Nja Dzəviya ka Haruna ana Ngulisha'a Shili Nyi
8
1 Tlakǝ tǝ ɓwanya na Musa bǝra, 2 "Ka hǝtǝ Haruna na ngulisha'a shili nyi, ana lukutu kǝnda, ana mal nǝ dzǝvǝ sǝu, ana gyal tla nǝ hatǝmachi ka chinda sǝpǝla'a, ana gam mǝtlǝu, ana gwazhilakǝ kǝra tlǝlam tsǝla mǝtlǝu. 3 Kǝl ka tsǝmtǝ dǝhǝ nji atǝ nya Mǝdlǝɓa tsǝmdza." 4 Ngǝ Musa tǝ mǝr wi nda Tlakǝ ta nar nyi. Ahir nda nja tsǝmtǝ nji atǝ gwar nya vi Madlǝɓa nǝ tsǝmtsǝdza, 5 kǝl ngǝ Musa tǝ nar nyi nǝ nji, "Janǝ sǝnda Tlakǝ tǝ nar ɗa nja mǝra." 6 Kǝl ngǝ Musa tǝ ngabiya Haruna na ngulisha'a shili nyi, ngǝ chinda nda na ɓiti. 7 Ngǝ cha handzi nyi lukutu nduɓu nǝ Haruna, ngǝ cha mbambiya nyi na gyarakǝn, ngǝ cha handzi nyi daura dzǝgamǝu nǝ Fǝrist, ana efod, nda cha mbambiya nyi na sǝr mba gaɗagaɗa nda nja tsatǝ na chi aka cha gǝzǝya nyi mǝnakǝu. 8 Kǝl ngǝ Muas ta fǝtǝnyi hipi hatlǝ tǝ efod nda, aku hipi nda cha fǝu nyi sǝ inda kwa gwa'ati njo zǝndǝ sǝnda Tlakǝ kwa i. 9 Ahir nga, cha mbu nyi dora nǝ fǝrist. Atǝ nyama dora nda, cha ndaɓǝti zǝr tǝmbǝl nǝ zinariya, ba'ada nga nda chari ǝnda dzǝvǝya nyi tǝ nji ana karti, wi nda Tlakǝ tǝ nar nyi nǝ Musa. 10 Tǝma ngǝ Musa tǝ hǝtǝ mal nǝ dzǝvǝ sǝ nda ga uchitǝ a kyatǝ Madlǝɓa nǝ ngya Tlakǝ ana dǝhǝ sǝnda ku ta cha. Tǝwa ǝnga ngǝ nja dzǝvǝya nda na kartikur anǝ Tlakǝu. 11 Cha uchitǝ mal nda gyatǝ kǝra dzǝgana zhǝka mǝɗǝfa, ngǝ dzǝvǝya dzǝgana nda tǝ ɗa karti ana dǝhǝ sǝ inda njo mǝr tlǝr ni ku ta cha, ana kǝtas nǝ ɓiti dǝgalǝu ana mbwar ngya nyi. 12 Kǝl ngǝ Musa tǝ pǝkǝnyi mal dzǝvǝ nda nǝ Haruna aka nja dzǝvǝnyi cha ɗa na karti. 13 Kǝl ngǝ Musa tǝ shili na ngulisha'a shili nǝ Haruna, ngǝ cha handzǝ nyi nǝ kala zhang kǝnda lukutu nduɓu ana dora nǝ fǝrist, ngǝ cha mbambaya nda na ngyarakǝn, wi nda Tlakǝ tǝ nar nyi. 14 Kǝl ngǝ Musa ta shili na gyal tla nǝ hatǝmachi na chinda sǝpǝla'a. Haruna ana ngulisha'a shili nyi tǝ fǝkǝr chanda tǝkǝra gyal tla nda, 15 ngǝ tlakǝnyi wulea. Ngǝ Musa tǝ gwa'ar mashi nda tǝ kwar cha cha, ngǝ cha ɓǝsǝti atǝ kala tǝlǝma dzǝgana nǝ hatǝmachi aka nja mǝrti dzǝgana nda na karti. Kǝl ngǝ cha pǝti mashi nda atǝ sara dzǝgana nda. Tǝwa ǝnga cha dzǝvǝya dzǝgana nda tǝ ɗa karti aka nja nau hatǝmachi kyatǝ. 16 Kǝl ngǝ Musa tǝ fa'anda dǝhǝ mal nda tǝ haɗiya halya tla nda, ana mbwa mǝnakǝ nda tǝ mbǝla, ana hushi mǝtlǝu tsa'a na mal kǝnda, cha nginda kyatǝ dzǝgana nda. 17 Kǝl ja, hǝyadzǝr kumǝr tla nda, ana ɗǝhi nyi dǝhǝ Musa tǝ nginda a biya hir ngakǝu, wi nda Tlakǝ tǝ tsaunyi bar. 18 Kǝl ngǝ Musa tǝ shili na gam hatǝmachi nǝ nginda. Haruna na ngulisha'a shili nyi tǝ fǝkǝr chanda tǝkǝra gam nda, 19 ngǝ nja tlakǝr wulea. Ngǝ Musa tǝ uchiti mashi atǝ kala tǝlǝma dzǝgana nda. 20 Ngǝ nja tlǝtlau gam nda, tǝma ngǝ nja nginda kǝra cha, dǝhǝ ka zumur dza cha tsa'ana mal. 21 Ahir nda nja chinda hali ana hya gam nda na ɓiti, kǝl ngǝ Musa tǝ nginda gam nda kyatǝ dzǝgana nda dǝhǝ. Nacha ngǝ hatǝmachi nǝ nginda nda kwa shu'ni kwitkwitǝu. Hatǝmachi nda lǝnda na hu'u anǝ Tlakǝu, wi nda Tlakǝ tǝ nar nyi nǝ Musa. 22 Kǝl ngǝ Musa tǝ na nja shili na gam mǝtlǝ inda, gam nǝ dzǝvǝ fǝrist. Haruna ana ngulisha'a shili tǝ pǝu chanda kyo kǝra gam nda, 23 ngǝ nja tlakǝnyi wulea. Kǝl ngǝ Musa tǝ gǝtsǝ mashi nda ga ɓǝsǝti atǝ chichir himi, nǝ chisǝma Haruna, ana dǝnyar chacha nǝ chisǝm, ana dǝnyar hya cha nǝ chisǝm. 24 Ngǝ cha shili ngulisha'a shili nǝ Haruna. Ngǝ cha gǝtsǝ mashi nda ga fǝtǝnda tǝ chichir hima nda nǝ chisǝma kala zhang kǝnda, ana dǝnyar chi nǝ chisǝm, ana dǝnyar hi nǝ chisǝma nda. Kǝl ngǝ cha uchitǝ hǝyadzǝr mashi atǝ yimbila dzǝgana nda. 25 Kǝl ngǝ Musa tǝ hǝbiya mal gam nda, ana mal nǝ shi'u, ana dǝhǝ mal nda tǝ haɗiya hali, ana mbwa mǝnakǝ nǝ mbǝla, ana hushi mǝtlǝ inda, tsa'a na mal kǝnda, ana ea nǝ chisǝm. 26 Aku tsǝla nǝ gwazhilakǝ kǝra tlǝlam nda mar tlakǝu nda, cha hǝtǝ takwara zhang nǝ gwazhilakǝ kǝra tlǝlam, ana takwara zhang nǝ gwazhilakǝ nda nja zǝukutǝ na mal, ana wafa zhang, cha fǝtǝ tǝkǝra mal ana eah nǝ chisǝm nda. 27 Dǝhǝ sǝ ingǝnga cha fǝu ku cha Haruna ana cha ngulisha'a nyi. Nanda tsǝu ngǝ nda lǝnda aka sǝr hatǝmachi nǝ har shi huɗamǝllǝm a mar Tlakǝu. 28 Kǝl Musa tǝ ɓǝla dlǝutsǝ dǝhǝ sǝr hatǝmachi ind sǝkǝu ga nginda kyatǝ dzǝgana nda, atǝ vǝra hatǝmachi nǝ nginda aka dzǝva. Nacha ngǝ hatǝmachi nda mǝr nǝ Tlakǝ tǝwa hu'u, masǝɗakǝ cha anǝ Tlakǝu. 29 Tǝma ngǝ Musa tsǝu tǝ hǝtǝ hatla gam nda ga har shi huɗamǝllǝm a mar Tlakǝu. Nacha ngǝ mbaɗǝ nǝ Musa aku gam nǝ dzǝvǝ nda, wi nda Tlakǝ tǝ nar nyi. 30 Ahir ngǝ tsǝu Musa ta gǝtsǝ mal dzǝvǝ nda, ana mashi nda kyatǝ dzǝgana nda, ngǝ uchiti nyi nǝ Haruna, ana gyatǝ lukutu nyi ana gyatǝ lukutu ngulisha'a nyi. Atǝwa ǝnga, cha mǝrtǝ Haruna ana ngulisha'a nyi ana lukutu kǝnda karti. 31 Tǝma ngǝ Musa tǝ nar nyi nǝ Haruna ana ngulisha'a nyi, "Bwaguma hǝyadzǝr kum ngǝ atǝ gwar nya vi nǝ Madlǝɓa tsǝmdza, hya kwasǝnya na gwazhilakǝ ngǝ ku tsǝla nǝ hatǝmachi dzǝvǝ fǝrist nga, wi nda Tlakǝu tǝ nar ɗa ǝnda Haruna ana ngulisha'a nyi ngǝ kwa kwasǝnya. 32 Dǝhǝ kum ndara gwazhilakǝ nda tǝ hǝyadza, tuku njo nginda na hu'u. 33 A da hyo biyatǝ nya vi Madlǝɓa Tsǝmdzǝ ngǝ wa, kǝl ahir hanyi mǝɗǝfa, kǝl hya nyabiya tsaubar hanyi nǝ dzǝvǝ hi inga, aka tsaubar nǝ dzǝvǝ hi kwa hǝtǝ hanyi mǝɗǝfa. 34 Sǝ nǝ nja mǝr ǝnya na, nja mǝr nga wi nda Tlakǝu tǝ na nja mǝra, aka mirga nǝ bikǝr sǝpǝla'a kǝhi. 35 Hya ɗǝnghatǝ, tuku hyo ngya atǝ gwar nya vi nǝ Madlǝɓa tsǝmdza, vu'i na pǝuchi hanyi mǝɗǝfa, hyo mǝr dǝhǝ sǝnda Tlakǝu kwa i nja mǝra. Ma a da hya nau mǝrtǝ ǝngǝwa, hyo kuɗa. Aka nacha ngǝ sǝnda Tlakǝ tǝ na. 36 Kǝl ngǝ Haruna ana ngulisha'a nyi tǝ mǝr dǝhǝ sǝnda Tlakǝ tǝ na nja mǝra a tǝwa Musa.