51
1 Yawa ja Hyelləu, ngatə tuhuɗə ɗa,
aka ngam nyida ngha da pa kwa wura.
Aka tuhuɗəngha nda 'ualəu
chinda səpəla'a ɗa!
2 Chinda dəhə ɗimikur ɗa
ka mərtə ɗa cham tsa səpəla'a ɗa i!
3 Aka a zəndə təya bikə ɗa,
ya səpəla'a ɗa wa'atanyi a huɗə ɗa.
4 A mərtə nghə təya səpəla'a, a nənghə səngha
ya mərtə sənda ɗimi tə lya ka.
Aka ənga jiri tsaka ku sakanda ka mərtə ɗa nəuma,
tsatsa'a ngə ka tlanda ɗa nəuma.
5 Vələu, ndər səpəla'a ya nda nja ya ɗa,
ghəya tə bəjir hə huɗə ɗa ndər səpəla'a ya.
6 Sənda vəlvəl ana jiri nacha ngə ko i;
nyandə jigadəma ɗa ana dəmangha.
7 Handa səpəla'a ɗa, yo ɗa chaməu;
chanda ɗa, yo ɗa pərtə ndiya matsa pərpa'ua.
8 Ngwa ya ngatə hirgyaɗi ana chamərta;
mada ngə ka dzədzandə ɗa, ka ɓəɓəliya ɗa, dəhə ka ənga
yo ɓəla ɗa na hirgyaɗi səkəu.
9 Mbunda huɗəmaka tsa səpəla'a ɗa
ka zhazhanda dəhə səpəla'a ɗa.
10 Hyelləu, ɓatlətə ɗəfu cham aku ya,
ka fu ɗa taɗər shanguɗə nə kəri'u aku ya.
11 Ngwa ka da gədlənda ɗa manghə wa
ndara ka hənda Shanguɗə Karti nghə tsaya wa.
12 Ɓəla ɓəlandə hirgyaɗi nə dləuya nghə səkəu,
ka ɗaɗa shanguɗə nə dləukəri, na kəri'u.
13 Tsaka yo dlədləɓə tənyi laku ngha nə njir səpəla'a,
yo ndo ɓəl shil da ka.
14 Far bikə ɗa nə pənda mashi, nakə Hyel nda dləuya ɗa,
tsaka yo na miya nə hirgyaɗi aka ka far na bikəɗa.