5
1 Ma ndǝ tǝ ngyar ndǝra, aku sakanda nja nganyi cha ɗa ka matauli tǝ babal tǝkǝra vanya sǝnda cha la'a, ndara cha zǝndi, yau, a mǝrtǝ cha sǝpǝla'a, bikǝ tǝ kǝra cha.2 "Ndara tsǝu vanya ndǝ tǝ ɗaka tsǝkar sǝ hiɗahiɗa, ya a da na zǝndǝ nyi wa, wi ka kumǝr sǝ tǝtǝ nda hiɗahiɗa ku lya wua (chaɗǝgu), ndara chiɗǝgu sǝr shishi nǝ ki nda hiɗahiɗa, ndara chiɗǝgu nǝ sǝr tǝɗǝ na ta, aɗati cha hiɗahiɗa ndani tsǝu. Ya tǝɗǝngǝnyi tǝ cha bikǝu.3 Əngǝ ma'a wa, mada ka tsǝkar vanya ndǝ nda kwa maka mǝrtǝ ndǝ hiɗahiɗa, ya a da na zǝndǝ kur nghǝ wa, ma ka wur nda zǝndǝbiya, aɗatǝ ka ka ndǝr bike ndani.4 Ma ndǝ tǝ kusa sǝmfǝla na nya cha atǝ kǝra vanya sǝu, nda a da cha mǝr jigadǝma gwadakǝ wa, mada sǝ mǝnakǝ cha ndara tsǝu sǝ ɗimi, nda a da na zǝndǝkur nyi wa, macha wur nda zǝndi, aɗati ka sǝpǝla'a nyi ndani.5 Ma ndǝ wur zǝndǝ ǝnda a mǝrtǝ cha zhang ku huɗa bikǝ inga, kǝl cha dǝkǝ biya chul sǝpǝla'a nda cha mǝra.6 Aka kinda bikǝr sǝpǝla'a nda cha mǝrti, cho shili na hatǝmachi nǝ Tlakǝ Yahweh. Sǝr hatǝmahi ngǝ cho shili na mala kǝtǝng ǝngǝwa ku, aku chaɓi nyi. Nacha ngo ɗa ka hatǝmachi nǝ hǝnda sǝpǝla'a, ahir nga pərist kwa mǝrtǝ mirga aka sǝpǝla'a nyi.7 Ma cha a ndǝ kwa nau shili na nyi nǝ Tlakǝ kǝtǝng ndara ku aka kinda bikǝr sǝpǝla'a nda cha mǝr wa, kǝl ba cha shili na mbǝtla tsa'a mǝtlǝu, ǝngǝwa mbǝtla Masar mǝtlǝu. Njo mǝr tlǝr na zhang ka handa tǝmachi nǝ chinda sǝpǝla'a, zhang tsǝu aka hatǝmaci nǝ nginda.8 Cho shili na nyi nǝ pərist. Tangǝrma pərist kwa lǝnda nda njo hatǝmachi nǝ chinda sǝpǝla'a ni. Cho ndalkǝr wulea, kǝl nda a cho tlǝnda kǝra cha wa.9 Cho gǝtsi mashi sǝr hatǝmachi nǝ chinda sǝpǝla'a nda, ba cha uchiti a tǝ yimbila dzǝgana hatǝmaci nda. Cho gǝzǝya eakǝ nda, ǝnda mashi nyi kwa pa sǝya tǝ sara dzǝgana nda. Nacha ngǝ hatǝmachi na sǝpǝla'a.10 Fǝrist tsǝu kwa lǝnd mǝtlǝkunya eakǝ nda aka sǝr hatǝmachi nǝ nginda wi sǝnda tsaubar nda nja nǝnda tǝ na. Tǝwa ǝnga fǝrist kwa hǝtǝ bikǝr sǝpǝla'a aka sǝpǝla'a nda ndǝ nda tǝ mǝra, ǝngǝ tsǝu njo far na sǝpǝla'a.11 Kǝl ja, macha a cho nau uya mbǝtla mǝtlǝu ndara mbǝtla masar mǝtlǝu wa, kǝl ba cha tǝdǝɓǝkur mǝlengǝr zhang nǝ ǝpu uhi nda kuɓǝtǝu, aka hatǝmachi nǝ chanda sǝpǝla'a nda mǝr cha. A cho fǝu mal dara murdi tǝ kǝri wa, aka hatǝmachi nǝ chinda sǝpǝla'a a da hatǝmach nǝ sǝ zwazwa ngǝ wa12 Ndǝ ndo shili ǝpua anǝ pərist, frist tsǝu kwa fǝu cha cho tasi ǝpu ndani, na changǝ mbaɗǝ na ɗǝnghati ni. Kǝl ba cha nginda kyatǝ dzǝgana, aka hatǝmachi nǝ nginda anǝ Tlakǝu. Nacha nga, hatǝmachi nga nǝ chinda sǝpǝla'a.13 Tǝwa ǝnga Pərist kwa hǝtǝ bikǝr sǝpǝla'a nda ndǝ nda tǝ mǝra, aku dǝhǝ sǝ inga nja jiga nga, njo farna sǝpǝla'a nyi. Hǝyadzǝr sǝnda tǝ hǝyadza aku sǝr hatǝmachi nda, cho ɗa ka mbaɗǝ nǝ fǝrist, wi nda tǝ cha aku hatǝmachi nǝ sǝ zwazwa.
Hatəmachi Ndə nda Zandə Səu
14 Tlakǝ tǝ nar nyi nǝ Musa abǝra, 15 Ma vanya ndǝ aku pama hi tǝ chari tari jiri, ngǝ a da cha mǝr sǝpǝla'a na kurnghakur wa, nda a da tsǝkari sǝ inda nja dzǝvǝya nda ɗa ka sǝ karti nǝ Tlakǝ wa, kǝl shili na gam nda pa da na tyakǝm aku chaɓi nyi, aka hatǝmachi nǝ tsǝkǝnda bikǝ nyi. Sǝlir gam nga tuku cha ɗa mǝlmǝl na kǝtasǝu nǝ dǝkǝ azurfa nda njo mǝr tlǝr ni aku mbwa nda ndiya na Karti. Nachangǝ hatǝmachi nǝ tsǝkǝnda bikǝu. 16 Ndǝ ndǝnyi kwa kinda aka sǝnda nja dzǝvǝya cha ɗa karti ngǝ ndǝ tǝ mǝr bikǝ tǝ kǝri. Ətsǝu cho tsakǝti zhaka zhang ku tufu tǝkǝri, cho nǝnyi nǝ pərist. Fǝrist kwa hǝtǝ bikǝr sǝpǝla'a nyi atǝwa lǝnda zǝr gam aka tǝmachi nǝ tsǝkǝnda bikǝu, ya njo farna sǝpǝla'a nyi. 17 Ma vanya ndǝ tǝ mǝr sǝpǝla'a a tǝwa bǝlnda zhang aku huɗa sǝ inda Tlakǝ tǝ na ngwa nja mǝr wa, ya a da zǝndǝ nyi wa, a mǝrtǝ cha bikǝ ndani, ya bikǝr sǝpǝla'a nyi tǝ kǝra cha. 18 Cho shili na nyi nǝ Fǝrist gam nda kǝla tyakǝm aku chaɓi kǝtǝng ndara kuwu, aka hatǝmachi nǝ tsǝkǝnda bikǝu, ndara tsǝu cha mǝmǝlandǝ sǝlir gam ana azurfa, dladza kǝtas dǝkǝ sǝ nda njo mǝr tlǝr ni tǝ mbwa nda ndiya na Karti. Fǝrist kwa hǝtǝ bikǝr sǝpǝla'a nǝ ndǝ nda, aka dlatsǝn nda cha mǝr nda na kurnghakur wa, a njo farna sǝpǝla'a nyi. 19 Nachangǝ hatǝmaci nǝ kinda bikǝ, aka nda mǝr bikǝ nǝ Tlakǝu.