Pəchir Mirga
16
1 Kǝl ngǝ Tlakǝ tǝ ɓwanya na ahir tǝr ngulisha'a shili nǝ Haruna mǝtlǝu, inda kuɗa ku sakanda nda shili mar Tlakǝu ku tari kartikur. 2 Tlakǝ tǝ ndǝr na Musa bǝra, "Ka nar nyi nǝ zamǝnghǝ Haruna bǝra gwa cha da ba gwa ku Vi nda Ndiya na Karti a biyahir miɗi aku dǝhǝ biji nda nda cha i tǝ wa.Aka a tǝ mbwanga yo chabiya kǝr ɗa aku lǝbǝkǝu a kyatǝ sǝr haɗǝ nya gwarara nǝ mbandǝr, aka nacha ngǝ mbwar mǝr mirga nǝ sǝpǝla'a. Ma cha ngyar ɗa kǝriwa na gadlagadla nga, cho tah. 3 Janǝ ǝnda Haruna kwa gwa ku Vi nda Ndiya na Karti. Cho nau gwa ahir ma cha lǝnda zǝr tla aka sǝr hatǝmachi nǝ chinda sǝpǝla'a, ana gama aka hatǝmachi nǝ nginda. 4 Tǝvi cho gwa, kǝl cha waɗǝ na ɓiti cha handzi lukutu nyi nǝ lilen na char nda nja dzǝvǝya nyi na karti anǝ Tlakǝu, Nacha ngǝ, kampi, ana daura, ana gyarakǝn, (sǝr mbadza), ana dora fǝrist. (pahuɗǝ mbakǝr). 5 Njir Israila tsǝu kwa nǝnyi nǝ Haruna bura tsa mǝtlǝu aka sǝr hatǝmachi nǝ chinda sǝpǝla'a, ana gam zhang aka sǝr hatǝmachi nǝ nginda. 6 Haruna kwa lǝnda zǝr gyal tla nda aka hatǝmachi nǝ chinda sǝpǝla'a nyi, ana ka cha mǝrtǝ mirga ka kǝrnyi ana ki nyi. 7 Ətsǝu cho hǝtǝ bura mǝtlǝu inda, cho shili na mar Tlakǝu atǝ gwar nyavi nǝ Madlǝɓa nǝ tsǝmǝdza. 8 Cho ɓǝlshi'u tǝkǝra bura mǝtlǝu inda, ɓǝlshiu zhang nda aka Tlakǝu, zhang ngǝ tsǝu aka Azazel. 9 Haruna kwa shili na bura nda ɓǝlshiu nǝ Tlakǝ tǝ sǝya tǝkǝri, ba cha handa tǝmachi nǝ sǝpǝla'a ni. 10 Bura nda nja tabiya ka Azazel, njo shili na nǝ Tlakǝu na pi. Ma nja sǝti gwatǝ dadil taku, cha ɗa ka mirga nǝ nji. 11 Haruna kwa shili zǝr gyal tla nda ka sǝpǝla'a nyi ana ki yi. Ahir cha tlakǝr wulea tǝkǝra tla nda aka hatǝmachi nǝ sǝpǝla'a, 12 cho nyandi kǝtas nǝ ngi mordi nda kyatǝ dzǝgana amar Tlakǝ nda na ngushi. Ahir cha nyandi cha cha kya'a na shu'ni mordi nda, cho tǝra na kǝtas ana mordi nda biyahir miɗi nda. 13 A biyanda a mar Tlakǝu, cho pǝu mordi nda tǝkǝra ngushi nda kwa ngi nda tsaka ear nǝ mordi nda kwa hya'atǝ kwa haɗiya sǝr haɗǝ nya Gwarara nda, mbwar mǝr mirga, nda na ngya kyatǝ Gwarara nǝ mbandǝr . Macha nǝu ngǝna tsaubar a cho tǝ wa. 14 Tuku tsǝu cho fǝu kwar cha ku mashi gyal tla nda, cho uchitǝ tǝ bama sǝr haɗǝ nya mirga; zhaka mǝɗǝfa tsǝu cho uchitǝ tǝ bama Gwarara mbandǝr. 15 "Kǝl Haruna kwa tlakǝr wulea tǝkǝra bura nda aka sǝr hatǝmachi nǝ sǝpǝla'a nji, ba cha tǝra na mashi nda biyahir miɗi nda. Abiyanda cho uchitǝ mashi nda kyatǝ ɓǝkǝu nǝ Mirga nda, ana biyatǝ bama Gwarara nda, wi nda cha mǝr ana mashi gyal tla nda. 16 A tǝwa ǝnga cho mǝrtǝ mirga anǝ Vi nda Ndiya na Karti, tang wi ngǝ cho mǝr tsǝu nǝ dǝhǝ Madlǝɓa tsǝmǝdza, aka hiɗahiɗakur sǝpǝla'a ana kuranghakur nǝ njir Israila. 17 A da njo i mada ndǝ zhang gwa ku Madlǝɓa tsǝmǝdzǝ sakanda Haruna tǝ gwa ka mǝr mirga aka Vi nda Ndiya Karti wa. A ndǝ ndo gwa wa kǝl biji nda cha zǝbiya sǝkǝu ahir cha wurandi mirga ka kǝrnyi, njir ki nyi, ana dǝhǝ Israila. 18 Haruna kwa zǝbiya biya ka cha mǝtǝrnyi mirga nǝ dzǝgana nda ta'i amar Tlakǝ nda, tǝwa ɓǝsǝtǝnyi mashi gyal tla nda ana nǝ bura nda atǝ kala tǝlǝma dzǝgana inda. 19 Cho fǝu kwar cha cha ku mashi nda, ba cha uchitǝ nyi zhaka mǝɗǝfa tǝ kǝra dzǝgana nda. Tǝwa ǝnga cho chinda nyi tsa hiɗahiɗakur njir Israila, ba cha ɓǝlandi yo kartikur nyi wi nda cha ɗaka ɗa. 20 "Ahir ma Haruna tǝ wurandi mirga nǝ Vi nda Ndiya na Karti, ana nǝ Madlǝɓa tsǝmǝdza, ana nǝ dzǝgana, cho shili bura nda na pi nda. 21 Cho fǝkǝr cha cha kya'a kyo kǝra bura nda na pi nda, cho dǝkǝbiya dǝhǝ sǝpǝla'a ana ɗimikur nǝ njir Israila.Tǝwa ǝnga cho tǝɗǝkǝnyi sǝpǝla'a nǝ nji tǝkǝra bura nda; kǝl ba cha gǝdlǝtǝ nyi gwa dadil taku, tǝwa vanya ndǝ nda nja tabiya ka mar ngǝna zǝba. 22 Ahir ma ndǝ nda tǝ gwa wunda nyi kwatǝ dadil taku, bura kwa tǝra dǝhǝ sǝpǝla'a nǝ nji a gwatǝ mbwanda kǝla ndǝ kwa. 23 Haruna kwa gwa ku Madlǝɓa nǝ Tsǝmǝdza, cho sǝɗǝnda lukutu nǝ lilen nǝ fǝrist nda cha handzi tǝvi cha gwa ku Vi nda tǝ Ndiya na Karti, ba cha ngyar lukutu nda ku nda. 24 Cho chinda dza cha ana ɓiti atǝ vanya mbwa karti, kǝl ba cha handzi vanya lukutu nda cha tsǝl na ha. Ahir nga cho zǝbiya lǝnda tǝmachi nǝ nginda ka kǝrnyi ana tǝmachi nǝ nginda ka nji, cho mǝrtǝ mirga nǝ kǝrnyi ana nǝ nji. 25 Cho nginda dǝhǝ mal nǝ hatǝmachi nǝ sǝpǝla'a nda kyatǝ dzǝngana. 26 Ndǝ nda nja tabiya ka cha sǝtǝ bura nda gwa ndadil takǝu aka Azazel, tuku cho chinda lukutu nyi ana cho waɗa aku ɓiti. Ahir nga cho nau ɓǝla go ngakǝu. 27 "Gyal tla ana bura nda nja shili ni ka sǝr hatǝmachi nǝ chinda sǝpǝla'a, nda Haruna tǝ shili na mashi kǝnda aku Vi nda Ndiya na Karti aka miraga nǝ njir Israila, njo tǝra biyahir ngakǝu; chi kǝnda, halinda, ana shaɗa nda dǝhǝ njo nginda. 28 Tuku ndǝ nda ngina nda chinda lukutu nyi, ana cha waɗǝ na ɓiti; ahir nga cho nau bǝl shili ku ngakǝu. 29 "Nǝn nǝ ngǝ kwa ɗa batbatǝr tsaubar nda ɓǝl nyi dawa a nǝhi: Pǝshir hany kumma nǝ hya mǝɗǝfa, tuku hyo sǝm dzǝn, a da hyo mǝr tlǝr ba da kushu wa, mada mihiɓi ku pama hi ndara ndǝr Isarila yah yah nyi. 30 Aka pishinda ngǝ njo mǝr mirga aka hi, aka nja chinda hi tsa dǝhǝ sǝpǝla'a kǝ hi, aka hya ɗa nji karti amra Tlakǝn hi. 31 Nacha ngǝ kwa ɗa ka bijir ɓǝlsar nǝ hi, wi ngǝ tǝ pǝchir ɓǝlsar Asabat, ya hyo sǝmdzǝn. Nacha nga tsaubar cha ba'anawa. 32 A biyama, fǝrist nda nja tabiya ga dzǝvǝyanyi ku kartikur ka cha ɗa ka dǝgalǝr fǝrist tǝ mǝngyar adanyi kwa mǝr mirga. Cho handzi lukutu lilen nyi nǝ char ǝnda dzǝyanyi tǝ nji 33 ba cha mǝrtǝ mirga aka Vi nda Ndiya na Karti, ana Madlǝɓa nǝ tsǝmdza, ana dzǝgana, ana fǝrist ii, ana dǝhǝ dlama nji. 34 "Nacha ngǝ gadlagadla nda ba'anawa a nǝ hi : Njo mǝr mirga zhaka zhang ku fa aka dǝhǝ sǝpǝla'a njir Israila." Musa tǝ mǝr wi nda Tlakǝ tǝ nar nyi cha mǝra.