Hatəmachi na Səuhiuhi
2
1 Aku sakanda ndǝ tǝ shili na sǝuhiuhi ka hatǝmachi nǝ Tlakǝu, kǝl cha lǝtǝ upəu kuɓutu. Kǝl ba cha pǝu mal zaitun kyatǝ kǝri, ǝtsǝu cha fǝu nyi murdi kwa, 2 ba shili ni nǝ ngulisha'a Haruna pərist ii. Pərist nda kwa zǝba kwa hatǝ cha cha kwa tasi ǝpǝu kuɓutǝ nda, ana mal, ana dǝhǝ murdi nda, cho nginda ka mbaɗǝ nǝ dǝnghati a kyatǝ dzǝgana nda. Hatǝmachi nda nja lǝnda tǝwa hu'u nga, nda kwa shu'ni kwitkwitǝ nǝ Tlakǝu. 3 Sǝnda tǝ hǝyadzǝ aku sǝ zwazwa nda nja hatǝmachi nǝ kwa ɗa ka mbaɗǝ nǝ pərist, na cha ngǝ Haruna ka ngulisha'a nyi. 4 Macha nja sǝltǝ ngǝ ndǝ shili aka sǝr hatǝmachi nǝ sǝ zwazwa, kǝl ba nja mǝrti nyi na ǝpǝu kuɓutǝu. Nja mǝrti waina kǝla tlǝlam nda zukuti na mal ndara wafa nda ɓǝsǝti mal ti. 5 Macha hatǝmachi nyi nǝ sǝ zwazwa nda nja sǝltǝ atǝ kyi sǝl sǝu, kǝl nja mǝr nyi ana ǝpǝu nda kuɓutǝu kǝla tlǝlam nda nja zukuti na mal. 6 Njo ɓǝbǝlǝu nyi shiɗǝuuuudǝu, njo pǝkǝnyi mal, nacha ngǝ hatǝmachi nǝ sǝ zwazwa. 7 Macha hatǝmachi nyi nǝ sǝ zwazwa nga, sǝnda nja mǝr ku kǝtas sǝl sǝu, kǝl nja mǝr nyi na ǝpǝu kuɓǝtǝ ku mal. 8 Njo shili na nyi nǝ Tlakǝ sǝr hatǝmachi nǝ zwazwa nda nja mǝr na sǝ inga. Njo shili lǝtǝ nyi nǝ Pərist, na cha tsǝu cho yi ni tǝ dzǝgana. 9 Pərist kwa tasi mbaɗǝ nǝ ɗunghati ku sǝ zwazwa nǝ hatǝmachi nga, ba cha nginda kyatǝ dzǝuugana. Nacha ngǝ hatǝmachi nda nja lǝnda na hu'u, nda kwa shu'ni kwitkwit nǝ Tlakǝu. 10 Sǝnda hǝya dzǝ ku sǝ zwazwa nǝ hatǝmachi nda, kwa ɗa ka mbaɗǝ nǝ Haruna ka ngulisha'a nyi. Sǝ karti ngǝ gagaɗa nǝ hatǝmachi nǝ nginda anǝ Tlakǝu. 11 A sǝ zwazwa nǝ hatǝmachi nda njo shili na nyi nǝ Tlakǝ nda njo fǝu tlǝlam kwa wa, aka a njo ngi tlǝlam ndara mumwa aku hatǝmachi nda lǝtǝ na hu'u nǝ Tlakǝ wa. 12 Njo nau shili na nyi hatǝmachi nǝ nǝnǝnya yar tangǝrmar sǝ zwazwa nǝ Tlakǝu, kǝl nda a njo yinda ka lǝnda ka sǝr hatǝmachi kyatǝ dzǝgana nǝ shu'ni kwitkwit wa. 13 Njo fǝu wuna ku kala hatǝmachi kǝhi nǝ sǝ zwazwa, aka wuna ba'ada cha nǝ alkawal ku pama ka na Hyel. Hyo lǝtǝ dǝhǝ hatǝmachi kǝhi nǝ wuna. 14 Ma nja shili na yar tangǝrmar sǝ zwazwa nǝna ka hatǝmachi anǝ Tlakǝu, nja shili na taɗǝr kǝra uhi nda nja tsaku ku hu'u ga ghǝradliya. 15 Nja pǝu nyi mal kwa, ǝtsǝu nja fǝu murdi, aka hatǝmachi nǝ uhi cha. 16 Aku zangam nda nja ghǝradliya nda, ana mal nda, ana murdi nda, pərist kwa tatsi nǝnyi na mbaɗǝ nǝ ɗǝnghati, ba cha nginda. Hatǝmachi nda nja lǝtǝ anǝ Tlakǝu Yahweh nga.