इसहाक चो जनम
21
जहोवा आपलो बायदा के सूरता करुन सारा उपरे दया करलो। 2 सारा, अबराहम बाटले पेटे ठेबली आउर हुन डोकरा होलो बेरा, महापरभु सांगलो समया ने गोटोक बेटा पावलो। 3 अबराहम, सारा ले जनमलो आपलो बेटा चो नाव इसहाक संगालो। 4 आउर आपलो बेटा इसहाक चो आठ दिन पुरलो के महापरभु चो हुकुम हिसाब ले हुनचो खतना करालो। 5 इसहाक चो जनम होलो बेरा अबराहम सव बरक चो रये। 6 सारा बलली, “महापरभु मोके हसालो, एईकाजे एके सुनतो सपाय लोग बले मोचो संगे हरिक ले हांसदे।” 7 फेर हुन असन बलली, “काय, कोनी केबई अबराहम के असन बलुक सकता कि सारा, पिला के गोरस खोआयदे? मानतर हुन डोकरा होलो बेरा मय हुनचो काजे गोटोक बेटा पावले।”हाजिरा आउर इसमाएल के घर ले निकरातोर
8 इसहाक बाड़लो के गोरस छंडाला; आउर हुनके गोरस छंडालो दिने अबराहम गोटोक बड़े भोज खोआलो। 9 तेबे सारा, अबराहम बाटले जनमलो मिसरी हाजिरा चो बेटा के इसहाक संगे हांसी-खेली करतो के दखुन 10 अबराहम के बलली, “ए कमेयीन आउर हुनचो बेटा के निकराउन देस, कसनबलले ए कमेयीन चो बेटा, मोचो बेटा इसहाक संगे हकदार नी होये।” 11 आपलो बेटा इसमाएल किरता ए गोट अबराहम के खुबे अडरा लागली। 12 मानतर महापरभु, अबराहम के बललो, “हुन लेका आउर कमेयीन काजे तुके अडरा नी लागो। सारा चो गोट के मान, कसनबलले मय तुचो ले करलो बायदा इसहाक आउर हुनचो थर-लर ले ची पुरा होयदे। 13 कमेयीन चो बेटा बले तुचेई थर चो आय, एईकाजे मय हुनचो ले गोटोक जात उबजायंदे।” 14 एके सुनुन अबराहम बड़े बियाने उठुन रोटी आउर चामड़ी चो थयली ने पानी भोरुन हाजिरा चो खांदे बोआउन दिलो आउर लेका के बले हुनके देउन बिदा करलो। हाजिरा हुताले जाउन बेरसेबा चो भाटा-टिकरा ने भुलकते-भटकते रली।
15 चामड़ी-थयली चो पानी सरलोके लेका के हुन, गोटोक झिलाटी छांय ने छांडुन दिली। 16 आउर लेका चो मोरतो के दखुक नी होओ बलुन आपन कांड बिंदतो इतलो लापी जाउन बसली; आउर चिचियाउन-चिचियाउन गागुक मुरियाली। 17 महापरभु, लेका गागतो के सुनलो, तेबे महापरभु चो दूत, हाजिरा के सरग ले हागदेउन बललो, “ए हाजिरा, तुके काय होली? नी डर; कसनबलले महापरभु तुचो लेका गागतो के सुनलोसे। 18 उठ, आउर आपलो लेका के पाव आउर हुनके समाल, कसनबलले हुनचो ले मय गोटोक बड़े जात उबजायंदे।” 19 तेबे महापरभु, हुनचो आंईक उगाड़लो आउर हुनके गोटोक चुंआ दखा दिली, हुन जाउन चामड़ी-थयली ने पानी भोरुन आनली आउर लेका के खुआली। 20 महापरभु हुन लेका संगे रये, हुन बड़े-बाड़लो आउर छीड़ा राने रते-रते बड़े धनु-कांडेया होलो। 21 हुन, पारान नाव चो भाटा-टिकरा ने डेरा पड़लो; हुनचो आया बीती, हुनचो काजे मिसर देस् ले गोटोक बायले आनली।
अबराहम आउर अबीमेलेक सोर होतोर
22 हुदलदांय असन होली अबीमेलेक आपलो सेना-मुखिया पीकोल संगे एउन अबराहम के बललो, “तुय काईचे करले बले महापरभु तुचो संगे रयसे; 23 एईकाजे तुय महापरभु चो किरिया खा कि तुय मोचो आउर मोचो थर-लर संगे केबई काई अडरा नी करसे, मानतर जसन मय तुके दया करु रले उसने तुय मोके आउर मोचो राज उपरे दया करसे, जोन थाने तुय एबे परदेसिया होउन रयसीस।” 24 अबराहम बललो, “मय किरिया खायंसे।” 25 तेबे अबराहम, अबीमेलेक के, हुन चुंआ चो बारे ने सांगलो जेके हुनचो कमेयामन धमकाउन झिकु रला। 26 अबीमेलेक बललो, “मय नी जाने, कोन असन करलो जाले, आउर तुय बले ए गोट के आगे नी सांगलीस, मय ए गोट के आजी सुनेंसे।” 27 तेबे अबराहम, अबीमेलेक के गाय-बयला आउर छेरी-मेंडी दिलो आउर दुनो सोर होउन बायदा करला। 28 अबराहम, आपलो मेंडा गोहड़ी ले सात-ठन मेंडीमन के अलगाउन रलो। 29 तेबे अबीमेलेक, अबराहम के पूछलो, “काय काजे तुय ए सात-ठन मेंडीमन के अलगाउन संगालीसीस?” 30 हुन बललो, “ए सातो मेंडीमन के तुय, मोचो हाथ ले धर। एचोले तुय ए गोट चो गवई होसे कि मय ए चुंआ खोड़लेसे।” 31 हुता हुन दुनो असन किरिया खादलो किरता हुन ठान चो नाव बेरसेबा* पड़ली। 32 हुनमन दुनो बेरसेबा ने किरिया खादलो पाछे, अबीमेलेक आउर हुनचो सेना-मुखिया पीकोल, पलिस्तीन राज ने बोहड़ुन गेला। 33 पाछे अबराहम, बेरसेबा ने गोटोक झाउ रूक रोपलो आउर जुग-जुग रतो महापरभु जहोवा ले हुन थाने पारथना करलो। 34 अबराहम, पलिस्तीमन चो राज ने खुबे दिन ले परदेसिया होउन रलो।