Jakop tə Ɓə na Isuwa
33
1 Ngə Jakop tə har kəra cha ga la'a Isuwa kwa shili na nji nyi 400, kəl ngə Jakop tə təkəya ngulisha'a ku pama Liya ana Rachal ana kwatəra nyi inda mətlə inda. 2 Ngə cha pərma kwatəra nyi inda mətlə inda ana ngulisha'a kənda biyama, ta'a Liya ana ngulisha'a nyi, ta'a Rachal ana Yusufu ngə biyahi. 3 Jakop tə təra biyaman nda dəhəu, nda cho yi kəra zamə nyi, cho uzhi hya'atə zhaka məɗəfa təvi cha yi dza zamə nyi Isuwa.4 Kəl ja, Isuwa tə hwi yada zamə nyi Jakop ga yi gaɓətə nyi, cha sə cha cha gya tə wulya Jakop gaɓətə nyi, ndo tiwi. 5 Kəl ngə Isuwa tə har lya cha ngə cha la'a mahi'i ka ngulisha'a, ngə cha jau Jakop, <<Ka wa ingə nji inə kə'ikə inga?>>
Ngə Jakop tə wum ga na, <<Nji inda Hyel tə nə nyi nə mava nghə ku ɗanghali nyi inga.>>
6 Manda kwatəra inda ka ngulisha'a kənda tə ɗa ləhə ngə nda uzhi. 7 Əngə tsə'u Liya ka ngulisha'a nyi tə shili ga uzhi. Udiyanyi, Yusufu ana Rachal, nanda ma'a nda shili ga uzhi.
8 Kəl ngə Isuwa tə jau Jakop, <<Mi nə ba'adar ka dzuku ka dzuku inə ya ɓə nə ina?>>
Ngə Jakop tə wum ga na, <<Kwambiyakur nə yo gwa'a tsa tlakə ɗa.>>
9 Kəl ja, Isuwa tə na, <<Zamə ɗa sə ingə nyaɓə tanyi tsaya. Piya sə ingə ka kərngha.>>
10 Kəl ngə Jakop tə na, <<A'a, maki, macha uya tə ya kwambiyakur tsa ka, dləutsə ga'a ina. Aka la'a huɗəma ka wi ndə nda la'a huɗəma Hyəl cha, wi nə ka dləutsə ɗa na hirgyaɗə na. 11 Maki dləutsə sə inə ya shili nə nənghə ina, aka Hyella char ɗa tə ɗanghali nyi ga na'a dəhə sənda yo gwa'a.>> Aka Jakop tə chinda dzə na gədi Isuwa, ngə Isuwa tə dləutsə sə inda.
12 Ngə Isuwa tə na, <<Sakan ja, a mi təra, ya ləbiya ngha.>>
13 Kəl ja, Jakop tə nar nyi, <<Tlakə ɗa zəndə tə ənda ngulisha'a inə tsə'u shiɗəɗəu, ya tuku ya tsamartə mapiɗi kətəng ana tla inda shiɗəɗə nyi kwa sa 'ua nda. Ma nja pal nda na dunama pəchi zang, dəhə sərshishi ingə kwa kuɗa. 14 Aka ənga tlakə ɗa ma'i biyamar mava nyi, naya tsə'u yo nəu hinda saməu tsa'atsa'a na ənda tla inə kwa ma'i ma ɗa, ana ənda ngulisha inə kwa ma'i, tsa'a yada tlakə ɗa vu Seyir.>>
15 Ngə Isuwa tə na, <<Ngwa ya ngyar alenya nji ɗa kə'i ka.>>
Ngə Jakop tə jau, <<Mya gwa'atə ko mər ənga?>> Ngə Jakop tə wum ga na, <<Tlakə ɗa kwambiyakur nə yo gwa'a tsa ka.>>
16 Pəshinda tanyi Isuwa tə dləutsə lakur ɓəl yi Seyir. 17 Jakop nə nyi cha təra yi Sukot, ngə cha yi hərtə ki nə kərnyi, ga ɓatlətə nyi mənga nə sərshishi nyi. Na cha ngə gwa'atə njo nga mbwa nda Sukot.
18 Ahir Jakop tə hya'atə vu Padan Aram, ngə cha dzəva vu Shekem yiying tə hə'i Kan'ana ngə cha latə madləɓa nyi ləhə dza mələm nda. 19 Aka cha ɗəl mbwa nda azurfa 400, cha ɗəl tsa ngulisha'a Hamor, ada nya Shekem, tangnda cha latə madləɓa nyi. 20 Tangnda ngə Jakop tə hərtə dzəgana, ngə cha fəndzə nyi tləm, El Elohe Isra'ila, nacha ngə Hyel njir Isra'ila.