बड़े पुर-पानी
7
तेबे जहोवा, नूह के बललो, “तुय आपलो माई-पिला के धरुन जाहाज भीतरे चेग, कसनबलले ए पीड़ी चो लोगमन ले तुय ची मोके धरमकारी दखा देयसीस। 2 सपाय बरन चो सुद पसुमन ले सात-सात जोड़ी माई-अंडरा के धर, मानतर असुद पसुमन ले गोटोक-गोटोक जोड़ी माई-अंडरा के धर; 3 आउर बादरी ने उड़तो चड़ईमन ले बले सात-सात जोड़ी माई-फुरसा के धर, जेचोले मंजपुर ने हुनमन चो लेउर बाड़ेदे। 4 कसनबलले मय सात दिन चो पाछे, मंजपुर ने चालीस मंजन आउर चालीस राती पानी-बरसायंदे आउर मोचो बनालो सपाय जीवमन के मंजपुर ले नास करेंदे।” 5 जहोवा चो हुकुम हिसाब ले ची नूह सपाय करलो।6 नूह, छय सव बरक चो रलो बेरा मंजपुर ने बड़े पुर-पानी ईली। 7 बड़े पुर-पानी ले बाचतो काजे नूह आपलो बायले, बेटामन आउर बुआरीमन के धरुन पानी-जाहाज भीतरे चेगलो। 8 सुद आउर असुद दुनो बरन चो पसुमन, चड़ईमन, 9 आउर भुंये रेंगतो जनतुरमन ले बले गोटोक-गोटोक जोड़ी बललोने, माई-अंडरा, महापरभु चो हुकुम हिसाब ले नूह संगे पानी-जाहाज भीतरे चेगला। 10 सात दिन पाछे, मंजपुर ने पुर-पानी एउक मुरियाली।
11 बललोने, नूह चो उमर छय सव बरक दुय मयना आउर सतरा दिन होलो के गड़िया समदूर चो सपाय पजरा-बुलका फुटली आउर बादरी ले बले पानी रिकाय होली। 12 मंजपुर ने चालीस दिन आउर चालीस राती सरलगा पानी घसरते रये। 13 हुनी दिने नूह आपलो बेटामन सेम, हाम आउर जेपेत आउर आपलो बायले आउर आपलो तीनो बुआरीमन संगे पानी-जाहाज भीतरे चेगलो। 14 हुनमन संगे सपाय बरन चो रान-जियादमन, सपाय बरन चो पोसतो जनावरमन, सपाय बरन चो भुंये रेंगतो जनतुरमन आउर सपाय बरन चो उड़तो चड़ईमन जाहाज भीतरे ओलला। 15 फुंडा धरतो सपाय जीवमन ले गोटोक-गोटोक जोड़ी नूह संगे पानी-जाहाज भीतरे चेगला। 16 महापरभु चो हुकुम हिसाब ले पानी-जाहाज भीतरे सपाय बरन चो माई-अंडरा जीवमन चेगला। तेबे जहोवा, पानी-जाहाज चो कपाट के ढाकलो।
17 मंजपुर ने चालीस दिन होओतले पुर-पानी बाड़ते ची रये आउर डुंगते रये; जेचोले जाहाज उपरे उठुक मुरियाली; आउर हुन भुंय ले उपरे उठली। 18 मंजपुर ने पानी खुबे बाड़ते गेली आउर पानी-जाहाज पानी उपरे पोंहरते रली। 19 गुलाय मंजपुर ने इतलो पुर-पानी ईली कि मंजपुर चो सपाय बड़े-बड़े डोंगरीमन के बुड़ाली। 20 पानी, डोंगरीमन के बुड़ाउन डोंगरीमन ले पंदरा हाथ उपरे होली। 21 आउर मंजपुर ने रतो सपाय चड़ईमन, सपाय पोसतो जनावरमन, सपाय रान-जियादमन, सपाय रेंगतो जीव-जनतुरमन आउर सपाय लोगमन मोरला। 22 भुंय ने रलो फुंडा धरतो सपाय जीवमन मोरला। 23 जाहाज ने नूह आउर हुनचो संगे रलोमन ची बाचला। मानतर भुंय ने रलो सपाय मनुकमन, पसुमन, रेंगतो जनतुरमन आउर बादरी चो चड़ईमन, मंजपुर ले नास होला। 24 एक सव पचास दिन पुरत ले मंजपुर ने पुर-पानी उसनेची रली।