Tsaubar nda Təkəra Hatəmachi nə Ndə nda Zandə Səu
7
1 "Janǝ ǝnda tsaubar nǝ zhazhi nda bikǝ kwa ɗa. Na changǝ tǝ ndiya na karti gagaɗa. 2 Njo tlawulea tǝkǝra sǝr shishi nǝ hatǝmachi zhazhinda bikǝ a tǝ mbwa nda njo tla wulea tǝkǝra sǝr shishi nǝ hatǝmachi nǝ nginda. Ətsǝu nji njo uchiti mashi-mashi nyi a tǝ yimbila dzǝgana. 3 Fǝrist kwa lǝnda dǝhǝkura mal nda a kyatǝ dzǝgana, nacha ngǝ mal nǝ shiu. ana mal nda tǝ mbunda hali, 4 ana hushi tsa'a mǝtlǝu, ana mal inda ndaɓǝti dzǝ tǝ nda, ana mbwa mǝnakǝ na mbǝla, nda hǝbiya tsa'a hushi mǝtlǝ inda. 5 Fǝrist kwa nginda nda a kyatǝ dzǝgana, hatǝmachi nda nja lǝnda ka Tlakǝu, hatǝmachi cha nǝ zhazhinda bikǝ. 6 Kala zǝr sal ku nyandǝla fǝrist kwa nau sǝma. Njo nau sǝmnyi atǝuuu vanya nda karti, aka ana karti cha gagaɗa, nja mǝr nyi wi nda tsaubar tǝ na. 7 "Tsaubar hatǝmachi ka zhazhi nda bikǝ, wi ngǝ tǝ hatǝmachi nǝ chinda sǝpǝla'a cha. Fǝrist nda tǝ ɗa dǝgal tǝkǝra mirga nda, nacha sǝnyi kwa sǝmǝnya kum nǝ mirga. 8 Əngǝ ma'a fǝrist nda tǝ lǝu hatǝmachi nǝ nginda tǝ nyar vanya ndǝ, cho hǝtǝ chi sǝr shishi hatǝmachi nda nja ngina da. 9 Kala sǝr hatǝmachi nǝ sǝ zwazwa nda nja sǝltǝ aku sǝr sǝl sǝu, ana dǝhǝ sǝ nda nja ɓatliya aku kǝtas sǝl sǝu, cho ɗa ka mbaɗǝ nǝ fǝrist nda tǝ lǝnda tǝmachi nda. 10 Kǝl ja, dǝhǝuu hǝyadzǝr sǝr hatǝmachi nǝ sǝ zwazwa, inda nja zǝkuti na mal ndara a da na mal wa, ndo ɗa ka mbaɗǝ nǝ ngulisha'a shili nǝ Haruna, ya njo tǝkǝya nda mǝlmǝl tsǝu.Tsaubar nda Təkəra Hatəmachi nə Daɓkər
11 "Janǝ ǝnda tsaubar hatǝmachi nǝ piyarɗǝfu, hatǝmachi nda ndǝ kwa nau lǝtǝnyi nǝ Tlakǝu. 12 Ma ndǝ tǝ shili ka hatǝmachi nyi aka char usaku, yawu, kǝl ba cha shili na sǝr shishi nǝ hatǝmachi nda tsa'a na waina nda kǝla tlǝlam nda nja zǝkuti na mal, ana ngwazhilakǝ kǝla tlǝlam nda nja ɓǝsǝti mal ti, ana waina nda nja mǝr na ǝpu kuɓǝtu, nda tǝ sa mal gagaɗa. 13 Tsa'a na sǝr hatǝmachi nyi nǝ gwa'a piyarɗufu ana char usaku, kǝl ba cha lǝnda gwazhilakǝ nda kǝla tlǝlam. 14 Aku kala hatǝmachi cho shili lǝtǝ takwara gwazhilakǝ zhang ga'a ana Tlakǝu. Ngǝ na gwazhilakǝ kwa ɗa ka mbaɗǝ nǝ fǝrist nda tǝ uchi mashi sǝr shishi nǝ hatǝmachi ka piyaɗǝfu nda. 15 Tuku kumǝr sǝr shishi nda njo ɗǝnya nyi pishinda nja lǝnda nda. A da njo ngyar ka sǝm vanya zǝkǝ mbudla wa. 16 "Kǝl ja, ma ka shili hatǝmachi ka ka nyabiya sǝmfǝla, ndara hatǝmachi nǝ piyarɗufu, njo ɗǝnya kum nda pishinda tanyi, ma dǝhǝ sǝnda hǝyadzǝ tsǝu njo sǝmnya nyi vanya zǝkǝu. 17 Kǝl ja, dǝhǝ sǝnda hǝyadza nda tǝ go hanyi makǝrǝu, njo nginda nyi papa'a. 18 Ma nja sǝm kum nǝ hatǝmatchi nǝ piyarɗufu nda pǝshir hanyi makǝrkunyi, a da Tlakǝ da kwa dlǝu wa. A da cho jiga ngǝna hatǝmachi wi vanya sǝ wa. Kum nga kwa ɗa ka sǝr hǝɗa, ya dǝhǝ ndǝ sǝma, cho tǝɗǝkǝnyi bikǝ nǝ kǝrnyi. 19 Ma kum nda tǝ tsǝkǝr sǝnda kǝla karti, a da njo sǝm wa, njo nginda na hu'u. "Dǝhǝ nda karti tsǝu, kwa nau cha sǝm kuma nǝ hatǝmachi nda. 20 Kǝl ja, dǝhǝ ndǝ nda tǝ ɗǝ kum nǝ hatǝmachi nǝ piyarɗufu nǝ Tlakǝu, aku biji nda cha kǝla karti, njo tǝkǝbiya nyi ka njinyi. 21 Ma vanya ndǝ tǝ tsǝkar sǝnda kǝla karti, ndara ndǝu, ndara sǝr shishi, ndara vanya sǝr hǝɗa, ya ngǝ sǝm kum hatǝmachi nǝ piyarɗufu nǝ Tlakǝu, chul ngǝna ndǝ njo hǝbiya nyi ku pama jikǝnda.
Nja Katə Nji tsa Səm Mal ana Səm Mashi
22 Tlakǝ tǝ nar nyi nǝ Musa bǝra, 23 cha nar nyi nǝ njir Israila nǝna tsaubar ii."A da hyo sǝm mal nǝ gyal tla, ndara kǝtǝng, ndara nǝ kuwu wa. 24 A da hyo sǝm mal sǝr shishi nda tǝ sǝnyi ǝngǝ tanyi wa, ma da sǝr shishi nda kum takǝu tǝ tsǝya, kǝl ja, hyo nau mǝr sakǝnda na mal kǝnda ku vanya laku pamǝu. 25 Aka dǝhǝ nda tǝ ɗǝ mal sǝr shishi nda lǝnda ka hatǝmachi nǝ nginda anǝ Tlakǝu, njo tǝbiya nyi ka njikunda. 26 Ngwa hya da sǝm sǝ na mashi kwa ma da kush wa. 27 Dǝhǝ ndǝ sǝm mashi, njo hǝbiya nyi ku pama nji.
Mbaɗə nda nə Pərist
28 Tlakǝ tǝ nar yi nǝ Musa bǝra 29 cha nar nyi nǝ njir Israila nǝna tsaubar ii. "Dǝhǝ nda kwa shili na hatǝmachi nǝ piyarɗufu nǝ Tlakǝu, a kwa cho hǝbiya vanya mbwa mǝnakǝu aka ga'a anǝ Tlakǝ. 30 Ana cha kǝrnyi cho shili na sǝr hatǝmatchi nda, cho shili nginda na hu'u anǝ Tlakǝu. Cho shili na mal ana hatlǝ, aka cha lǝnda aka sǝr hatǝmachi a tǝwa hatǝ shi huɗamǝlǝm a mar Tlakǝu. 31 Fǝrist kwa shili nginda mal nda a kyatǝ dzǝgana, kǝl nda hatla cha kwa ɗa ka mbaɗǝ anǝ Haruna ana ngulisha'a shili nyi. 32 Eah nǝ chisǝma sǝr shishi nǝ hatǝmachi hiyarɗufu nda, njo nǝnyi nǝ fǝrist cho ɗa ka ga'a hyatǝ tsa ndǝ nda, 33 zǝr Haruna nda tǝ uchi mashi sǝr hatǝmachi nǝ piyarɗufu nda, ana nginda mal nda ngǝ kwa hǝtǝ eah nda cha ɗa ka mbaɗǝ nyi. 34 Aka hatlǝu nda nja lǝnda tǝwa hatǝmachi nǝ hatǝshi, ana eah nda naj lǝnda, ya hǝtǝ nga aku hatǝmachi nda nja mǝr aka ɓatlǝ ngya mǝnakǝ nǝ njir Israila, ya nǝnyi nǝ Haruna Fǝrist ana ngulisha'a shili nyi cha ɗa ka mbaɗǝ kǝnda ba'anawa. 35 " Nacha ingǝ mbaɗǝ nda nja fiya nyi nǝ Haruna ana ngulisha'a shili nyi aku sǝr hatǝmachi inda nja nginda na hu'u anǝ Tlakǝu, ghǝya tǝ pǝchinda nja dzǝvǝya nda ti, nda ɗaka fǝrist ii nǝ Tlakǝu. 36 Nacha ingǝ mbaɗǝ da Tlakǝ tǝ nar nyi nǝ njir Israila nda maka nǝnyi nǝ fǝrist ii ahir nda nja dzǝvǝya nda nda ɗaka Fǝrist i. 37 Nǝnnǝ ngǝ tsaubar nǝ hatǝmachi ka nginda, ana hatǝmachi nǝ sǝ zwa zwa, ana nǝ chinda sǝpǝla'a, ana nǝ zhazhanda bikǝu, ana hatǝmachi nǝ dzǝvǝ fǝrist, ana hatǝmachi nǝ ɓatlǝu ngya mǝnakǝu. 38 Nanda ingǝ Tlakǝu tǝ nar nyi nǝ Musa a kyatǝ dǝgǝl dǝgal nǝ Sinai, atǝ pishinda Tlakǝ tǝ nar nyi nǝ njir Israila nda shili na nyi hatǝmachi kǝnda, a ku dadil Sanai.