कईन आउर हाबिल
4
आदम आपलो बायले हव्वा संगे सोवलोके हुन पेटे ठेबली। हुन कईन के जनमाली आउर बलली, “जहोवा चो साहरा ले मय गोटोक बेटा* पावले।” 2 हुनचो पाछे हव्वा, कईन चो भाई हाबिल के जनमाली। हाबिल, छेरी-मेंडीमन चो धोरई आउर कईन खेतीयार होलो। 3 गोटोक दिने कईन आपलो बेड़ा-खाड़ा चो उबज ले खिंडिक असन भेंट चेगातो काजे जहोवा लगे आनलो। 4 आउर हाबिल बले आपलो छेरी-मेंडीमन ले पईल बेतमन के आनलो आउर हुनमन चो बसील के भेंट चेगालो; तेबे जहोवा, हाबिल आउर हुनचो भेंट के पावलो, 5 मानतर कईन आउर हुनचो भेंट के मन नी करलो। तेबे कईन जंजाल रीस होलो आउर हुनचो थोतना उतरली। 6 तेबे जहोवा, कईन के पूछलो: “तुय काय काजे इतरो रीस होलीसीस आउर काय काजे तुचो थोतना उतरलीसे? 7 तुय भलई करलोने, काय, मय तुचो भेंट के नी पावते? आउर तुय भलई नी करसीस जाले पाप कपाट लगे घत ने आसे आउर हुन तुचो उपरे राज करुक मन करेसे, मानतर तुके हुनचो उपरे राज करतोर आय।”8 तेबे कईन आपलो भाई हाबिल के बललो, “आव, आमी भाटा ने जो।” आउर जिदलदांय हुनमन भाटा ने अमरला, तेबे कईन आपलो भाई हाबिल के लोंडाउन मोरते मारलो। 9 तेबे जहोवा, कईन के पूछलो: “तुचो भाई हाबिल कहां आसे?” कईन बललो; “मय नी जाने, काय, मय मोचो भाई चो राखा-जागा करुबीता आंय?” 10 जहोवा फेर हुनके पूछलो; “तुय ए काय करलीस? तुचो भाई चो लोउ भुंय ले चिचियाउन-चिचियाउन मोके गुहारेसे! 11 दख! एईकाजे जोन भुंय तुचो हाथ ले तुचो भाई चो लोउ के खादलीसे, हुन भुंय बाटले तुचो उपरे एदांय सराप पड़लीसे। 12 तुय भुंय ने कितलेही बेड़ा-खाड़ा कमाले बले तुके हुनचो पूरा उबज केबई नी मिरेदे; आउर तुय ठोटेया आउर बुलन होसे।” 13 तेबे कईन जहोवा के बललो; “मोके इतलो डंड कटलाउक नी होये, 14 दख, तुय आजी मोके निंज भुंय ले निकरालीस आउर मोके तुचो नंजर चो आड़े रउक पड़ेदे बे, मय मंजपुर ने बुलन आउर एता-हुता लुकते-पराते रयंदे; आउर कोनी बले मोके भेटले मोरते मारदे।” 15 तेबे जहोवा, कईन के बललो; “कोनी बले कईन के मोरते मारलोने, हुनके सात गुना डंड मिरेदे।” आउर कोनी हुनके मोरते नी मारोत बलुन जहोवा, कईन चो देहें ने गोटोक चीना दिलो।
कईन चो थर-लर
16 तेबे कईन, जहोवा चो पुरे ले निकरुन गेलो आउर अदन चो बेर उदिया बाटे नोद* नाव चो राज ने रउक मुरियालो। 17 कईन आपलो बायले संगे सोवलोके हुनचो बायले पेटे ठेबली आउर हनोक के जनमाली। कईन गोटोक सहर बसापत करालो आउर हुन सहर के आपलो बेटा चो नाव ने हनोक संगालो। 18 हनोक चो बेटा ईराद, ईराद चो बेटा महूयाएल, महूयाएल चो बेटा मतूसाएल आउर मतूसाएल चो बेटा लेमेक होलो। 19 लेमेक दुय झन बायले राकलो: हुनमन चो नाव आदा आउर सिला रये। 20 आदा ले जाबाल चो जनम होली। जाबाल, तमु ने रतोमन चो आउर जनावरमन के पोसतो बीतामन चो पुरखा होलो। 21 हुनचो भाई चो नाव जूबाल रये, हुन सारंगी बजाउमन आउर मोहरेयामन चो पुरखा होलो। 22 सिला बले गोटोक बेटा के जनमाली जेचो नाव तूबल-कईन रये। हुन कांस आउर लोहा चो धार बिती ओजारमन घड़तो बीता होलो; आउर हुनचो बईन चो नाव नामा रली। 23 लेमेक आपलो बायलेमन के बललो:
ए आदा आउर सिला, मोचो गोट के सुना।
ए लेमेक चो बायलेमन, मोचो गोट के धियान देउन सुना।
मय गोटोक मनुक के मोरते मारले, जोन मोके घाव-दाव दिलो
बललोने, गोटोक जुवान मनुक के, जोन मोके मार-पेट करते रये।
24 कईन के मोरते मारतो चो डंड सात गुना आय जाले,
लेमेक के मारतोर डंड सतत्तर गुना होयदे।
सेत आउर एनोस