Hyel nda pa'a kwa ta
90
1 Tlakəu, nakə nga ɗa ka mbwar ngya kə ea wa'atanyi. 2 Təvi ka ɓatlə məa ndara hə'i ana dunəya, nakə Hyel zhinyi ya Hyel kə səngha ka ba'anawa. 3 Ka ɓəlandə ndəu a go hə'i, ka na, <<Ɓəl ma go hə'i nahi nji.>> 4 Aka hanyi gharu kumnyi (1000) nəngha wi hanyi zhang cha, wi nda ənnə cha, wurta təra. 5 Ko fa'a nji wi nda madagulɓa ɓiti kwa məra; wi ngə shuni a da kwa ngya wa, əmbudla papiya da sar nda kwa tsə ea, 6 ɗo ha kwa biyandi mambəl, ya a ba akəu tə tə cha ga ula. 7 Ea səuwa təwa huɗətla ngha; təwa huɗətla nghə tsəu ea gwa ku ɓwaɓwatu. 8 Ka fiya səpəla'a kəea a huɗəngha, səpəla'a kəea nda tə ɗəwa atə mbwa chamə ngha. 9 Huɗətla ngha gachiya tə hanyi pya ea, ea wurandə fa kə ea na tsəhuɗəu. 10 Ɗangkura hanyi kə ea fa məɗəfəkumnyi tanyi, əngəwa chisəkumnyi, ma cha tsəu tanyi dunama tsa ea, dəhə ka ənga wuɗəkənya sənda fa inga kwa shilna ea, nacha ɓwaɓwatu ana huɗətla; ahir nga ndo tərabiya ba'a nəkə ea wura. 11 Wa kwa nau zəndəbiya gyalkur huɗətla ngha? Wa kwa zəndə sənda ləvər huɗətla ngha kwa shilna? 12 Dlədləɓətə ea, ea zəndə ənda hanyi kə ea nə bəji kushu tanyi nga, təwa banga ea uya ɗəfu nə dəma.