Miya usaku
92
1 Sə mənakə nga nja fal Tlakəu, nja na miya ka dəgalkur tləmə nyi, Hyel nda tə ndiya na səli, 2 nja bəzə nyida ngha əmbudla, jirikur nghə tsəu aba'akəu, 3 nja na miya sə tsatsa i ana kurakər zəmbəl ba'a gulum. 4 Yawa ja Tlakəu, aka tlər ngha tə na'a hirgyaɗi, yo na miya hirgyaɗi ka tlər nda cha tə məra. 5 Tlər nghə ɗati 'ual ja Tlakəu, jigadəma nghə ɗati dzəuɗaku! 6 Ndə kəkəng da kwa zəndə wa, ndə kəla dəma da kwa ngabiya wa, 7 mada ngə nji kəmangər kwa ha wi ngə tə sar, njir mər sə ɗimi kwa mər gəna, dəhə ka ənga njo səwandə nda. 8 Amma nakə Tlakəu, ana səli ka ka ba'anawa. 9 Tlakəu, a zəndə tə ea təkəɗə ənda njir dawa ngha kwa kuɗa, dəhə njir mər sə ɗimi tsəu njo kura nda ya ndo wiɗətədza. 10 Ka mərtə ɗa na dunama wi gyal tla nda kwa pah; ka səkə ɗa papa'akur ana hirgyaɗi. 11 A la'a təya ənda nja kura njir dawa ɗa, ga ngatə ənda nji ɗimi kwa ləla. 12 Nji'inda tsatsa'a na Hyel kwa ɗəɗa wi ngə tə wur kucha'a, ndo ha wi ngə tə wur seda nə hə'i Lebanon; 13 chichinyi ku ki Tlakəu, ndo ɗəɗa ku mbwa'alə Hyel kəmən. 14 Tsəu ta nda kwa ya mada ku halhalkur kənda, ndo ngya kuɓətə ya dukudukwa ana dunama. 15 Nacha ngə tə chari ənda Tlakəu, ndər mər sə tsatsa'a cha; nacha ngə mangu ɗa, a da ɗimikur da ku cha wa.