नूह संगे महापरभु चो बायदा
9
एचो पाछे महापरभु, नूह आउर हुनचो बेटामन के बर देउन बललो, “तुमी पोहलार होउन लेउर बाड़ा आउर गुलाय मंजपुर ने भोरुन जाहा।† 2 मंजपुर चो सपाय जनावरमन, बादरी ने उड़तो सपाय चड़ईमन, भुंये रेंगतो सपाय जनतुरमन आउर समदूर चो सपाय मछरीमन तुमके डरदे: ए सबु के तुमचो हक ने करुन देयंसे। 3 तुमी, सबु रेंगतो जीव-जनतुरमन के खाउक सकास; तुमचो खातो काजे जसन लस-लसा साग-भाजी देउ रले, उसने एदांय सपाय बानी तुमके देयंसे। 4 मानतर मास के हुनचो लोउ संगे नी खाहा। कसनबलले जीव, लोउ ने आसे। 5 मय तुमचो लोउ चो पलटा बललोने, जीव चो पलटा धरेंदे ची: सपाय माने-मारा मनुकमन आउर जनावरमन ले मय पलटा धरेंदे; दुसर चो जीव धरतो सपाय भाई-बंद ले मय पलटा धरेंदे। 6 एईकाजे कोनी बले, मनुक चो लोउ बोहाले हुनचो लोउ बले आउर कोनी बोहादे, कसनबलले महापरभु, मनुक के आपलेई रूप ने बनालोसे। 7 तुमी पोहलार होउन लेउर बाड़ा आउर गुलाय मंजपुर ने भोरुन जाहा।”8 फेर महापरभु, नूह आउर हुनचो बेटामन के बललो, 9 “सुना, मय तुमचो संगे आउर तुमचो एतो थर-लर संगे बले बायदा करेंसे; 10 आउर सपाय जीव-जनतुरमन बललोने, चड़ईमन, पोसतो जनावरमन, रान-जियादमन, जोन बले जाहाज ले निकरुन मंजपुर ने आसोत: 11 हुन सपाय ले मय बायदा करेंसे, सपाय जीव-जनतुरमन फेर बड़े पुर-पानी ले नी मोरदे आउर मंजपुर के नास करतो काजे एदांय केबई बड़े पुर-पानी नी एयदे।” 12 फेर महापरभु बललो, “तुमचो आउर सपाय जीव-जनतुरमन चो थर-लर संगे जुग-जुग काजे करलो बायदा चो चीना ए आय: 13 मय बादरी ने गोटोक पानी-धनु संगालेसे, हुन मोचो आउर मंजपुर चो मंजी बायदा चो चीना होयदे। 14 जिदलदांय मय मंजपुर ने बादरी ढकायंदे तेबे बादरी ने पानी-धनु उदायंदे। 15 तेबे मय, तुमचो आउर सपाय जीवमन संगे करलो बायदा के सूरता करेंदे, सपाय जीवमन फेर बड़े पुर-पानी ले नास नी होदे। 16 बादरी ने उदलो पानी-धनु के दखुन मंजपुर चो सपाय जीवमन* संगे महापरभु जुग-जुग काजे करलो बायदा के मय सूरता करेंदे।” 17 फेर महापरभु, नूह के बललो “मंजपुर चो सपाय जीवमन संगे करलो मोचो बायदा चो चीना एई आय।”
नूह आउर हुनचो बेटामन
18 जाहाज ले निकरलो नूह चो बेटामन चो नाव सेम, हाम आउर जेपेत आय; हाम, कनान चो बुआ रये। 19 नूह चो बेटामन एई तीनो आत, एमन चो थर गुलाय मंजपुर ने बिगरला।
20 नूह बेड़ा-खाड़ा कमाउक मुरियालो आउर अंगुर-डीरामन के रोपतोने पईलात रलो; 21 आउर हुन हुता चो अंगुर-मंद खाउन मातलो आउर आपलो तमु भीतरे नांगड़ा होउन पड़ु रये। 22 तेबे कनान चो बुआ हाम आपलो बुआ के नांगड़ा दखलो आउर बाहरी जाउन आपलो दुनो भाई के सांगलो। 23 तेबे सेम आउर जेपेत आपलो खांदे फटई धरुन पाट-गुचा गेला आउर आपलो बुआ चो देहें के ढाकला, हुनमन पाट-गुचा गेलो किरता आपलो बुआ चो नांगड़ा देहें के नी दखला। 24 नूह निसा ले उमंजलोके जानलो कि आपलो नानी बेटा हुनचो संगे कसन करलो।
25 एईकाजे हुन बललो,
“कनान के सराप लागो,
हुन आपलो भाई-बंदमन चो कमेया होओ।”
26 फेर हुन बललो,
“सेम चो महापरभु, जहोवा धन-धन आय,
आउर कनान, सेम चो कमेया होओ।
27 महापरभु जेपेत* चो थर-लर के बड़ाओ;
आउर हुनमन सेम चो तमुमन ने बले बसापत करोत,
आउर कनान हुनमन चो कमेया होओ।”