1
1 Kǝl ɓwanya Tlakǝ tǝ shili da Zafaniya zǝr Kush, zǝr Gedaliya, ajinya Amariya nya ndǝla Hezekiya aku bijir Tǝl Yosiya zǝr Amon na Yahuda. s
Bijir tla Nǝumar Tlakǝu
2 Tlakǝ tǝ na; "Yo zhazhinda dǝhǝ sǝ nda ku dunǝya," 3 dǝhǝkura nji ana sǝr shishi, eakǝu ana kalifi. Yo tsǝnda nji kǝmǝngǝr, yo zhazhinda nji ku dunǝya, naya Tlakǝ ngǝ tǝ na."
Tla Nǝuma tǝkǝra hǝsǝli nǝ alenya hyel
4 "Yo shili na ɓwaɓwatǝ tǝkǝra njir Urshalima ana Yahuda. Yo zhazhinda hǝyadzǝr nji kwa hǝsǝli nǝ Ba'al, ana tlǝmǝr fǝrist nǝ katǝ inga. 5 Yo zhazhinda njir gyatǝ kǝra paka vi, njir hǝsǝli nǝ pǝchi, ana hya, ana sasǝlga. Yo zhazhinda njir uzhi kwa sǝmfǝla nǝ Tlakǝu, ya tsǝu ndo sǝmfǝla na Milkom. 6 Yo zhazhinda nji inda ɗa ka ɗa kwa hǝsǝli na'a, kǝl ja, sakana a ngyartǝ nda. Tsǝu ndo gwa'a Tlakǝu ka nǝuna nda, ndara nda gwa'a papakur nyi wa." 7 Pichi ɗatǝ lǝhǝ nda Tlakǝ kwa shili ngya ku dzǝga cho mǝr nǝuma, aka ǝnga bǝkǝ ɗiyu amanyi. Tlakǝ ɓatliya tǝ ka cho lǝnda nji ka sǝr hatǝmachi, ga nga njir dawa ka nda mǝrtǝ nǝuma njir Yahuda. 8 Tlakǝ tǝ na, "Pǝshir nǝuma, 'Yo ɓu njira wawa'a ana tǝl i nǝ Yahuda ana dǝhǝ nji nda kwa ha lukutu hǝsǝli nǝ katǝ nǝ alenya hǝ'i. 9 Pishinda yo tlanda nyi nǝuma nǝ nji inda kwa fǝl tǝ nya vi kwa mǝr sǝnda nji kǝla zǝndǝ Hyel kea mǝra, ana nji inda kwa hǝla ana tsa nji ka nda nyandǝ ki tlakǝnda na kwazhalɓi. 10 Tlakǝ tǝ na, tǝ biji nda, "hyo ngatǝ kurakǝr tiwi aku nyavi kalifi a vu Urshalima. Hyo ngatǝ lǝlla tsǝu a tǝwa makǝmar mǝlǝm, ana kuraka sǝ pǝtlǝpǝtlǝ i kyatǝ dǝgǝl. 11 Lǝllǝ ma, nahi nda kwa ngya ku mǝtla nǝ suku, dǝhǝ njir gǝna kǝhi kwa zhazha, dǝhǝ nji inda kwa ɗǝla, ana ɗǝl nda kwa kuɗa. 12 "A ku biji nga, yo gwahibiya Urshalima ana tǝkǝsǝu, yo tlanda nyi nǝuma nji kǝla ngya na ɓǝla, nji inda kwa na ku ɗufwa nda, 'Tlakǝ nda kwa char mǝn ɗanhali wa, ya a cha kwa char mǝn ɗimikur wa.' 13 Njo fa'abiya gǝna kǝnda, ki kǝnda i tsǝu njo dlanda. Mada ngǝ nda hǝrtǝ ki kǝnda i, a da nda kwa ngya kwa wa. Mada ngǝ tlǝka na tǝ nda fa anaɓ i, a da sa ɓitir anaɓ nda kwa wa."
Pǝchir Tlakǝu
14 Dǝgalǝr pǝchir Tlakǝ ɗatǝ lǝhǝu, shilitǝ lǝhǝ gagaɗa, kwa shili kuskusǝu! Pǝchinda kwa ɗa dǝwatǝu, pishinda ndǝr nau pah kwa tiwi na dunama. 15 Pǝshinda kwa ɗa ka bijir huɗǝtla, pǝchir huɗǝtla ana ɓwaɓwatǝu, pǝchir lǝbǝkǝu ana adaladriki, 16 pǝchir kurakǝr tǝlǝm ana lǝlla aka lǝvalǝva kwa shili pah mǝlǝm inda nja ɓandǝ na ɓangtili, ana mbwa nda kyatǝ jigǝɗǝu. 17 "Yo shili na vanya chul ɓwaɓwatǝ tǝ kǝra nji, nda ma'a ndo ma'i wi ngǝ tǝ njir wulfǝu. Aka nda mǝr tǝ nyi sǝpǝla'a nǝu Tlakǝu, njo pǝnda mashi kǝnda wi ɓiti, kumǝr dza nda tsǝu wa kuɓu. 18 Pichir huɗǝtla Tlakǝu, mada azurfa kǝnda, ndara bijingha kǝnda a da kwa dlǝuya nda wa. Wi huɗǝtla ndǝ nda na shishir nyida, huɗǝtla Tlakǝu kwa ngia kwakwaɗǝu, dǝhǝ dunǝya kwa zhazha. Vǝlǝu, njo zhazhinda dǝhǝ nji inda ku dunǝya, ya kwa ɗa sǝr lǝvǝra."