Sə inda kwa Biya ku Dza Ndəu nda kwa Mərtə Nyi Hiɗahiɗa
15
1 Tlakǝ tǝ nar nyi nǝ ka Musa na Haruna, 2 "Nda ndǝr na Israila, nda natǝ nda: 'Dǝhǝ nda na sǝu kwa dzǝ ku kwala cha, sǝ ngǝ kwa dzǝ nga mǝrtǝ nyi tǝ kǝla karti. 3 Mada sǝ ngǝ kwa dzǝ nga tǝ ma'i biyama na dzǝa, mada tǝ ta'i. Mada tǝwa bari hca ndǝ nga gyatǝ kǝla karti. 4 Dǝhǝ sǝnda ndǝ ngǝ tǝ piyati, a ɗatǝ kǝla karti. Dǝhǝ sǝnda cha gyati, aɗatǝ kǝla karti. 5 Dǝhǝ ndǝ nda tǝ tsǝkari sǝr piya nyi, kǝl cha china lukuu nyi, cha wuɗǝ na ɓiti, kǝl ja, dǝhǝ ka ǝnga cho ɗa kǝla karti ba'a nǝ akǝu. 6 Dǝhǝ ndǝ nda gyatǝ mbwar ngya nda ndǝ ngǝ sǝ kwa dzǝ ku dza cha nga kwa ngya, kǝl cha chinda lukutu nyi cha waɗa ana ɓiti, kǝl ja, dǝhǝ ka ǝnga cho ɗa kǝla karti ba'a nǝ akǝu. 7 Dǝhǝ ndǝ nda tǝ tsǝkari dza ndǝ nda sǝ kwa dza dzǝnyi, kǝl cha chinda lukutunyi, cha waɗa ana ɓiti. cho ɗa kǝla karti ba'a nǝ akǝu. 8 Mada ndǝ ngǝ sǝ kwa dzǝ dzǝnyi ngǝ tǝ tǝfǝtǝnyi tuli nǝ ndǝ nda karti, yau, ndǝ nda nja tǝfǝtǝnyi tuli nda kwa chinda lukutu nyi, cha waɗǝ na ɓiti, kǝl ja, dǝhǝ ka ǝnga cho ɗa kǝla karti ba'a nǝ akǝu. 9 Dǝhǝ sǝr ngya kyatǝ ya taku nda ndǝ sǝ kwa dzǝ dzǝnyi ngǝ tǝ ngyati, kwa ɗa kǝla karti. 10 Dǝhǝ nda tsǝkari sǝnda ndǝ ngǝ sǝ kwa dzǝa dzǝnyi ngǝ tǝ ngyati, cho ɗa kǝla karti ba'a nǝ akǝu. Ndǝ nda hǝtǝ sǝnda ndǝ nda tǝ tsǝkari ndara cha ngyati, cho chinda lukutu nyi cho waɗǝ na ɓiti, kǝl ja, dǝhǝ ka ǝnga cho ɗa kǝla karti ba'a nǝ akǝu. 11 Ma ndǝ nda sǝ kwa dzǝ dzǝnyi nda tǝ tsakar vanya ndǝu, ya da tsa'ana cha chinda cha cha na ɓiti wa, yau, kǝl ndǝ nda nja tsǝkar nda chinda lukutunyi cha waɗa ana ɓiti, kǝl ja, dǝhǝ ka ǝnga cho ɗa kǝla karti ba'a nǝ akǝu. 12 Tǝm yingha nda ndǝ nda sǝ kwa dzǝ dzǝnyi nda tǝ tsǝkari njo huɓunda, kǝl ja, dǝhǝ ka ǝnga sǝnda nja ɓatlǝ na wua nda cha tsǝkari njo chinda nyi na ɓiti. 13 Sakanda ndǝ nda sǝ kwa dzǝ dzǝnyi nda tǝ mbǝa, kǝl cha jigatǝ hanyi mǝɗǝfa tǝvi njo chinda nyi. Cho chinda lukutu nyi, cha waɗa ana ɓitir tsǝtsǝɗǝu, cho ɗa na karti. 14 Pǝshir hanyi tsǝkunyi cho shili mbǝtla tsa'a mǝtlǝu, ǝngǝwa nguli mbǝtla masar mǝtlǝu, amar Tlakǝu, atǝ gwar nyavi nǝ Madlǝɓa daɓǝdza, cho nǝnya nǝ fɛrist. 15 Kǝl ba fǝrist lǝnda zhang ku huɗa nda aka sǝr hatǝmachi nǝ chinda sǝpǝla'a, zhang tsǝu aka sǝr hatǝmachi nǝ nginda. Tǝwa ǝnga fǝrist kwa mǝrtǝ tsaubar nǝ mirga aka ndǝ nda, a mar Tlakǝu, aka dzǝnda sǝnda dzǝnda. 16 "Dǝhǝ sakanda pǝ ndǝ tǝ pǝa, yau, kǝl cha chinda dǝhǝkura dza cha ana ɓiti, kǝl ja, dǝhǝ ka ǝnga cho ɗa kǝla karti ba'a nǝ akǝu. 17 Dǝhǝ lukutu ndara chi nda pǝ nda tsǝkari, njo chinda na ɓiti, kǝl ja, dǝhǝ ka ǝnga ndo ɗa kǝla karti ba nǝ akǝu. 18 Ma sal tǝ piya na malakǝu, ya ngǝ pǝ tǝ biya, dǝhǝkura nda ndo waɗǝ na ɓiti, kǝl ja, dǝhǝ ka ǝnga ndo ɗa kǝla karti ba'a nǝ akǝu. 19 "Ma malakǝu ku dǝkǝsǝu, cho ɗa kǝla karti nǝ hanyi mǝɗǝfa, ǝtsǝu dǝhǝ nda tǝ tsǝka nyi, cho ɗa kǝla karti ba'a n akǝu. 20 Dǝhǝ sǝr piya nda mala nda tǝ piya tǝ ndara cha ngyatǝ ku bijir dǝkǝsǝ nyi, a ɗatǝ kǝla karti ba'a nǝ akǝu. 21 Dǝhǝ ndǝ nda tǝ tsǝkari sǝr piya nyi, cho chinda lukutu nyi, cho ɗa waɗa ana ɓiti, dǝhǝ ka ǝnga cho ɗa kǝla karti ba'a nǝ akǝu. 22 Dǝhǝ ndǝ nda tǝ tsǝkari vanya sǝnda cha ngyatǝ, cho chinda lukutu nyi ba cha waɗǝ na ɓiti, kǝl ja, dǝhǝ ka ǝnga cho ɗa hiɗahiɗa ba'a nǝ akǝu. 23 Ndara kǝlabu (gangǝr) cha, ndara tsǝu vanya sǝnda cha ngyati, sakanda vanya ndǝ tǝ tsakari, cho ɗa hiɗahiɗa nyi ba'a nǝ akǝu. 24 Ma vanya sal tǝ piya na cha, hidahiɗakur nya tsǝkanyi ti, cho ɗa hiɗahiɗa nyi hanyi nǝ hanyi mǝɗǝfa. Dǝhǝ sǝnda sal nda tǝ piya tǝ kwa ɗa hiɗahiɗa. 25 "Ma mashi kwa nǝu malakǝu hanyi mǝɗǝfa, ahir cha wurandi hanyi dǝkǝsǝ nyi, ndara tsǝu hanyi dǝkǝsǝ nyi tǝ tǝrabiya sǝnda tǝ ki, yau, cho ɗa hiɗahiɗa mǝlmǝl wi ɗangkura hanyi nǝ dǝkǝsǝ nyi nda cha tsǝl na mǝra. Ma cha wurɗa mashi kwa nǝunyi ɗatǝ cha hiɗahiɗa ndani. 26 Dǝhǝ sǝr piya nda cha piyatǝ ndara cha ngyatǝ aku hanyi inda mashi kwa nǝunyi, kwa ɗa hiɗahiɗa nyi wi ngǝ tǝ nǝ bijir dǝkǝsǝnyi. 27 Dǝhǝ ndǝ nda tǝ tsǝkari sǝ ingǝn nga, cho ɗa hiɗahiɗa nyi. Kǝl cha chinda lukutu nyi, cha waɗa ana ɓiti, kǝl ja, dǝhǝ ka ǝnga cho ɗa hiɗhiɗa ba'a nǝ akǝu. 28 Ma sakanda mashi tǝ ta'indi nǝu mala ku bijir dǝkǝsǝnyi, kǝl cha jigatǝ hanyi mǝɗǝfa. Ahir nga cho ɗa kǝla hǝɗa (cho ɗa karti). 29 Pǝshir hanyi chisǝkunyi cho shili mbǝtla mǝtlǝu, ndara nguli mbǝtla masar mǝtlǝu, cho shili na nyi nǝ fǝrist atǝ gwar nyavi nǝ mǝdlǝɓa tsǝmǝdza. 30 Kǝl ba fǝrist ɗa lǝnda zhang ka sǝr hatǝmachi nǝ chinda sǝpǝla'a, zhang ngǝ tsǝu ka sǝr hatǝmachi nǝ nginda. Tǝwa ǝnga fǝrist kwa nyabiya tsaubar nǝ mirga aka cha, amar Tlakǝu, aka mashi nda kwa nǝunyi nda tǝ mǝrtǝnyi hiɗahiɗa. 31 "Tǝwa ǝnga ko tǝkǝbiya Israila na hiɗahiɗakur kǝnda, aka nda ɗa ba mǝrtǝ ɗa madlǝɓa ngya ɗa ku pama nda hiɗahiɗa, a tsa nda ɗa ba tǝ ku hiɗahiɗakur kǝnda. 32 "Nachangǝ tsaubar tǝkǝra dǝhǝ ndǝ nda sǝ kwa dzǝ ku kwala cha, ana ndǝ nda tǝ ɗa hidahiɗa tǝwa pǝ nyi nda pǝa. 33 Nacha ngǝ tsǝu tsaubar nga tǝkǝra mala nda ku bijir dǝkǝsǝu, ana ma'a nda mashi kwa nau nyi, ndara malakǝu ndara sal, ǝtsǝu tǝkǝra ndǝ nda tǝ malakǝu nda hiɗahiɗa."