3
1 Sǝr tuhuɗǝ naka, mǝlǝm nda kwa tlǝmwali, nda hiɗahiɗa, ndǝr mǝr 'ua'uramkur nǝ nji nyi!2 A da cho sǝhimi da madawa wa, sakwata cha dlǝukǝri na ɓatlǝ ngya nyi. A da cha hǝtǝ Tlakǝu ka sǝr wovi nyi wa, ya a da cha lǝhǝtǝ Hyel nyi wa.3 Sǝrmanyi i kwa tsǝhuɗǝ wi Lǝvǝra, njir nǝuma nyi wi ularvoa inda kwa shili tǝwa tǝɗǝr pǝchi, a nda kwa ngyar madami vea wura tǝ kǝra wa.4 Njir matakǝr nyi, nji kǝla sakǝnda kǝl tla gǝzhi, nji kǝl nyabiya alakwal. Fǝrist nyi i tsǝu mǝrtǝ tǝ sǝnda karti hiɗahiɗa. Ngǝ nda sǝwandǝ dlǝdlǝɓǝ nǝ Hyel.5 Kǝl ja, tsǝu tanyi Tlakǝu ku Mǝlǝm, ndǝ tsatsa'a cha, ndǝ kǝla dalatsǝn. Kala mbudla cha chari tsatsa'akur nyi, a cho tǝutǝ kala mbudla wa. Kǝl ja, ndǝ kǝla tsatsa'a, a cho zǝndǝ kuzhi wa.6 Tlakǝ tǝ na, "A wurtǝya tlau jul nji nǝ dunǝya, mbwar mbukǝnda sǝwatǝ. Ya wurtǝya sǝuwandǝ laku kǝnda ii, a tsǝu ndǝr ma'i da kwa wa. A shantǝ nji mǝlǝm kǝnda ka mbwar ki, nda ma a nja hǝya mada ndǝ zhang kwa wa, a ndǝr ngya da kwa wa.7 "Ya na, vǝlvǝl nji ɗa kwa nda lǝvǝr ɗa, ndo dlǝukǝri na ɓatla, a da kwa ɓǝla hǝnda jigadǝma kǝnda wa, atǝ kǝra dǝhǝ sǝnda tǝɗǝ himi tǝkǝri nǝnda. Kǝl ja, nda ɓǝla kusa mǝr sǝ hiɗahiɗa tǝwa sǝndo kalta i.8 Aka ǝnga Tlakǝ tǝ na, 'Sǝkǝma biji nda yo hya'atǝ ka ya ngǝl jul nji. Aka a hǝrtǝya yo tsǝmǝtǝ nya pampam ka nda ɗa ka daɓǝdzǝr dlamanji nǝ tǝltǝl i, aka ya pǝkǝnda huɗǝtla ɗa nda kwa ngi wi hu'u ana dǝhǝkura ngikǝ'i ɗa. Aka wi ngǝ tǝ huɗǝtla ndǝr shishir nyida, huɗǝtla ɗa kwangia wi hu'u, dǝhǝkura dunǝya kwa ngia."
jul nji tǝ tubi
9" Vǝl, aku bijinda yo bǝlati jul nji, ya ndo pǝtlǝnya na'a zhang ta ɗa, a da ndo mǝr nǝ katǝ wa. Ndo nǝu nya ya. 10 Mada ngǝ Ethiopia naɗǝ, nji ɗa wiɗa, kwa shili ɗa ga'a. 11 "Atǝ biji nda a da njo nǝhi sǝr kuzhi, aka sǝr kalta nǝ mwali da hya mǝrtǝ ɗa wa. Aka yo fa'abiya njir hǝkǝr nǝnda, ana njir bukǝr nŋda ku huɗa hi. A da tsǝu hyo hǝkǝr nǝhi a kyatǝ dǝgǝl dǝgal ngǝ wa. 12 Yo ngyar nji inda kyua'a ana nji inda kǝla dunama aku pama hi, ndo gwa'a mbwar mbu a tsa Tlakǝu. 13 Hǝyadzǝr njir Israila do ɓǝla mǝr ɗimikur sǝkǝ wa, ya a da do tlagǝzhi wa, a da njo uya gǝzhi ku nyanda ndara shakǝr tǝ kyara nda wa. Ndo ɓǝla, ndo piya, a ndǝ ndo lǝvǝr na nda wa.
Miyar hirgyaɗi
14 Njir Israila, na miya na hirgyaɗi! Mǝr hirgyaɗi na chamǝr ɗufu, Urshalima! 15 Tlakǝ ngyartǝ ealta ngha, ngǝ cha gǝdlǝnda ndǝr dawa ngha. Tlakǝ Tǝl Israila kwa pama hi cha, a da tsǝu ko ngatǝ lǝvǝr mwandǝzhi wa. 16 Pishinda yo nar nyi Urshalima, 'Ngwa da lǝvǝr Sihiyona wa, ngwa chaka da ɗa shishi'u wa. 17 Hyel Tlakǝ ngha ku pama hi cha, ndǝr pah cha, ndǝr nǝnghǝ kura. Cho mǝr hirgyaɗi ana chamǝr ɗufu tǝkǝra ka, cho nǝnghǝ taɗǝr dunama aka cho nyida ngha, cho na miya na dunama tǝkǝra ka, 18 wi nda njo ɗa ka mǝr pishir ladǝr. "Yo hǝnda mwandǝzhi a tsa hi, a da tsǝu hyo sa kuzhi nyi sǝkǝ wa . 19 A ku biji nda, ya ealta tǝ dǝhǝ njir mǝr 'ua'uramkur nǝhi. Yo mbǝɗandǝ ndǝr gadal, ba ya tsǝmǝtǝ nji inda nja gǝdlǝ nda, yo mǝrtǝ nda ɗa ka sǝr fala, ǝtsǝu yo gwa'atǝ nda mǝr tlǝm, atǝ dǝhǝ mbwa nda nda sa kuzhi ti. 20 A ku biji nga yo ɓǝl na hya shilo ki, a ku biji nda ya tsǝmǝtǝ hi. Yo gwa'atǝ hya mǝr tlǝm, hya uya fala a ku dǝhǝ jul nji nǝ dunǝya, sakanda ya ɓǝlandǝ hi sǝnda nǝkǝ hi. Ya hyo la'a na li. "Naya Tlakǝ nga tǝ na."