119
1 Nji papa'akur nga nji nda kəla bikəu,
njinda kwa ngya ku gadlagadla nə Tlakəu.
2 Nji papa'akur nga nji nda kwa nəu gadlagadla nyi
ndo gwa'anyi na dəhə ɗəfwanda.
3 Nda kwa mər səkəla ɗa mada zhang wa;
ndo ma'i ku lakur Tlakəu.
4 Nakə ngə tə nəea gadlagadla
ka ea ɓəlatə na jiri.
5 Kwa da ya i ya ɗa na jiri
ku ɓəla tsaubar ngha!
6 Ma ya sɨndzhi hima da dəhə tsaubar ngha,
a da ya kwa sa kuzhi wa.
7 Yo falngha ana ɗəfu nda tsatsa'a
ku sakanda ya dlədləɓətə gadlagadla nda tsangəu.
8 Yo ɓəlatə tsaubar ngha;
ngwa ka da ngya ɗa wa.
9 Təwa bari zər tlaka kwa nau ɓəlatə laku na Kartikura?
Kəl təwa kəriwa kur nə ɓwanya ngha.
10 A na ɗəfwa ya zhang ya kwa gwa'angha;
ngwa ka da ngya ɗa ya tyatinda tsaubarnghə wa.
11 A ɗəwanda təya ɓwanya ngha ku ɗəfwa ya
tsa ya da mərtənghə səpəla'a.
12 Fala a ngyatə nənghə, Tlakəu;
dlədləɓə tə ɗa tsaubar ngha.
13 Ana kurakə
yo nabiya dəhə gadlagadla nda ka nəea.
14 Yo ngatə hirgyaɗi ku nəu tsaubar ngha
ndiya matsa ndə nda tə uya gəna.
15 Yo ngwahi təkəra tsaubar ngha
ya kwa jigadəma təkəra laku ngha.
16 Yo mər hirgyaɗi na tsaubar ngha;
A da ya kwa far na ɓwanya nghə wa.