2
1 "Tsǝmǝtǝma dzǝ hya pǝtlanya, nahi jul nji kǝla uzhi.2 Tsǝmǝtǝ dzǝ mangǝ tsǝu tanyi biji , tǝvi njo ghǝya nǝuma, njo batǝnda hi wi ngǝ chachang. Kusama, tǝvi huɗǝtla Tlakǝu sǝya tǝkǝra hi, tǝvi pǝchir Tlakǝu tsǝu sǝya tǝkǝra hi.3 Gwa'a ma Tlakǝu, nahi nji kyua'a nda ku hǝ'i nga. Na hi nda kwa nǝu tsaubar nyi, gwa'a ma tsatsa'akur, gwa'a ma kyua'akur, kwa nau ɗa njo mbunda hi pishir huɗǝtla Tlakǝu.."
Nǝuma tǝkǝra njir Filistiya
4 "A ndǝ da njo ngyar mada zhang ku mǝlǝm Gaza wa. Ashkelon kwa ɗa dadil taku. Njo gǝdlǝnda njir Ashdod pǝchi tangkǝr, njo tsǝnda Ekron. 5 Sǝr tǝhuɗǝ na hi nda kwa ngyatǝ nya dǝl dǝgal, na hi jul njir Keretiyawa, ɓwanyar Tlakǝu kwa mǝr dawa na hi, nakǝ kana'ana, hǝ'i Filisti. Yo zhazhǝnda ngha, a da ya kwa hǝya mada ndǝ zhang wa. 6 Nya dǝl dǝgal kwa ɗa mbwar ɓǝla, kwa ɗa ka mbwar ngya njir ɓǝla, ana mbwar dangal tsǝu. 7 Nya dǝl dǝgal kwa ɗa ka sǝr fa'aki nǝ hǝyadzǝr nji Yahuda, mbwa nda ɓǝla sǝr shishi ti. A ku i Ashkelon ndo piya ma akǝu tǝ ɗa. Aka Hyel tlakǝn nda kwa tsamǝrtǝnda, ya cho ɓǝlanda papa'akur kǝnda nda parakǝu.." s
Nǝuma tǝkǝra Mowab ana Ammon
8 "A ngatǝ ya hǝyatǝvi da Mowab kwa mǝra, ana ngǝl nǝ njir Ammon, ǝnda nda dlǝnyar nji ɗa nda dǝkǝ hatlau ndo kwasǝnya nji ɗa. 9 Aka ǝnga, ǝnhwandǝ Tlakǝ ndǝr gyalkur, Hyel nǝ Israila, a sǝmǝnya tǝya fǝlana piya ǝnda, Mowab kwa ɗa wi Sodom, Ammon tsǝu kwa ɗa wi Gomora, hǝ'i nga kwa nyi na shikǝɗi nǝ kau'ur wuna, nda kǝla sakǝnda ba'anawa. Nji ɗa nda tǝ hǝya dza, kwa dlǝuya kar kǝnda, nji ɗa inda tǝ mbǝɗa kwa fa'abiya ki na nda. 10 Nacha ngǝ kwa ɗa ka wazǝba nǝ hǝkǝra kǝrnǝnda, aka nda hǝyatǝ ya, ǝtsǝu nda dǝkǝ hatlǝu, ngǝ mǝr dawa nji nǝ Tlakǝu Ndǝr gyalkur. 11 Tlakǝ kwa ɗa ka sǝr lǝvǝr nǝ nda, Vǝlǝu, cho zhazhinda dǝhǝ hyel i nǝ dunǝya. A nǝnyi dǝhǝ jul nji nǝ dunǝya kwa shi uzhi, madawa atǝ hǝ'i kwa hǝsǝli nyi.
Nǝuma tǝkǝra Kush
12 "Nahi tsǝu njir Kush, njo tsǝya hi na katsakǝr ɗa."
Nǝuma tǝkǝra Assuriya
13 "Tlakǝ kwa zhazhinda nji nda tǝwa vua na cha kǝrnyi, ya cho zhazhinda Assuriya. Cho shandǝ Nineba ka taku, 'ulǝ'ulǝnyi wi ngǝ tǝ dadil. 14 Dangal i kwa piyatǝ ghada cha, ana kala chul kum taku. Kwadǝga ibi ana shatǝli taku kwa shili ngyata nda kyatǝ kwahima shimbal kǝnda. Tiwi nǝ shatili kwa biya tǝwa kagapǝu, nǝ salakǝu tsǝu tǝwa nyavi. Wu fiɗǝfiɗǝ nǝ sida, ana hǝr nyi i, njir dawa nyi kwa shili wazǝnda. 15 Nǝnnǝ ngǝ mǝlǝm nda dǝgal, nda parakǝ kwa ngya kwalanghǝu, nda tǝ nar nyi kǝr nyi, 'Naya zhang ta nga, a vanyi da wa kǝl naya!' Janǝ ǝnya, a ngyatǝ ka mbwar ki, mbwar piya kum taku! Dǝhǝ ndǝ nda tǝ tǝrabiya tahǝ na cha, cho chulɓǝna nyi, ba cha gǝgǝɗar kǝra cha."