Ənda Nji inda Shiləkə tə Biya Dzən Nda Kwa Ɗa Chichi nyi
14
1 Ənda njo chinda ndǝr shilǝkǝ bibi tǝ nar nyi Musa bǝra, 2 "Nǝngǝ tsaubar nda njo nǝu pishinda njo chinda ndǝr shilǝkǝ bibi. "Njo shili na cha amar fǝrist. 3 Fǝrist kwa tǝra na cha biya hir ngakǝu ka cha ndzamar nyi. Macha ndǝr shilǝkǝ nda mbǝti na shilǝkǝ ɗimiɗimi nda, 4 fǝrist kwa na nja shili na eakǝu inda na karti tsa mǝtlǝu na pi, ana wur seda, ana pa'ua tsa sǝu dǝzǝu, ana hyali izob aka ndǝ nda njo waɗǝ nda. 5 Kǝl ba fǝrist na nja tlakǝri wulea kǝra zhang ku huɗa eakǝu inda kyatǝ kǝra tǝm yingha nyinyi na ɓitir tsǝtsǝɗǝu. 6 Ahir nga, cho hǝtǝ eakǝu nda zhang na pi, ana wur seda, ana pa'ua dǝzǝu na tsa sǝu, ana hyali izob, cho chiu nda dǝhǝ go mashi eakǝu nda nja tlakǝr wulea kyatǝ kǝra ɓiti nda. 7 Kǝl ba cha uchitǝ mashi nda zhaka mǝɗǝfa tǝkǝra ndǝ nda njo chi nda tsa shilǝkǝ bibi ɗimiɗimi nda. Ahir nga, kǝl ba cha bǝzǝya ǝnda ndǝr shilǝkǝ nda ndǝ karti nga, ǝtsǝu ba cha wunda eakǝ nda na pi cha tǝra kyo lea wua. 8 Nacha nda nja chinda nyi tsa shilǝkǝ bibi nda, kwa chinda lukutu nyi, cho sǝnda shishir kǝra cha, cho wanɗǝ na ɓiti. Ya cho ɗa na karti. Ahir nga cho ɓǝla yo pama nji, kǝl ja, a cho ngya ku madlǝɓa nyi wa nǝ hanyi mǝɗǝfa. 9 Pǝshir hanyi mǝɗǝfa kumyi cho sǝnda dǝhǝ shishi nyi, ana shishir tǝngha cha, ana shizhir lea cha, ana hǝyadzǝr dǝhǝ shishi nda dzǝnyi cho sǝnda. Tuku cho chinda dzaki nyi ba cha waɗǝ na ɓiti, ya ǝngǝ cho ɗa karti. 10 "Pishir hanyi chisǝkunyi, tuku cho shili na gam mǝtlǝ ana mala kǝtǝng zhang nǝ fa zhang, dǝhǝ nda kǝla tekǝm, ana kilo makǝr nǝ ǝpu kuɓǝtu, nda zǝkǝutǝ makǝ mar zhang ku lita makǝr nǝ mal zaitun. 11 Kǝl fǝrist nda kwa zǝba kwa shili na ndǝ nda ka waɗa, dǝhǝ ka sǝr hatǝmachi inda, amar Tlakǝkǝ, tǝ gwar nya madlǝɓa daɓǝdza. 12 Fǝrist kwa hǝtǝ zhang ku pama gam mǝtlǝ inda ana mal zaitun nda, ba cha lǝnda ka sǝr hatǝmachi nǝ zhazhanda bikǝu, a tǝwa hatǝmachi nǝ har shi huɗamǝllǝm nǝ Tlakǝu. 13 Cho tlakǝri wulea tǝkǝra gam nda tǝ mbwa karti, mbwa nda njo hatǝmachi nǝ sǝpǝla'a ti, ana njo tla wulea nǝ hatǝmachi ka nginda. Wi ngǝ tǝ hatǝmachi nǝ sǝpǝla'a, ǝngǝ hatǝmachi nǝ bikǝu, mbaɗǝ nga nǝ fǝrist. Nǝnna hatǝmachi ana karti cha gagaɗa, nja mǝr nyi wi nda tǝ tsaubar tǝ chari. 14 Fǝrist kwa gǝtsi mashi hatǝmachi nǝ zhazhanda bikǝu, cho ɓǝsǝti nya tǝ chichir himi nǝ chisǝma ndǝ njo chinda nda, ana dǝnyar cha cha nǝ chisǝm, ana dǝnyar hi nǝ chisǝma cha. 15 Fǝrist tsǝu kwa gǝtsi mal, cho pǝti atǝ huɗa cha kǝrnyi nǝ matsal, 16 ǝtsǝ cho fǝu kwar cha cha nǝ chisǝm a go mal nda tǝ huɗǝ ca matsala cha nda, ba cha uchitǝ zha mǝɗǝfa a mar Tlakǝu. 17 Aku hǝyadzǝr mal nda ku huɗǝ cha fǝrist nda, fǝrist kwa gwa'ari cho ɓǝsǝti nya tǝ chichir himi nǝ chisǝma ndǝ nda njo chi nda, ana dǝnyar cha cha nǝ chisǝm, ana dǝnyar hya cha nǝ chisǝm, kyatǝ kǝra mashi hatǝmachi nǝ zhazhanda bikǝu nda. 18 Mal nda tǝ hǝyadzǝ nda, fǝrist kwa pǝu gyo kǝra ndǝ nda. Tǝwa ǝnga fǝrist kwa mǝrtǝ mirga a mar Tlakǝu aka ndǝ nda nja chinda nda. 19 Aɗatǝ tuku fǝrist kwa hatǝmachi ana cha mǝrtǝ mirga nǝ chinda sǝpǝla'a nǝ nda nja mbandi na shilǝkǝ bibi nda. Ahir nga , fǝrist kwa tlakǝri wulea tǝkǝra sǝr shishi nǝ hatǝmachi nǝ nginda, 20 ba lǝnda kyatǝ dzǝgana, tsa'a na ga'ar sǝ zwazwa, ba cha mǝrtǝ mirga nǝnyi, ya aɗatǝ cha karti. 21 Kǝl ja, macha ɗaliɗali ndǝ nda, nda a da cho nau shili na sǝ ingǝ wa, kǝl ba cha hǝtǝ zǝr gam aka sǝr hatǝmachi nǝ hǝtǝ shi huɗamǝllǝm aka mǝr mirga anǝ nǝnyi. Ndǝ nda kwa shili na kilo zhang nǝ ǝpua nda kuɓǝtǝu nda nja zukutǝ ana zhang ku makǝr nǝ mal zaitun nda, 22 ana mbǝtla mǝtlǝ ndara mbǝtla masar mǝtlǝu dladza ǝnda cha nau shili ni. Zhang kwa ɗa ka sǝr hatǝmachi nǝ chinda sǝpǝla'a, zhang kwa ɗaka sǝr hatǝmachi nǝ nginda. 23 Pishir hanyi chisekunyi ndǝ nda kwa shili na nda da fǝrist aka tsaubar nǝ chinda nyi. Njo shili na nda tǝ gwar nyavi nǝ Madlǝɓa tsǝmǝdza a mar Tlakǝu. 24 Fǝrist kwa hǝtǝ zǝr gam na hatǝmachi nǝ zhazhǝnda bikǝu tsa'ana mal zaitun cho lǝtǝ shu huɗamǝllǝm aka sǝr hatǝmachi hatǝ nǝ tlakǝu. 25 Kǝl ba fǝrist tlakǝri wulea tǝkǝra zǝr gam nǝ hatǝmachi zhazhǝnda bikǝn nda. Ətsǝu cho gǝtsi mashi nda cho ɓǝsǝtǝ atǝ chisema chichir hima ndǝ nda njo mǝr tsaubar nǝu chinadzǝ nǝnyi nda. Cho ɓǝsǝtǝnyi nǝ ndǝ nda tǝ dǝnyar cha cha nǝ chisem ana tǝ dǝnyar hya cha nǝ chisǝm. 26 Fǝrist tsǝu cho gǝtsi mal cho ɓǝsǝtǝ atǝ huɗǝ cha cha nǝ matsal. 27 Ana kwar cha cha nǝ chisǝm fǝrist kwa uchitǝ mal nda zha mǝɗǝfa a mar Tlakǝu. 28 Aku mal nda tǝ hǝyadzǝ aku cha fǝrist nda, fǝrist nda kwa gǝtsi cho ɓǝsǝtǝ nya tǝ chichir himi nǝ chisǝma ndǝ nda njo chi nda, ana dǝnyar chacha nǝ chisǝm ana dǝnyar hya cha nǝ chisǝm. 29 Mal nda tǝ hǝyadza, fǝrist kwa pǝunyi gyo kǝra ndǝ nda njo chi nda, aka tsaubar nǝ chinda nyi amar Tlakǝu. 30 Kǝl ba fǝrist ɗa lǝnnda zhang ku huɗa mbǝtla inda ǝngǝwa mbǝtla masar inda, wi sǝnda ndǝ nda tǝ nau shili ni. 31 Zhang kwa ɗa ka sǝr hatǝmachi nǝ chinda sǝpǝla'a, zhang tsǝu aka sǝr hatǝmachi nǝ nginda, tsa'ana hatǝmachi nǝ sǝ zwazwa. Tǝwa ǝnga fǝrist kwa nau mǝrtǝ mirga a mar Tlakǝu tǝ nyar ndǝ nda njo chi nda. 32 Nacha ngǝ tsaubar tǝkǝra ndǝ nda na shilǝkǝ bibi ɗimiɗimi nda kǝla kwa nau shili ni sǝr hatǝmachi aka chinda nyi wi nda njo gwa'a.Tsaubar tǝ kǝra usar ndǝr vuyavuya
33 Tlakǝ tǝ nar nya nǝ ka Musa ana Haruna, 34 "Ma hya gwatǝ hǝ'i Kan'ana nda yo nǝhi ka sǝr fa'aki kǝ hi, ya ngǝ ya shili nahi vuyavuya ku ki kǝhi aku hǝ'i nda, 35 tlakǝr ki nda tuku cho ki natǝ nyi nǝ fǝrist, ǝnda ya la'a vanya sǝu wi ngǝ tǝ vuyavuya ku ki ɗa.' 36 Tǝvi fǝrist kwa dzamǝ ki nda, tuku kǝl nja fa'abiya sǝ dǝhǝu, tsa'aka njo bǝzǝya ǝnda kala sǝu ko kinda kǝla karti cha Ahir nga fǝrist kwa ndzi kwa gwa ka ndzamǝ ki nda. 37 Cho ndzamar vuyavuya nda tǝ dza ɓanghǝtili, ma cha la'a sǝ dugudugu ndara dǝzǝu, ma cha tsǝu vuyavuya nda gwatǝ ndzǝɗaku go dza ɓanghǝtili nda, 38 kǝl ba fǝrist biyatanyi ku kinda, cho hattǝ nya ki nda nǝ hanyi mǝɗǝfa. 39 Pǝshir hanyi mǝɗǝfǝkunyi, cho ɓǝla shili ku kinda sǝkǝu. Ma cha vuyavuya nda wiɗǝtǝdza tǝ ɓanghǝtili nǝ ki nda dǝhǝu, 40 kǝl ba fǝrist ɗa na nja fa'abiya hangu nda pabiya vuyavuya dzǝri nja vakǝnda tǝ mbwa nda kǝla karti a biyahir mǝllǝm. 41 Cho natǝ nyi nǝ nji nda vavǝnda dza ɓanghǝtili nǝ kinda ɗǝhǝu. Kushishiɓi nda ndǝ tlǝɓǝna nda, njo pǝnda tǝ mbwa kǝla karti, a biyahir mǝllǝm. 42 Ahir nga ndo gwa'ari alenya hangu ndo ɓǝllawo yatǝ mbwanda nja fa'abiya inda ti. Ətsǝ njo zukuti taɗǝr nyingha njo ɓǝla yiɗǝti ɓanghǝtili nǝ kinda dǝhǝu. 43 Kǝl ja, ma cha vuyavuya nga bǝla chabiya dzǝ sǝkǝ a hir nja wuranda sǝ ingǝ dǝhǝ, 44 tuku fǝrist kwa ɓǝla yi ndzamǝ kinda sǝkǝu. Macha la'a mbwanda sǝnda ti tǝ ɓǝla yatǝdzǝ sǝkǝu, a char tǝ ɓanghǝtili nda sǝwatǝ pa'a ana vuyavuya, ya kinda ɗatǝ kǝla karti. 45 Kǝl ba nja huɓǝnda kinda, ana hangu inda, ana ɓanghǝtili nda, ana mǝghyaghi kinda, nja tǝura na nda biyahir mǝllǝm kyatǝ mbwa nda kǝla karti. 46 Dǝhǝ ndǝ nda go kinda ahir nja haɗǝnda nyaki nda, cho kǝla karti ba'a nǝ akǝu. 47 Dǝhǝ ndǝ nda tǝ hanyi ku kinda, ana dǝhǝ ndǝ nda tǝ sǝm sǝrsǝm ku kinda, kǝl cha chinda lukutu nyi. 48 "Kǝl ja, ma fǝrist tǝ shili ndzamar ki nda, ya ga ɗa vuyavuya nda tǝ yatǝdzǝ ahir taɗǝr ghyahi nda nja mǝr nda wa, yau, kǝl ba fǝrist bǝzǝya ǝnda ki ngǝ na karti cha, aka shilǝkǝ vuyavuya nda sati. 49 Aka tsaubar nǝ chinda kinda, fǝrist kwa hǝtǝ eakǝu tsa'a mǝtlǝu, ana wur sida, ana pa'ua tsa sǝu dǝzǝu, ana heli izob. 50 Cho tlakǝr wulea kǝra eakǝu zhang a kyatǝ kǝra tǝm yingha nyinyi na ɓitir tsǝtsǝɗǝu. 51 Cho hǝtǝ eakǝu nda na pi, ana wur sida, ana pa'ua tsa sǝu dǝzǝu, ana heli izob, dǝhǝ cho chiwo go mashi eakǝu nda ana ɓiti nda. Ahir nga cho uchitǝ kinda ni zhaka mǝɗǝfa. 52 Tǝwa ǝnga cho chinda kinda ana mashi eakǝ nda, ana ɓiti hwi hwii, ana eakǝ na pi, tsa'ana wur sida, ana heli izob, ana pa'ua tsa sǝu dǝzǝu. 53 Ahir nga cho wunda eake nda na pi cha tǝra biya hir mǝllǝm a gwa takǝu. Tǝwa ǝnga cho mǝr mirga ka kinda, ki nda kwa ɗa na karti. 54 "Nacha ngǝ tsaubar atǝ kǝra kala chul shilǝkǝ bibi ana hu'ur mǝa, 55 ana shilǝkǝ vuyavuya aku lukutu ana ki, 56 ana sǝ mbamba, ana tekǝma, ana kǝti voa, 57 aka nja zǝndǝbiya ndara sǝ kǝla karti cha nda sǝ karti.