Hatəmachi nə Hənda Səpəla'a
4
1 Tlakǝ tǝ ɓwanya na Musa abǝra 2 cha nar nyi tsaubar inǝna nǝ njir Israila .<<Janǝ inda njo mǝra, ma vanya ndǝ tǝ mǝr sǝpǝla'a na kurnghakur, a tǝwa ɓǝliya zhang ku huɗa gadlagadla Tlakǝu nda katǝ nja ɗa ǝnga. 3 <<Macha dǝgal nya pərist ngǝ tǝ mǝr sǝpǝla'a nga, a tǝɗǝngǝnyi tǝ cha sǝpǝla'a nǝ dǝhǝ nji, kǝl nda cha lǝnda zǝr gyal tla nda kǝra tyakǝm aka sǝr hatǝmachi nǝ chinda sǝpǝla'a nǝ Tlakǝu. 4 Cho shili na zǝr gyal nga a mar Tlakǝ aku gwar nyavi Madlǝɓa nǝ daɓǝdza, cho fǝkǝr cha cha tǝ kǝra zǝr gyal nda, ba cha tlakǝr wulea tang nda amar Tlakǝu. 5 Kǝl ba dǝgalnya Pərist nda gǝtsi mashi zǝrr gyal nda cha gwani go Madlǝɓa daɓǝdza. 6 Cho fǝu kwar cha cha go mashi nda ba cha uchiti mashi nda zhaka mǝɗǝfa a mar Tlakǝ, a biyamar miɗi dǝgal nda nja mbunda vi nda ndiya na kartikur nda. 7 Ahir nga, pərist nda kwa ɓǝla gǝtsi mashi nda sǝkǝu, cho pǝu ku tǝlǝm nǝ dzǝgana ngi murdi nda kwa shu'ni kwitkwitǝu, nda na ngya ku Madlǝɓa daɓǝdza amar Tlakǝu. Hǝyadzǝr mashi zǝr gyal tla nda, cho pǝtǝnyi nǝ sara dzǝgana hatǝmachi nǝ nginda, nda ku gwar nyavi Madlǝɓa nǝ daɓǝdza. 8 Pərist kwa fa'abiya dǝhǝ mal nda ku zǝr gyal tla nǝ hatǝmachi ka chinda sǝpǝla'a, mal nda tǝ halia sǝr shishi nda, ana nda hali inda tǝ mbunda, 9 ana hushi mǝtlǝ ana mal inda ti, ana mbwa nda tǝ ndiya mǝnakǝ ku mbǝla, inda njo fa'abiya tsa'ana hushi nda. 10 Njo fa'abiya nda tsǝu wi nda nja fa'abiya aku gyal na hatǝmachi aka ɓatlǝ ngya mǝnakǝu. Kǝl ba pərist ɗa ngida nda a kyatǝ dzǝgana nǝ hatǝmachi nǝ nginda. 11 Kǝl ja, ci gyal tla nda, ana dǝhǝ kumnyi, ana kǝra cha, ana ngilangha cha, ana hali cha, ana shaɗa cha tsǝ'u, 12 ana dǝhǝkura sǝnda tǝ hǝyadza, nǝ tla nda, njo fa'abiya, njo tǝra biya nǝ tǝ mbwanda kǝra hiɗahiɗa, a biyahir ngakǝu, tǝ mbwar pǝnda pǝtsǝɗǝu. A tang nda tsǝu njo nginda na hu'u. 13 Macha dǝhǝ njir Israila ngǝ ta mǝr sǝpǝla'a da na kurnghakur wa, ya tǝ ɗa ma'a a nji nda zǝndǝ wa, nda ɓǝlnda zhang ku huɗa gadlagadla nǝ Tlakǝu, nacha nga, shili tǝ na nda bikǝu ndani. 14 Ma nda zǝndǝbiya sǝpǝla'a kǝnda, a ngya tǝ tuku sǝrma nǝ nji nda kwa shili zǝr gyal tla aka nda hatǝmachi nǝ chinda sǝpǝla'a aku gwar nyavi Madlǝɓa nǝ tsǝmdza. 15 Njira wawa'a nǝ nji nda kwa shili fǝkǝr cha nda kyo kǝra gyal tla nda amar Tlakǝu, kǝl ba nda tlakǝr wulea tǝkǝra gyal tla nda, a tang nda amar Tlakǝu. 16 Dǝgalǝr pərist nda kwa gǝtsi mashi tla nda, cho gwani ku Madlǝɓa tsǝmdza. 17 Fǝrist nda kwa hau kwar cha cha ku mashi nda, cho uchiti mashi nda zhaka mǝɗǝfa amar Tlakǝu, a biyamar miɗi nda tǝ mbunda vi nda karti. 18 Pərist kwa gǝtsi mashi nda cho pǝu ku tǝlǝma dzǝgana inda mar Tlakǝu, ku Madlǝɓa tsǝmdzǝ nda. Hǝyadzǝr mashi nda cho pǝtǝ dzǝr sara dzǝgana hatǝmachi nǝ nginda ndo gwar nyavi Madlǝɓa tsǝmdzǝ nda. 19 Cho fa'abiya dǝhǝ mal gyal tla nda, cho ngida a kyatǝ dzǝgana nda. 20 Cho mǝr na gyal ngǝ tang wi nda cha mǝr na gyal tla nda nja lǝnda aka hatǝmachi nǝ sǝpǝla'a dǝgalǝr Pərist. Tǝwa ǝngǝ fǝrist kwa mǝrtǝ mirga nǝ dǝhǝu sǝpǝla'a nji, ya njo farna sǝpǝla'a kǝnda. 21 A hir nga, cho tǝra na gyal tlanda biyahir ngakǝ, ba nginda wi nda cha nginda tangǝrmanya gyal nda. Nacha ngǝ hatǝmachi nǝ sǝpǝla'a aka dǝhǝkura nji. 22 Mach sǝrma ngǝ tǝ mǝr sǝpǝla'a, ana kurnghakur, ngǝ cha mǝr zhang ku huɗa sǝ inda Hyel Tlakǝ tǝ tsaubar ngwa nja mǝr wa, ngǝn-nga shili tǝ na bikǝ nǝnyi. 23 Ma nja dǝkǝr nyi sǝpǝla'a nyi nda cha mǝra, tuku cho shili na bura nda kǝla tyakǝm aka hatǝmachi. 24 Cho fǝkǝr cha cha kyo kǝra bura nda, ba cha tlakǝr wulea tǝkǝri, tang tǝ mbwa nda njo tla wulea tǝkǝra sǝr shishi aka hatǝmachi nǝ nginda a mar Tlakǝ. Nachangǝ hatǝmaci aka chinda sǝpǝla'a. 25 Ahir nga fǝrist nda kwa gǝtsi mashi nda tǝ kwarcha cha cho fǝu ku tǝlǝma dzǝgana hatǝmachi nǝ nginda nda. Ba cha pǝnda hǝyadzǝr mashi nda sǝya tǝ sara dzǝgana hatǝmachi nǝ nginda nda. 26 Kǝl ba cha nginda dǝhǝ mal nda a kyatǝ dzǝgana hatǝmachi nda, wi nda cha mǝr na mal nǝ hatǝmachi ɓatlǝ ngya mǝnakǝu. Tǝwa ǝnga fǝrist kwa mǝr tǝ mirga aka sǝpǝla'a nǝ dǝhǝ nji, ya njo far na sǝpǝla'anyi. 27 Ma vanya ndǝ ku huɗa nji tǝ mǝr sǝpǝla'a, ya a da na kurnghakur wa, cha mǝrtǝ zhang ku huɗa sǝ inda Tlakǝ tǝ tsaubar nda ngwa nja mǝra wa, a tǝɗǝngǝnyi tǝ biki ndani. 28 Ma nja dǝkǝri nyi sǝpǝla'a nda mǝr cha, kǝl ba cha shili ku nda kǝra tyakǝm, aka sǝpǝla'a nda mǝrtǝ cha nda. 29 Cho fǝkǝr cha cha kyo kǝra ku nǝ hatǝmachi ka chinda sǝpǝla'a nda, kǝl ba cha tlakǝr wulea tǝkǝri, atǝ mbwa nda njo tla wulea tǝkǝra sǝr shishi aka hatǝmachi nǝ nginda. 30 Ahir nga, Fǝrist kwa gwari mashi nda tǝ kwarcha cha, cho pǝu go tǝlǝma dzǝngana hatǝmachi nǝ nginda. Ba cha pǝti hǝyadzǝr mashi nda sǝya tǝ sara dzǝgana nda. 31 Cho fa'abiya dǝhǝ mal wi nda cha mǝr na mal nǝ hatǝmachi nǝ ɓatlǝ ngya mǝnakǝu, kǝl ba cha nginda kyatǝ dzǝgana nda, ya kwaɗa mǝsǝɗakǝ nǝ Tlakǝu.A tǝwa ǝnga, fǝrist kwa mǝr tǝ mirga nǝ dǝhǝ nda, ya njo farna sǝpǝla'a kǝnda. 32 <<Macha ndǝr bikǝ nda tǝ shili na kǝtǝng aka hatǝmachi nǝ chinda sǝpǝla'anyi, kǝl ba cha shili mala kǝtǝng kǝla tyakǝm. 33 Cho fǝtǝ cha cha kyo kǝra mala kǝtǝng nǝ hatǝmachi ka chinda sǝpǝla'a nda, kǝl ba nja tlakǝr wulea tǝkǝri, tǝ mbwanda njo tlawulea tǝkǝra sǝr shishi aka hatǝmaci nǝ nginda. 34 Ba Fǝrist gwari mashi nda tǝ kwar chacha, cho pǝu go tǝlǝma dzǝgana nǝ hatǝmachi nǝ nginda. Njo pǝnda hǝyadzǝr mashi nda sǝya tǝ sara dzǝgana nda. 35 Ətseu cho fa'abiya dǝhǝ mal kǝtǝng, wi cha mǝr na mal hatǝmachi na daɓǝzǝr ngya mǝnakǝu, kǝl ba fǝrist nginda kyatǝ dzǝgana dǝhǝ ka alenya tǝmachi nda njo hǝ nǝ Tlakǝu. Tǝwa ǝnga, fǝrist kwa mǝrtǝ mirga nǝnyi aka sǝpǝla'anyi nda cha mǝrti, ya njo far na sǝpǝla'anyi.