Dina ana Njir Shekem
34
1 Vanya pəchi Dina kwar Liya nda nda yah na Jakop tə biya ki usar alenya mahi'i hə'i Shekem. 2 Manda Shekem zər Hamor ndər Hiti, təl nə mətla hə'i mbwa nda tə la'a Dina, ngə cha səya nyi ga piya nacha ana tuku. 3 Kəl ngə ɗufwa cha tə ɓəl yatə kəra Dina kwar Jakop, ngə cha char nyi i ga ɓwanya məsəɗakə nə nyi. 4 Ngə Shekem tə nar nyi nə ada nyi Hamor, <<Həbiya ɗa Dina ka mala.>>5 Manda Jakop tə ngatə ənda a səwandə tə nji kwapəlyakəkur Dina kwanyi, ngulisha'a nyi biya tə babal kwa ɓəla sərshishi, ngə cha bəgə tanyi ɗi'u kəl nda nda shili ku ki.
6 Kəl ngə Hamor adanya Shekem tə biya ka cha yi ndər na Jakop. 7 Sakan ja, ngulisha'a Jakop shili tə ku ki tə vər ɓəla, manda nda ngatə sənda ɗa. Kəl səngə Shekem tə mər ngə tə tləya huda ngulisha'a Jakop, aka cha mər sər kuzhi tə hə'i Isra'ila, cha piya na kwar Jakop chulkə sənda pa'a kwa kina ɗa.
8 Kəl ngə Hamor tə nar nda, <<Mangə ɗufwa Shekem zər ɗa a tə kwa kəhi. Maki ngya nyi ma cha həbiya ka mala nyi. 9 Sakan ja, ngwa ngulisha'a kəmən hə kərnənda, hya hə ku'i kəea, naea tsə'u ea hə ku'i kəhi. 10 Hyo nau ngya ku pama ea, ja ngə hə'i bwaɓəu, hya ngya, hya shafəli, hya ɓu gəna.>>
11 Ngə Shekem tə nar nyi nə adanya Dina ka zamənya Dina, <<Əngwa ya uya kwambiyakur tə lya hi, ya yo nə hi dəhə sə nda hya na ya nə hi. 12 Batliya ma gəna gadla ana ga'a nda yo shili nə wi nda hyo i, ya yo kinda dəhə sə nda hya na. Kəda ga hya na'a Dina cha ɗa ka mala ɗa.>>
13 Ngə nguli Jakop tə ɓəlakə nyi na ɓwanya ɗimi nə Shekem ana Hamor adanya Shekem, aka kwapəlyakəkur kwamən nda Dina səwa ti. 14 Ngə nda nar nda, <<A da eo mər chul ngəna sə wa, a da eo nə nyi kwa kəea nə ndə kəla tlatla bədzang wa. Cho ɗa ka sər kuzhi nə ea. 15 Kəl ja, eo nau nə hi təkəra mbandər zhang tanyi, nacha ngə ma hya dləukər hyo ɗa wi naea təwa tlanda nyi bədzang nə dəhə shili kəhi. 16 Kəl ba ea nə hi ku'i kəea, naea tsə'u eo hə ku'i kəhi ka kərnəea. Eo ngya ku pama hi, ya məno ɗa nji zhang kə'i hi. 17 Kəl ja macha a da hyo dləukər nja tlanda hi bədzang wa, eo hətə kwamən ea, ba təra.>>
18 Ɓwanya ngulisha'a Jakop ngə ɗa tə mənakə nə Hamor ana zər nyi Shekem. 19 Tlakala nda, ada nyi kwa la'a səli nyi ku huɗa dəhə njir ki nyi, a cha shivi na sə nda nguli Jakop tə nar nyi wa, aka ngatə cha məsaɗakur na Dina kwar Jakop nda. 20 Aka ənga Hamor ana zər nyi Shekem tə təra biya nya mələm ka nda biya ɓwanya nə njir mələm kənda. Nda na, 21 <<Nji ina, nji mənakə inə təwan mən, ngya nda ma nda ngya tə hə'i kəmən, nda shafəli, mbwa da bwaɓə tanyi tə hə'i nə ka nda. Məno nau hə ku'i kənda ya ndo nau hə nəkəmən tsəu. 22 Kəl ja, nji inə kwa nau ngya kə'i mən təkəra ma məna dləukər məno tlanda bədzang, məna ɗa wi nəkə nda. 23 Ma tə ɗa əngə ya, a sərshishi ana sə kənda ana dəhə alenya sərshishi kənda kwa ɗa ka nəkə mən ma? Aka ənga, mən dləukər nda ngya ku pama mən.>>
24 Kəl dəhə nji inda tə biya nya chira mələm nda tə dləukər na Hamor ana zər nyi Shekem, ngə nja tlanda nyi bədzang nə dəhə shili inda tə hə'i nda.
25 Pəshir makərkunya hanyi, tsə'utanyi kəti tla bədzang nda kwa tə nda, nguli shili Jakop mətləu, Simion ana Levi, zamənya Dina i'i, tə hətə katsakər kənda ga biya dla'a mələm nda, ngə nda kuɗənda dəhə shili. 26 Ngə nda tsəya Hamor ana zər nyi Shekem, ga hətə kwamən nda Dina ku ki Shekem ga təra na cha. 27 Kəl ngə nguli shili Jakop tə təra go ta mələm ga gwa həya nji kuɗəkuɗa ga fa'a kwazhalɓi, ga nda kibiya sə nda nja mərtə nyi nə kwamən nda. 28 Ngə nda paltə kətəng ka kua, ka tla ka kwara ana dəhə alenya sə inda ku ta mələm ana inda kwa takəu. 29 Nda fa'atə dəhə gəna kənda ana dəhə mahi'i ana ngulisha'a, nda fa'atə dəhə sə inda ku ki kənda ka kwazhalɓi.
30 Kəl ngə Jakop tə nar nyi nə Simion ana Levi, <<Janə hya təɗəkə ɗa tə ɓwaɓwatəu, hya mərtə ɗa ka sər həyatə tə hə'i njir Kan'ana ana njir Ferizi. Ya a zəndə tə hi a da mən ɗang tə hə'i nə wa, manda daɓətəkər ka pa mən, njo tsəya ɗa dəhə ka njir ki ɗa.>>
31 Kəl ngə Simion ana Levi tə wum ga na, <<Ea ngyar Shekem cha fiya kwamən ea wi zawar ja?>>