102
1 Ngatə pətlənya ɗa Tlakəu,
ngwa gədi ɗa ka vala yada ka.
2 Ngwa ka da mbunda hhuɗəmaka tsaya
ku sakanda aku ɓwaɓwatu w.
3 Aka hanyi ɗa kwa wura wi ndəkə eyar;
dza ya kwa ngiɗa wi hu'u.
4 Ɗəfwa ya na shiləka, 'ultə wi sar;
Ya far na kwasə ɗəfə ɗa.
5 Ngam ngi'i ɗa 'ual'ualəu
a nguvi təya kəl chi na ɗəhi ngə həyadza.
6 Aɗatəya wi ngə shatəli ku dadil,
wi ngə shatəli tə vir ki.
7 Ya kwa piya kəla nji hanyi
wi eyakə zhang tanyi kyatə kəra vi.
8 Pa'a pəchi njir dawa ɗa kwa ngəl ɗa;
nji inda kwa char ɗa həyatəvi kwa nga tləm ɗa tə shu'a.
9 Pətsəɗə ngə sərsum ɗa
sələm ɗa gwaɗətə dzə na sər sa ɗa
10 ngam huɗətla ngha 'ual'ualəu,
aka ka hətə ɗa shi ga vakənda ɗa.
11 Hanyi ɗa wi shanguɗa akəu;
ya kwa 'ula wi ngə tə sar.
12 Amma nakə, Tlakə kwa ku dzəga təlkur ka ba'anawa;
dəhə nji inda kwa ɗa nda shili kwa ɗənghatə naka.
13 Ko hya'atə ko ngatə tuhuɗə ihiyona,
aka biji ɗatə nda ko mərtənyi mənakəkur;
biji nda nja fiya shiltə.
14 Mavinghə kwa nyida nyi,
mada ngə nja səwandə nyi;
nda kwa ngatə tuhuɗənyi,
mada ngə aɗatə cha wi mbwar ki.
15 Alinya jul nji kwa ləvər tləmər Tlakəu,
dəhə təl i nə dunəya kwa ləvər gyalkur nyi.
16 Aka Tlakə kwa ɓəla hərtə Sihiyona səkə
cho chabiya dəgalkur nyi.
17 Cho wum pətlənya nə nji tutətuta
a cho ngyar gədi kənda wa.
18 Ngwa nja tsəfəbiya sə'inga nə nji inda kwa shilia hi,
aka nji inda tsəu nji kəla ya nda fal Tlakəu:
19 Natə nda Tlakə tə dzam səya
hya'atə kya huɗaməlləm.
Cha ndzam dunəya səya hya'atə kya huɗamməlləm,
20 ga cha ngatə ngi'i nə nji inda ku jarum
aka wundə nji nda nja tlanda nda nəumar ta.
21 Tsaka njo bəzəya tləmər Tlakə ku Sihiyona
njo falnyi ku Urshalima
22 sakanda nji ana təl-təl i
tɛ tsəmtə dzə ga həsəli nƏ Tlakəu.
23 Tsəu ta ɗa zərə cha həya dunama ɗa;
ga həya hanyi ɗa i.