Jakop tə Ɓəl yi Betel
35
1 Kəl ngə Hyel tə nar nyi Jakop, <<Ɓəl yi Betel na ngya, ka yi hərtə nyi dzəgana nə Hyel, ndə nda tə chabiya nghə dzə ku bəji nda ko hwi tsa zamə nghə Isuwa nda.>>2 Ngə Jakop tə nar nyi nə njir ki nyi ana dəhə nji inda kə'i cha, <<Hya təkəbiya kərnəhi na mihiɓir katə nda tsa hi, hya mərtə kərnəhi tsa'atsa'a, ana hya bəlatə dzaki kəhi. 3 Hya shili məna təra yi Betel, tangnda yo yi hərtə nyi dzəgana nə Hyel, ndə nda tə wum na'a ku bəji nda ya ku ɓwaɓwatəu, ya cha ɗa tsa'a naya dəhə ba nda ya ma'i ti.>> 4 Kəl ngə nda nə nyi dəhə katə inda nə Jakop, dəhə ka tsəshiu inda ku himya nda, ngə Jakop tə chiu ku hə'i da kiɗa wur oak a vu Shekem.
5 Nda ndo ɓu kar kənda ka ndo ngyar mbwa nda, kəl ngə Hyel tə gwa'atə ləvər tə gwa ku ta njir mələm nda 'ual'ualəu, nacha gwa'atə a ndə da tə nau gədlə nda wa.
6 Kəl Jakop ana dəhə nji inda ka cha tə dzəva Luz (nacha ngə Betel) a tə hə'i Kan'ana. 7 Ngə cha hərtə dzəgana tangnda ga nga mbwa na El Betel, aka tangnda ngə Hyel tə chabiya nyi dzə nə Jakop ku ɓəji nda cho hwi tsa zamə nyi.
8 Tangnda ngə Debora mala dləu yah nə vi Rachal tə tah, ngə nja haɗəya nyi da kiɗa wur oak a vu Betel. Ngə nja nga tləmər mbwa nda Alon Bakot.
9 Ahir Jakop tə shili vu Padan Aram, ngə Hyel tə ɓəla chabiya nyi dzə ga səkənyi papa'akur. 10 Ngə Hyel tə nar nyi nə Jakop, <<Tləmə nghə Jakop, kəl ja, a tsə'u njo nga nghə Jakop wa, tləm nghə kwa ɗa Isra'ila.>> Ngə Hyel tə fendzə nyi tləm nə Jakop Isra'ila.
11 Ngə Hyel tə nar nyi, <<Naya ngə Hyel Tlakəu, sər ka yatəkər ka tsaka. Hə'i ana mələm ɗanghəu, ana ka təl ka təl kwa zəbiya ku nyandəla ka. 12 Yo nə nghə hə'i nda ya ɗaka mər alkawal yo nə nyi nə Ibrahim ana Ishaku, yo nə ngha, ya yo nə nyi nə nyandəla kə tsəu.>> 13 Kəl ngə Hyel tə təra gi huɗamələm ga ngya nyi tangnda cha ɓwanya na cha ti.
14 Jakop tə dəhəya shimbal hangu tə mbwa nda Hyel tə ɓwanya na cha tə nda, ngə cha handa təmachi nə sa ti, ətsəu cha pətə mal ti. 15 Ngə Jakop tə nga mbwa nda Hyel tə ɓwanya nacha tə nda, Betel.
Tər ka Rachal ana Ishaku
16 Kəl ngə nda hya'atə vu Betel ga təra. Manda tsə'u nda naɗə tsa Efrata, ngə ɓəlakər yah tə səya Rachal, kəl ja a sa tə cha ɓwaɓwatə təvi cha yah. 17 Ku bəji nda cha ku ɓwaɓwatər ɓəlakər yah, ngə mala dləu yah nda tə nar nyi, <<Ngwa ka da ləvər wa, aka sakana a uya tə kə vanya zər.>> 18 Manda cho kuɗə bəlatəu, ngə cha fəndzə nyi tləm nə zər nda Ben Oni, kəl ja, ada nyi tə fəndzə nyi tləmə Banyami.
19 Ngə Rachal tə tah, ngə nja haɗə nyi ku lakur yi Efrata (na cha ngə, Baitalami). 20 Ngə Jakop tə dəhəya shimbal ga cha char ənda hu Rachal nga, nda ba'a ənya tsə'utanyi hinda.
21 Ngə Isra'ila tə biyama na ma'i ga yi latə madləɓa nyi vu Migdal Eder səkəu. 22 Ku bəji nda Isra'ila na ngya tə hə'i nda, ngə Roben tə gwa piya na Bilha kwatəra ada nyi, ngə Isra'ila tə uya labar.
Nguli Shili Jakop Kwabəmətləu
23 Janə nguli shili Liya,
Roben zər tangərma nə Jakop,
Simion, Levi, Juda, Isaka ana Zebulun.
24 Janə nguli shili Rachal,
Yusufu ana Banyami.
25 Nguli shili Bilha kwatəra Rachal, nanda ingə
Dan ana Naftali.
26 Nguli shili Zilpa kwatəra Liya nanda ingə,
Gad ana Asha.
Na nda ingə nguli shili Jakop inda nja yiyah nyi vu Padam Aram.