6
1 Tlakǝ tǝ nar nyi nǝ Musa,2 Njo shili na hatǝmachi ma ndǝ tǝ mǝr sǝpǝla'a nda chari tari jirikur nyi nǝ Tlakǝ a tǝwa ngyar ɓǝlandi sǝnda tǝwul nyi tǝ nǝnyi ka cha fiya nyi, ndara tsǝu tǝwa hǝlti sǝr tǝwul nyi, ndara tǝwa ɗiya nyi.3 Əngǝ njo mǝr tsǝu ma ndǝu tǝ uya sǝnds tǝ sa, ya ngǝ cha tlǝya gǝzhi ǝnda a cha uya wa, ǝngǝwa cha sǝmndafǝla nǝ gǝzhi a tǝ kǝra chuli sǝ wi ingǝ nda ndǝu kwa nau mǝra ndo ɗa ka bikǝ nǝnyi.4 Ma ndǝ nda mǝr zhang ku huɗa chuli ngǝ sǝpǝla'a ii, ya ngǝ cha zǝndǝbiya bikǝ nyi, yaw, kǝl ba cha ɓǝlandi sǝ nda nja nǝnyi ka cha fiya, ǝngǝwa sǝnda cha hǝlti, ndara sǝ nda tǝ sa nja uya, ndara dlǝrvi nda mǝrtǝ cha,5 ndara tseu sǝnda cha sǝmfǝla nǝ gǝzhi tǝ kǝri. Cho ɓǝlandǝ dǝhǝ sǝ inda, ya cho ɓǝla tsakǝti zhang ku tufu tǝkǝri. Cho shili mǝr gǝna sǝu pishinda cho shili hatǝmaci nǝ chinda bikǝu.6 Cho shili na nyi nǝ fǝrist sǝr hatǝmachi nǝ chinda bikǝ anǝ Tlakǝu, gama nda kǝra tyakǝm aku chaɓi nǝ kǝtǝng ndara kuwa, ndara tsǝu dǝkǝti tǝdǝɓǝkur gam nda ana azurfa, wi nda njo mǝra, ana kǝtas nda njo mǝr tlǝr ni ku mbwa nda tǝ ndiya na kartikur. Nachangǝ hatǝmachi nǝ chinda bikǝu.7 Tǝwa ǝnga fǝrist kwa mǝrtǝ mirga nǝ hǝnda bikǝr sǝpǝla'a aka ndǝ nda amar Tlakǝu, ya njo farna dǝhǝ chul sǝnda ndǝ kwa nau mǝrti, nda kwa nau tǝɗǝkǝnyi bikǝu
Tsaubar nda Təkəra Hatəmachi Təwa Ngind
8 Kǝl ngǝ tǝ ɓwanya nǝ Musa abǝra 9 cha nǝnyi nǝ Haruna ana ngulisha'a nǝn tsaubar ii. "Janǝ ǝnda hatǝmachi nǝ nginda kwa ɗa. Sǝr hatǝmachi nǝ nginda kwa hanyi kyatǝ kǝra hahili hu'u nǝ dzǝgana nda kwa gǝɗǝ ba'a nǝ mbudla. 10 Fǝrist kwa handzi lǝkutunyi nǝ lailan ana batu gusu (kampi). Cho tsǝkǝnda pǝtsǝɗǝ hatǝmachi nginda tsǝu, cho pǝya tǝ badlarma dzǝgana nda. 11 Ahir nga cho bǝlatǝ lukutu nyi nǝ lilan inda cho handzi alenyi, ba cha fa'anda pǝtsǝɗǝ nda a yatǝ mbwanda kǝla hiɗahiɗa a biyahir ngakǝ cha pǝnda. 12 Nja ngyar tanyi hu'u dzǝgana nda kwa ngǝɗa, a njo ngyar cha tǝwa. kala mubudla fǝrist kwa tsǝkǝu shilǝ ku hu'u nda, cho bǝrdliya sǝr hatǝmachi nǝ nginda kyatǝ kǝra hu'u nda aka cha nginda mal nǝ sǝr hatǝmachi nǝ ɓatlǝu ngya mǝnakǝu. 13 Njo ngyar hu'u nda kwa gǝɗǝ kyate dzǝgana nda a da kwa tǝ wa.
Tsaubar nda Təkəra Hatəmachi nə Səuhiuhi
14 "Janǝ ǝnda tsaubar hatǝmaci nǝ sǝ zwazwa. Ngulisha'a Haruna kwa lǝnda nǝ Tlakǝ a biyamar dzǝgana. 15 Fǝrist ndo zǝba kwa hau cha cha, kwa tasi ǝpu kuɓutǝ, ana mal, ana dǝhǝ murdi, cho nginda dǝhǝ aka mbaɗǝ nǝ ɗunghati a kyatǝ dǝzagana. Nacha ngǝ hatǝmachi nda kwa shu'ni kwitkwitǝ anǝ Tlakǝu. 16 Sǝnda tǝ hǝya dzǝ aku sǝr hatǝmachi nǝ sǝ zwazwa inda, kwa ɗa ka mbaɗǝ nǝ fǝrist, nacha ngǝ anǝ ka Haruna ana ngulisha'a shili nyi. Ndo sǝmnya a da na tlǝlam wa, atǝ vanya mbwanda na karti a ku babal nǝ Madlǝɓa nǝ tsǝmdza. 17 A njo mǝr nyi ana tlǝlam wa. A nǝnyi tǝya anǝ fǝrist ii aka cha ɗa ka mbaɗǝ kǝnda aku sǝr hatǝmachi nǝ nginda. Chul nǝna hatǝmachi ana karti cha gagaɗa, nja mǝr nyi wi nda tsaubar tǝ chari, wi ngǝ tǝ hatǝmachi nǝ chinda sǝpǝla'a ana hatǝmachi nǝ zhazhǝnda bikǝ. 18 Kala zǝr sal aku huɗa ngulisha'a nǝ Haruna kwa nau sǝma, a ngyatǝ ka mbaɗǝ kǝnda aku sǝr hatǝmachi nǝ nginda nǝ Tlakǝ. Nacha nga gyatǝ aka tsaubar nǝ ba'a sakamani, ba'a nǝ ɓǝlǝr nyandǝla hi. 19 Tlakǝ tǝ ɓwanya Musa abǝra, 20 "Janǝ hatǝmachi nda Haruna ana ngulisha'a kwa lǝnda nǝ Tlakǝ atǝ pǝchi nda pǝu nda mal nǝ dzǝvǝ nda ka nda ngya ka Fǝristi ii. Kala ndǝ kwa shili na tǝdǝɓǝrkur mǝhyaghǝ zhang nǝ ǝpu nda kuɓǝtu wi nja shili ka hatǝmachi nǝ sǝ zwazwa. Njo shili na manyi ǝmbudla, manyi tsǝu aba-akǝu. 21 Njo zǝkuti na mal, ba nja sǝltǝ atǝ kyi nǝ sǝl sǝu. Nja sǝltǝ nyi ngugurum-ngungurumǝu, wi ngǝ tǝ hatǝmaci nǝ sǝ zwazwa, ahir ngǝ njo pǝpasǝu ba nja lɨnda aka sǝr hatǝmachi nda kwa shu'ni kwitkwitǝ anǝ Tlakǝu. 22 Əngǝ tsǝu dǝhǝ nda nja dzǝvǝya aka cha hǝtǝ mǝngya dǝgalǝr Fǝrrist aku huɗa ngulisha'a Haruna, nacha ngǝ kwa handa tǝmachi anǝ Tlakǝu. Njo nginda sǝr hatǝmachi nda dǝhǝu. Nacha nga, tsaubar nga nǝ ba'anawa. 23 Kala sǝr tǝmachi nǝ sǝ zwazwa nda njo mǝr aka dzǝvǝ fǝrist, njo ngina zumǝu, a njo sǝmǝ wa."
Tsaubar nda Təkəra Hatəmachi nə Hənda Səpəla'a
24 Tlakǝ tǝ ɓwanya na Musa bǝra 25 cha nar nyi nǝ Haruna ana ngulisha'a shili nǝna tsaubar."Janǝ ǝnda tsaubar hatǝmachi nǝ chinda sǝpǝla'a kwa ɗa. njo shili tlakǝnyi wulea nǝ sǝr shishi amar Tlakǝu, atǝ mbwa nda maka tlawulea tǝkǝra sǝr shishi nǝ hatǝmachi nǝ nginda ti. Aka chul nǝna hatǝmachi ana karti cha gagaɗa, nja mǝr nyi wi nda tsaubar tǝ na. 26 Fǝrist nda tǝ lǝu hatǝmachi nǝ chinda sǝpǝla'a nda, na cha ngǝ kwa ɗǝnya kumǝ nǝ hatǝmachi nda. Cho sǝmnyi atǝ vanya mbwa nda na karti aku babal nǝ Madlǝɓa nǝ tsǝmdza. 27 Dǝhǝ sǝnda tǝ tsǝkar kum nǝ hatǝmachi nda kwa ɗa karti. Ma mashi kum nǝ hatǝmachi nda tsǝu tǝ pǝ sǝyatǝ lukutu, njo chinda lukutu nda tǝ vanya mbwa nda na karti. 28 Ma nja taku kumǝ nda aku tǝm nyingha, njo huɓǝnda tǝm nda. Kǝl ja, ma cha aku tǝm lyang mapi nja ta, njo hiɗǝbiya tǝm nda ba chinda na ɓiti. 29 Kala zǝr sal aku nyandǝla fǝrist kwa sǝma, aka ana karti cha gagaɗa, nja mǝr wi nda tsaubar tǝ na. 30 Kǝl ja, ma nja gǝtsi mashi sǝr shishi nǝ hatǝmachi nǝ chi sǝpǝla'a, ma nja gwa ni ku Madlǝɓa nǝ tsǝmǝdza aka mirga nǝ sǝpǝla'a aku vi nda Karti, a njo sǝmǝ kum nǝ hatǝmachi nda wa. Njo nginda na hu'u.