Pətlənya Habakkuk
3
1 Janə pətlənya Habakkuk ndər mətakər təwa Shigionot. 2 Tlakə, a ngatə ya labar ngha, ngə ləvir ngə tə səya ɗa, Tlakə. Sər zhibiya ku zamin kə ea na, nja zəndə ku ɓəji kə ea, ku huɗətla ka ɗa na təhuɗə. 3 Hyel ka shili təwa Teman, Ndə Karti təwa dəgil Paran, papa'akur nyi tə haɗiya huɗa mələm ana dunəya dəhə kwa fal nyi. 4 Mbəl nyi kwa mbəl wi zədir pichi. Mbəlmbəl nyi cha tsa kərnyi. 5 Təmachi kwa təra manyi, mwandzhi shilikə kwa nəu hinyi. 6 Kəl ngə cha ta'i ka ɗəkə tə dunəya ka la'a ga dzədzandə hə'i. Mə ɗədəm tə huhuɓə ana dəgil halhal i'i tə waza, ya əngə tanyi laku nyi ɗəɗəmə. 7 Kəl ya la'a madləɓa Kushan ku ɓwaɓwatəu. 8 Tlakəu, huɗa ka tla tə tsa dəl fa'a i'i ya? Huɗətla ngə təkəra dləm i'i ya? Ka ɗa dzau təkəra fa'a i'i nacha ngə tə gwa'atə ka dlə taku nə kura ya? 9 Ngə ka həbiya laga ngə biya tə babal ga gwa'ari hafi dangəu. Ngə ka təkəbiya hə'i ana dəl i'i, 10 nda mə tə la'a ngha, ngə nda tsəmə tə jigadəma kənda. Ɓiti məlləm tə tərabiya, kurakə tədəɓə nə ɓiti hu'ihu'i tə tsakətə hya'adə kurakə gagaɗa. 11 Pichi ana hya tə ta'i tə mbar zhang kya huɗamələm aka mbəl nda hafə ngə kwa mbəla, a tə mbəl nda masə ngə kwa mbəla. 12 A ku huɗətla ɗimi ngə ka chinda dunəya ana nji i'i. 13 Ka zəbiya ka ka dləuya nji ngha ana nji ngə inda dzəvidzəvi nyi. Ngə ka kuɗə nda njirawawa'a nə hə'i nji ɗimi, ngə ka kutləya nda hwatə tə kəra cha səya tə hya cha. 14 Ana masə kər nyi ka tau kəra cha, ku sakanda njir pah nyi kwa gwa'a zəbiya wid nda ea, nda kwa mər hirgyaɗi wi ndə nda tə ɗiya nji butəbutə tə ɗəwa. 15 Ka dirɓə nda fa'a ana taku ngha ana ɓiti məlləm nda. 16 A ngatə ya, dəfwa ya kwa tsamtlaɗə, kyara ya kwa dzədzə tsa kurakəu, kəl ngə ɗəhi ɗa tə yida ngə dzaya ghəya na tsamtlaɗəu. Dəhə ka əngha ana kəriwa ya kwa səkə sakanda təmachi kwa shili təkəra hə'i nda kwa shili dla'a ea. 17 Kəl ja, baka sakana a kanda da ta'a dla'a wa, yaya nyi da tə wur anap wa, ya olive ngyar ana fa ngyar tə mər sərsuma, mada ngə a tsəu kətəng da ku shiɓə wa ya tsəu tla da ku dangal i'i wa, 18 dəhə ka əngha yo mər hirgyaɗə ku TLAKƏU, yo ngatə məsədakur na Hyel ndər dləuya ɗa. 19 Hyel Tlakə ngə dunama ɗa, cha batliya hya ya ana dunama, cha mərtə ya kyatə mə wi jigəl.