नर-मंजा चो दुसट बुता
6
मंजपुर ने नर-मंजा खुबे जन होते गेला आउर हुनमन बेटीमन पावला, 2 महापरभु चो बेटामन, नर-मंजा चो बेटीमन के दखला कि हुनमन खुबे सुंदर आसोत आउर हुनमन जेके-जेके मन करला, हुनमन के आपलो-आपलो बायले बनाला। 3 तेबे जहोवा बललो, “मोचो आत्मा अमदेया नर-मंजा संगे नी रयदे, कसनबलले हुनमन चो जीवना डंडकी ची काजे आय; हुनमन एक सव बीसेक बरक जीवदे।” 4 महापरभु चो बेटामन, मनुक चो बेटीमन लगे गेलोके जोन पिलामन जनमला, हुनमन बड़े-बड़े बलेयारमन आउर बीरमन होला, हुदलीदांय ले मंजपुर ने बड़े बीरमन होला आउर हुनमन चो नाव आगे-जुगे ले जगुर-पगुर आसे।5 जहोवा दखलो कि मंजपुर ने मनुकमन चो दुसट बुता बाड़लीसे आउर हुनमन चो मने उबजतो जमाय बिचारमन अमदेया अडरा ची होयसे। 6 जहोवा, मंजपुर ने नर-मंजा के बनाउन पसतालो आउर मने-मने खुबे मुरुसनाय होलो। 7 एईकाजे जहोवा बललो, “मोचो बनालो नर-मंजा के मय मंजपुर ले नास करेंदे बललोने, सपाय मनुकमन, पसुमन, रेंगतो जनतुरमन आउर बादरी चो चड़ईमन के नास करेंदे। कसनबलले मय हुनमन के बनाउन भाति पसतायंसे।” 8 मानतर नूह चो चलनी-बुलनी ले जहोवा हरिक रये।
नूह चो थर-लर
9 नूह, धरमकारी आउर हुन पीड़ी चो सपाय लोग ले चोखा मनुक रये; आउर महापरभु चो मन-इछा असन चलते रये। 10 नूह चो थर-लर ए आय: नूह के सेम, हाम आउर जेपेत नाव चो तीन झन बेटा होला। 11 महापरभु चो नंजर ने गुलाय मंजपुर ने अडरा आउर खुबे उबढंगरी बुतामन होते रली 12 आउर महापरभु, मंजपुर के खुबे नसलोर दखलो, कसनबलले सपाय लोगमन आपलो-आपलो चलनी-बुलनी के नसाउन रला।
13 तेबे महापरभु, नूह के बललो, “मय सपाय नर-मंजा के नास करतो बिचार करलेसे, कसनबलले हुनमन चो किरता मंजपुर खुबे उबढंगरी बुता ले भोरलीसे, एदांय मय हुनमन संगे मंजपुर के बले नास करेंदे। 14 एईकाजे तुय गोपेर रूक चो गोटोक पानी-जाहाज बनाव, हुता खोलीमन बनाव, आउर भीतरे बाहरे सपाय थाने डामर लिप। 15 तुय पानी-जाहाज के असन बरन ले बनाव: हुन तीन सव हाथ लाम, पचास हाथ ओसार आउर तीस हाथ डेंग रओ। 16 पानी-जाहाज ने गोटोक खिड़की बनाव, हुनचो एक हाथ उपरे छानी बनाव, पानी-जाहाज चो गोटोक पाट कपाट रओ; आउर पानी-जाहाज के पईल, दुसर आउर तीसर पाउच ने बनाव। 17 आउर सुन, मय खुदे मंजपुर ने बड़े पुर-पानी आनुन बादरी खाले जितरो बले निनास धरतो जीवमन आसोत हुन सपाय के नास करेंदे; आउर मंजपुर चो सपाय जीवमन मोरुन जादे। 18 मानतर तुचो संगे मय बायदा करेंसे; एईकाजे तुय आपलो बायले, बेटामन आउर बुआरीमन संगे पानी-जाहाज भीतरे चेग। 19 आउर सपाय बरन चो जीव जनतुरमन ले एक-एक जोड़ी माई-अंडरामन के पानी-जाहाज भीतरे चेगाउन आपलो संगे हुनमन के बले बचाव। 20 सपाय बरन चो चड़ईमन ले गोटोक-गोटोक जोड़ी माई-फुरसा, सपाय बरन चो पसु-जनावरमन ले गोटोक-गोटोक जोड़ी, सपाय बरन चो भुंये रेंगतो जनतुरमन ले गोटोक-गोटोक जोड़ी माई-अंडरामन तुचो लगे एदे, तुय हुनमन चो जीव के बचाव। 21 आउर बरन-बरन चो खातो तीजमन के आपलो लगे रूंडाउन रा; जोन तुचो आउर हुनमन चो खातो काजे होयदे।” 22 महापरभु जसन हुकुम देउ रलो, हुन सपाय के नूह उसनेचे करलो।