अबराहम आउर अबीमेलेक
20
अबराहम हुताले दखिन राज नेगेव ने गेलो आउर कादेस आउर सूर चो मंजी गरार सहर ने रउक मुरियालो। 2 गरार ने परदेसिया होउन रतो बेरा, अबराहम आपलो बायले सारा के “मोचो बईन आय” बललो। एईकाजे गरार चो राजा अबीमेलेक, लोग पठाउन सारा के आपलो लगे आनलो। 3 राती बेरा अबीमेलेक के महापरभु सपना ने बललो, “जोन बायले के तुय आनलिसीस हुनचो किरता तुय मोरसे; कसनबलले हुन बियातीन बायले आय।” 4 मानतर अबीमेलेक हुनके छिंया-लाता नी करु रये, एईकाजे हुन बललो, “ए परभु, काय तुय दोख नोहलो लोगमन के मोरते मारसे? 5 काय, हुनीची ‘मोचो बईन आय’ नी बललो? आउर ए बायले बले, ‘हुन मोचो भाई आय’ बलली। मय आपलो सत मन आउर दोख नोहलो बिचार ले असन करले।” 6 सपना ने महापरभु हुनके फेर बललो, “तुय आपलो सत-मन ले बुता करलिसीस, एके मय बले जानेंसे; आउर मय ची तुके, मोचो बिरुद पाप करतोले ठेबालेसे, एईकाजे मय तुके हुनके छिंउक नी दिले। 7 एदांय तुय हुन माने चो बायले के बोहड़ाउन देस; कसनबलले हुन अगमजानी आय, हुन तुचो काजे पारथना करेदे आउर तुय जीव रसे। मानतर ए गोट के जानुन रा, तुय हुनके नी बोहड़ालीस जाले, तुय आउर तुचो सपाय लोग मोरुन जाहासे।”8 अबीमेलेक बड़े बियाने उठुन आपलो कमेया-धमयामन के हागदेउन ए गोट के सांगलो, आउर हुनमन खुबे डरला। 9 तेबे अबीमेलेक, अबराहम के हागदेउन बललो, “तुय आमचो संगे काय काजे असन करलीस? आमी तुचो काय नसालु गुने तुय मोचो आउर आमचो राज उपरे ए बड़े पाप तेंगड़लीस? तुय मोचो संगे जोन करलीस हुन नंगत नोआय।” 10 फेर अबीमेलेक, अबराहम के पूछलो, “तुय काय बिचारुन असन करलीस?” 11 अबराहम बललो, “मय बिचारले, एता चो लोगमन महापरभु के मुरे नी डरतो लोग होदे आउर मोचो बायले किरता एमन मोके मोरते मारदे। 12 सते, हुन तो मोचो बईन आय, हुन मोचो बुआ चो बेटी आय मानतर मोचो आया चो बेटी नोआय; एईकाजे हुन मोचो बायले होली। 13 जिदलदांय महापरभु मोके बुआ घर ले निकरुन जातो हुकुम दिलो, तेबे मय हुनके बलले, ‘तुय मोचो उपरे इतली चे दया कर कि आमी दुनो जोन थाने बले जावां तुय मोचो बारे ने बल, ए मोचो भाई आय’।” 14 तेबे अबीमेलेक, अबराहम के छेरी-मेंडी, गाय-बयला आउर कमेया-कमेयीनमन दिलो आउर हुनचो बायले सारा के बले बोहड़ाउन दिलो। 15 अबीमेलेक बललो, “दख, मोचो राज ने तुमके जोन थाने भावले हुनी थाने राहा।” 16 फेर हुन, सारा के बललो, “रूपा चो एक हजार सिक्कामन मय तुचो भाई के दिलेसे, दख, एई तुचो संग चो सपाय लोगमन पुरे गवई होयदे कि तुय धारनिक आस।” 17 तेबे अबराहम, महापरभु ले पारथना करलो; आउर महापरभु, अबीमेलेक, हुनचो बायले आउर कमेयीनमन के चेकरालो, आउर फेर हुनमन पिला-झीला पावला। 18 कसनबलले अबराहम चो बायले सारा किरता अबीमेलेक चो घर चो सबु बायलेमन के जहोवा बांझीन उलटाउन रये।