मय तुके गोटोक डोंगरी दखायंदे, हुन डोंगरी ने हुनके होम-जतरा चेगाव।” 3 एईकाजे अबराहम बड़े बियाने उठुन बाट हिंडतो काजे आपलो गदाहा के तियार करलो; हुन होम-जतरा काजे दारु चीरलो, आउर आपलो दुय झन कमेयामन आउर आपलो बेटा इसहाक के धरुन महापरभु सांगलो ठान बाटे गेलो। 4 तीसर दिने अबराहम, हुन ठान के नंजर उठाउन लापी ले दखलो 5 आउर आपलो कमेयामन के बललो, “तुमी एताय गदाहा लगे ठेबु राहा; ए लेका आउर मय हुता जाउन डंडासरन करुन तुमचो लगे बोहड़ुन एउंदे।” 6 तेबे अबराहम, होम-जतरा चो दारु के आपलो बेटा इसहाक के बोआलो, आउर आपलो हाथे आईग आउर घाघड़ी धरुन दुनो संगे-संगे गेला। 7 इसहाक आपलो बुआ अबराहम के बललो, “ए बुआ,” तेबे अबराहम बललो, “काय होली बेटा?” इसहाक बललो, “दख, आईग आउर दारु तो आसे; मानतर होम-जतरा चेगातो मेंडा-पिला कहां आसे?” 8 अबराहम बललो, “ए मोचो बेटा, महापरभु खुदे होम-जतरा काजे मेंडा-पिला चो उपाय करेदे” आउर हुनमन दुनो संगे-संगे हिंडते गेला।9 जिदलदांय हुनमन महापरभु दखालो ठान ने अमरला, तेबे अबराहम हुता बेदी बनाउन हुनचो उपरे दारु के रचलो आउर आपलो बेटा इसहाक के बांधुन बेदी चो दारु उपरे लोंडालो। 10 फेर अबराहम आपलो बेटा के जतरा करतो काजे घाघड़ी उठालो। 11 हुदलीदांय जहोवा चो दूत सरग ले चिचियाउन बललो, “ए अबराहम, ए अबराहम।” अबराहम बललो, “ओय, मय एताय आंसे।” 12 हुन बललो, “हुनके जतरा नी कर, हुन लेका के काई नी कर, एदांय मय जानले, तुय महापरभु के डरुआस, कसनबलले तुय आपलो बेटा, आपलो एकलाय बेटा के महापरभु काजे दिलीस।” 13 आउर अबराहम नंजर उठाउन गोटोक मेंडा के झिलाटी ने सींग गुपलोर दखलो। अबराहम जाउन हुन मेंडा के धरलो आउर आपलो बेटा चो पलटा हुनके होम-जतरा चेगालो। 14 अबराहम हुन ठान चो नाव जहोवा-इरे* संगालो, एईकाजे एबतले बले बलुआत, जहोवा चो डोंगरी ने उपाय होयदे ची।
15 फेर जहोवा चो दूत, दुसर हार सरग ले अबराहम के चिचियाउन बललो, 16 जहोवा बलेसे, “तुय ए बुता करलीस आउर आपलो बेटा, आपलो एकलाय बेटा के मोके दिलीस, एईकाजे मय आपलेई किरिया खाउन बलेंसे, 17 मय तुके पक्का बर देयंदे, आउर तुचो थर-लर के बादरी चो तारामन आउर समदूर खंडे चो बारु असन खुबे बड़ायंदे। तुचो थर, आपलो बयरीमन चो सहरमन ने राज करदे, 18 तुचो थर किरता मंजपुर चो सपाय जात चो लोगमन धन-धन होदे, कसनबलले तुय मोचो हुकुम मानलीस।” 19 तेबे अबराहम आपलो कमेयामन लगे बोहड़ुन ईलो, आउर हुनमन सपाय संगे-संगे बेरसेबा बाटे गेला; आउर अबराहम, बेरसेबा ने बसापत करलो।
नाहोर चो थर-लर
20 ए गोटमन चो पाछे अबराहम के खबर मिरली, “तुचो भाई नाहोर बाटले मिलका गोटोक पिला पावलीसे। मिलका चो बेटामन: 21 बड़े बेटा ऊस, ऊस चो भाई बूज, अराम चो बुआ कमूएल, 22 केसेद, हजो, पिलदास, जिदलाप आउर बतूएल।” 23 बतूएल, रिबका चो बुआ रये। ए आंठो के मिलका, अबराहम चो भाई नाहोर बाटले पावली। 24 नाहोर के रूमा नाव चो गोटोक आउर बायले बले रये; रूमा ले तेबह, गहम, तहस आउर माका जनमला।