Tsaubar i'i Təkəra Shiləkə inda kwa Biya tə Dza Nji
13
1 Tlakǝ tǝ ɓwanya na ka Musa ana Haruna bǝra, 2 "Macha vanya ndǝ da na sǝ mbamba a dzǝnyi, ndara kǝti, ndara kala mbwar kǝti, nda tǝ sha ka madiya shilǝkǝ ɗimiɗimi a dzǝnyi, kǝl nja yina cha da Haruna fǝrist, ndara zhang ku huɗa ngulisha'a inda Fǝrist. 3 Fǝrist kwa shili dzamar shilǝkǝ nda tǝ chinyi nd. Ma shishi nda tǝ mbwar shilǝkǝ nda tǝ sha ka pǝrtǝu, ya ndzǝɗakǝkur nyi ndiya tǝ shilǝkǝ nǝ chi, aɗatǝ ka shilǝkǝ dlǝvi, kǝl ba fǝrist bǝzǝya ǝnda ɗatǝ cha ka hiɗahiɗa. 4 Kǝl ja, macha shilǝkǝ nda tǝ chinyi nda pǝrtǝu, ya ndzǝɗakur shilǝkǝ nda tǝ gwa ku chinyi wa, ya shishi nda dzǝnyi tsǝu da sha pǝrtǝ wa, ba Fǝrist nda hǝbiya nyi ku pama nji, kǝl cha mǝrtǝ hanyi mǝɗǝfa. 5 Pichir hanyi mǝɗǝfǝkunyi fǝrist kwa ɓǝla shili ndzamar nyi sǝkǝu. Macha shilǝkǝ nda tǝ ɗa wi nda cha haɗa nda tanyi, a da wiɗǝzǝ dzǝnyi wa, kǝl ba fǝrist ɓǝla hǝbiya nyi ku pama nji sǝkǝ kǝl cha ɓǝla mǝrtǝ hanyi mǝɗǝfa. 6 Tǝ pichir hanyi mǝɗǝfa fǝrist kwa ɓǝla ndzamar nyi sǝkǝ. Macha shilǝkǝ nda ghǝya tǝ wura, ya da wiɗǝtǝdza dzǝnyi wa, kǝl ba fǝrist bǝzǝya ǝnda aɗatǝ cha karti, kǝti tanyi nda. Kǝl ba ndǝr shilǝkǝ nda chinda lukutu nyi, aɗatǝ cha na krti. 7 Kǝl ja, macha kǝti nda tǝ wiɗǝtǝdzǝ a dzǝnyi ahir nda fǝrist tǝ ɓǝla dzamǝnyi ga bǝzǝya ǝnda aɗatǝ cha karti, kǝl ba ndǝr shilǝkǝ nda ɓǝla char kǝrnyi sǝkǝ anǝ fǝrist. 8 Fǝrist kwa ɓǝla ndzamar sǝkǝu, macha tsǝu kǝti inda wiɗǝtǝdzǝ dzǝ dzǝr ndǝr shilǝkǝu nda, kǝl ba cha bǝzǝya ǝnda nacha ndǝ kǝla karti cha. Shilǝkǝ bibi nga. 9 "Ma shilǝkǝ bibi tǝ sǝya vanya ndǝ, kǝl nja shili na cha nǝ fǝrist. 10 Fǝrist kwa dzamar nyi. Macha ɗa sǝ mbamba tǝ biyatǝ chinyi pǝrtǝu, ya ngǝ tǝ shandǝ shishi mbwa nda pǝrtǝ, ǝtsǝ ma sǝ mbamba nda tǝ ka kǝti, 11 yau, a chari tǝ bibi halhal kla wur nga. Fǝrist kwa bǝzǝya ǝnda ndǝr shilǝkǝ nga, ndǝ kǝla karti nga. A cho hǝbiya nyi ku pama nji wa, aka nacha ndǝ kǝla karti cha. 12 Kǝl ja, ma bibi nda tǝ wiɗǝtǝ dza dzǝr kumǝr dza cha, ga haɗiya chinyi, ghǝya kyo kǝr ba a nǝ hya cha wi nda fǝrist kwa nau la'a, 13 kǝl ba fǝrist ɓǝla ndzamar nyi sǝkǝu. Macha bibi nda haɗiya tǝ dza cha dǝhǝu, fǝrist kwa bǝzǝya ǝnda ndǝr shilǝkǝ nga ana karti cha. Aka shilǝkǝ nda wurtǝ shar chinyi dǝhǝ tǝ ɗa pǝrtǝ, ndǝr shilǝkǝ nda ndani ɗati karti. 14 Kǝl tsǝu ja, dǝhǝ biji nda kǝti tǝ chabiyadza dzǝnyi, a ɗati cha kǝla karti ndani. 15 Fǝrist kwa ndzamar kǝti nda, ba cha bǝzǝya bǝra ndǝr shilǝkǝ nda ndǝ kǝla karti cha. Kǝti sǝr hǝɗǝ cha, aka bibi nga. 16 Kǝl ja, ma kǝti nda tǝ ɓǝla sha pǝrtǝ sǝkǝu, yau, kǝl ba ndǝr shilǝkǝ nda ya da fǝrist sǝkǝu. 17 Fǝrist kwa ndzamar nyi, macha vǝlvǝl shilǝkǝ nda shatǝ pǝrtǝ, kǝl ba fǝrist bǝzǝya ǝnda ndǝr shilǝkǝ nga na karti cha. 18 "Ma cha ndǝ nda ana mbǝlkǝɗimi tǝ wur dzǝnyi, 19 ya mbwa nda mbǝlkǝɗimi tǝ wurtǝ nda vanya sǝ da pǝrtǝ mbamba nyi, ndara ɓitir mbwa nda tǝsǝu tǝɗa dǝzǝ ana pǝrtǝu, kǝl ba nja chari nyi nǝ fǝrist. 20 Kǝl ba fǝrist ndzamar mbwa nda, mach shilǝkǝ nda gwatǝ ndzǝɗaku ku chi nyi, ya shishi mbwa nda shatǝ pǝrtǝu, fǝrist kwa bǝzǝya ǝnda ndǝr shilǝkǝ nga, ndǝ kǝla karti nga. Shilǝkǝ bibi ɗimɗimi ngǝ tǝ biya ku mbǝlkǝɗimi. 21 Kǝl ja, ma fǝrist tǝ ndzamǝ tǝnyi, ngǝ cha la'a shishir mbwar mbǝlkǝɗimi nda, a da ɗa pǝrtǝu wa, ya ndzǝɗakǝr mbwar kǝti nda da tǝ gwa ku chir dza cha wa, kǝl nda a ghǝya tǝ wura, kǝl ba fǝrist hǝbiya ku nyi pama nji nǝ hanyi mǝɗǝfa. 22 Kǝl ja, ma shilǝkǝ nda tǝ yah tǝ dzǝ a dzǝnyi, kǝl ba fǝrist bǝzǝya ǝnda ndǝr shilǝlkǝ nga ndǝ kǝla karti nga. 23 Kǝl ja, macha sǝ mbamba nda tǝ ta'i tǝ mbwar zhang a da yah tǝ dzǝ wa, yau, mbwar mbǝlkǝɗimi nga.Kǝl ba fǝrist bǝzǝya ǝnda ndǝr shilǝkǝ nga, ndǝ karti nga. 24 "Macha dza ndǝ ana hu'ur mǝa, ya ngǝ ɓitir kǝti nda tǝ ɗa dǝzǝu ndara pǝrtǝ, 25 kǝl ba fǝrist ndzamar nyi. Ma shishir mbwar hu'ur mǝ nda tǝ sha pǝrtǝu, ya ngǝ ndzaɗakǝkur kǝti nda gwa ku chir dza cha, yau, shilǝkǝ bibi ngǝ tǝ biya dzǝnyi ku hu'ur mǝ ndani. Fǝrist kwa bǝzǝya abǝra ndǝr shilǝkǝ nga, ndǝ kǝla karti nga, aka bibi ɗimiɗimi nga. 26 Kǝl ja, ma fǝrist tǝ ndzamari, ngǝ cha la'a a da shishir mbwanda nda tǝ sha pǝrtǝ wa, ya ndzǝɗakǝkur kǝti nda tt gwa ku chinyi wa, kǝl nda a ghǝya tǝ wura, kǝl ba fǝrist hǝbiya nyi ku pama nji nǝ hanyi mǝɗǝfa. 27 Fǝrist kwa ɓǝla shiliar nyi sǝkǝ pishir hanyi mǝɗǝfǝ kunyi. Macha shilǝkǝ nda kwa yah dzǝnyi, fǝrist kwa bǝzǝya ǝnda ndǝ kǝla karti ngǝ ndǝr shilǝkǝ nga, aka shili bibi ɗimiɗimi nga. 28 Kǝl ja, ma cha mbwar hu'ur mǝ nda tǝ ta'i tǝ mbwar zhang a da yah tǝ dzǝ dzǝnyi wa, kǝl nda ghǝya tǝ wura, yau, sǝ mbamba tanyi ngǝ tǝ biya dzǝnyi wi hu'ur mǝa. Fǝrist kwa bǝzǝya ǝnda ndǝr shilǝkǝ nga ana karti cha, aka mbwar kǝti hu'ur mǝ nga. 29 "Macha malakǝ ndar sal ana shilǝkǝ a ku kǝr ndara tǝ tǝng, 30 kǝl ba fǝrist ndzamari shilǝkǝ nda. Ma cha ndzǝɗakur nyi gwatǝ go chi, ma cha tsǝu shishi mbwar shǝlǝkǝ nda shati ga ɗa wi ibi zǝr ibi zǝr, kǝl ba fǝrist bǝzǝya ǝnda ndǝr shǝlǝkǝ nga kǝla karti cha, aka hu'ur mǝ nga, shǝlǝkǝ ɗimiɗimi nǝ chi nga, aku kǝr ndara tǝ tǝng. 31 Kǝl ja, ma fǝrist tǝ ndzamǝtǝ hu'ur mǝ nda, ga la'a ndzaɗakǝkur da gwatǝ chi nyi wa, ya a shishi kyakyar da tǝ mbwar shǝlǝkǝ nda wa, kǝl ba fǝrist hǝbiya ndǝr shǝlǝkǝ nda ku pama nji nǝ hanyi mǝɗǝfa. 32 Kǝl ba fǝrist da ɓǝla ndzamar hu'ur mǝ nda pishir hanyi mǝɗǝfa kunyi. Ma cha shǝlǝkǝ nda da tǝ wiɗǝtǝ dzǝ wa, ya a shishi ibi zǝr ibi zǝr da kwa wa, ya tsǝu, a ndzǝɗakǝkur nyi da gwatǝ chi nyi wa, 33 kǝl ba nja sǝnda nyi dǝhǝ shishir dza cha, kǝl nda mbwar shǝlǝkǝ nda. Fǝrist kwa ɓǝla hǝbiya ndǝr shǝlǝkǝ nda ku pama nji sǝkǝu, nǝ hanyi mǝɗǝfa. 34 Pishir hanyi mǝɗǝfǝkunyi, fǝrist kwa ɓǝla ndzamari hu'ur mǝ nda. Ma cha a da tǝ wiɗǝtǝ dza tǝ chi nyi wa, ya a ndzaɗakǝkur nyi da gwa ku chi nyi wa, kǝl ba fǝrist da bǝzǝya ǝnda ndǝr shǝlǝkǝ nga ndǝ karti nga. Kǝl ba ndǝr shǝlǝkǝ nga chinda lukutu nyi, a ɗatǝ cha ka ndǝ karti . 35 Kǝl ja, ma hu'ur mǝ nda tǝ wiɗǝtǝ dza dzǝnyi a hir nda fǝrist tǝ bǝzǝya ǝnda na cha ndǝ karti cha, 36 yau, kǝl ba fǝrist ɓǝla ndzamar nyi sǝkǝu. Ma cha hu'ur mǝ nda wiɗɗǝtǝ dzǝnyi, yau, ngwa fǝrist da ba gwa'a cha usar ndǝ nda na ɓitir ibi zǝr ibi zǝr atǝ mbwar shilǝkǝ nda wa, aka ndǝr shilǝkǝ nda aɗatǝ ka ndǝ kǝla karti ndani. 37 Kǝl ja, ma cha fǝrist nda la'ati ǝnda hu'ur mǝ nda ta'i ti, ya shishi kyakyar kwa hǝa aku mbwa nda, yau, shilǝkǝ nda wurtǝ ndani, ndǝr shilǝkǝ nda ɗatǝ ka ndǝ karti. Fǝrist kwa bǝzǝya ǝnda ndǝr shilǝkǝ ɗatǝ ka ndǝ karti. 38 "Ma cha sal ndara malakǝu na tekǝm dzǝnda, 39 kǝl ba fǝrist ɗa ndzamar nda. Ma cha mbwar tekǝma da nda tatanyi wa, yau, kǝti ingǝ tǝ biya dzǝn nda. 40 Ma cha shishir kǝra vanya ndǝ tǝ pǝpa, nacha ndǝr naɗǝbiya cha, ya ndǝ karti cha. 41 Macha shishi nda tǝ pǝpǝ ku nyama cha, ga ɗa naɗǝbiya ku nyama cha, ndǝ karti cha. 42 Kǝl ja, macha atǝ kǝra naɗǝbiya nda ndara ku nyama cha vanya shilǝkǝ nda tǝ biya dzǝnyi nda tǝ char kǝr nyi dǝzǝu ana pǝrtǝ, yau, bibi ɗimiɗimi nda tǝ biya nǝnyi aku kǝra cha. 43 Kǝl ba fǝrist ɗa ndzamar nyi. Macha ngyakǝngyar sǝ mbamba nda tǝ ɗa dǝzǝu ana pǝrtǝ tǝkǝra naɗǝbiya nyi nda ndara ku nyama cha, ga char wi pabiya da shilǝkǝ bibi, yau, 44 ndǝndǝ nyi ndani shilǝkǝ bibi ngǝ tsa cha, ndǝ kǝla karti cha. Fǝrist kwa bǝzǝya ǝnda nacha ndǝ kǝla karti cha, aka shilǝkǝ bibi ngǝ tsa cha. 45 "Ngǝna ndǝr bibi kwa handzi lukutu tatah, cho ngyar shishi nyi kǝla ɓatla. Cho haɗiya huɗǝmacha sǝya mar chira cha, cho har kuraka cha kwa na, 'Ndǝ kǝla karti! ndǝ kǝla karti!' 46 Cho ngya ndǝ kǝla karti aku dǝhǝ biji nda cha na shilǝkǝ ɗimiɗimi nga dzǝnyi. Ya tsǝu ɗatǝ cha kǝla karti. Cho ngya na cha zhang tanyi, mbwar ngya nyi kwa ɗa biya hir ngakǝu."Lukutə nda Ndər Bibi Taku tə Dyaɓəndi
47 Ma nja uya lukutu nda shilǝkǝ bibi kyakyar kwa, ndara lukutu ul cha, ndara nǝ lilen, 48 mada bibi kyakyarkura cha aku tsatsar ul ndara ku lilen, ndara aku chi nyi, ndara ku sǝnda nja ɓatlǝtǝ na chi, 49 macha ɓitir vuyavuya kura cha tǝ ɗa dugugu ndara dǝzǝu a tǝ lukutu ndara dzǝnyi, ndara aku tsatsar ulu ndara lilen, shilǝkǝ nga nda yatǝ dza, kǝl ba nja char nyi nǝ fǝrist. 50 Fǝrist kwa ndzamar vvvvuyavuya kura cha, kǝl ba cha fa'anda sǝ inda na vuyavuya nda ba ɗǝwanda, kǝl ahir hany mǝɗǝfa. 51 Pishir hanyi mǝɗǝfǝkunyi cho ɓǝla ndzamr vuyavuya nda sǝkǝu. Macha vuyavuya nda yatǝ dzǝ ndara tǝ lukutu ndara tǝ sǝ tsatsa nda ndara tǝ chir dza, mada mi ngǝ njo mǝr na chi nda, nacha nga shilǝkǝ bibi ɗimiɗimi nga nda kwa yah, sǝ kǝla karti nga. 52 Fǝrist kwa nginda sǝnda na vuyavuya nda, aka shilǝkǝ ɗimiɗimi nga nda kwa yah, njo nginda na hu'u. 53 Kǝl ja, atǝ pǝchi nda, ma fǝrist tǝ ndzamar nyi, a vuyavuya nda da tǝ yatǝ dzǝ tǝ lukutu nda wa, ndara tǝ tsatsa nyi nda, ndara mada tǝ sǝnda nja ɓatlǝtǝ na chi nda wa, 54 kǝl ba fǝrist ɗa na nja chinda sǝnda na vuyavuya nda. Ahir nga, kǝl ba cha ɓǝla ɓunada sǝkǝu nǝ hanyi mǝɗǝfa. 55 Fǝrist kwa ɓǝla ndzamar sǝnda sǝkǝ ahir nja chinda. Macha ɓitir vuyavuya nda tǝ sha wa, mada ngǝ a da tǝ yatǝ dzǝ wa, sǝnda ɗatǝ kǝla karti. Njo nginda sǝnda ku hu'u, mada vuyavuya kwa ndara abiya bibiya cha. 56 Macha Fǝrist tǝ ndzamari nyi, vuyavuya nda satǝ ahir nda nja chinda sǝnda, cho tabiya mbwanda aku lukutu nda, ndara ku tsatsanyi nda, ndara tǝ chi nda. 57 Macha ahir biji kushu vuyavuya nda tǝ ɓǝla chabiya dzǝ tǝ lukutu nda sǝkǝu, ndara tǝ tsatsanyi, ndara tǝ chi nda, yau, shilǝkǝ nǝ yatǝ dzǝ nga, kǝl ba nja nginda sǝnda na vuyavuya nda ku hu'u. 58 Kǝl ja, macha shilǝkǝ nda sati ahir nda nja chinda lukutu nda, ndara tsatsanyi nda, ndara bǝtǝla nda, kǝl ba nja ɓǝla chinda sǝkǝu. Sǝnda ɗatǝ ndani na karti. 59 "Nachangǝ tsaubar tǝkǝra vuyavuya nda tǝ lukutu ul, ndara lilen, ndara tsatsanyi, ndara sǝnda nja ɓatlǝtǝ na chi, tsaka nja zǝndǝbiya ndara sǝ karti nga ndara sǝ kǝla karti nga."